(ភ្នំពេញ)៖ ទីបំផុត ស្នាដៃអក្សរសិល្ប៍ខ្មែរដ៏ល្បីរឿង «ធនញ្ជ័យ» ត្រូវបានរៀបថតចេញជាខ្សែភាពយន្តភាគ ដោយបានធ្វើពិធីក្រុងពាលីថតជាផ្លូវការ នៅព្រឹកថ្ងៃទី១២ ខែកញ្ញា ឆ្នាំ២០១៧នេះ ដោយផលិតកម្ម B&S សហការជាមួយស្ថានីយទូរទស្សន៍ប៉ុស្ដិ៍លេខ៥ ខណៈដែលអ្នកដឹកនាំសម្ដែងក្នុងរឿងនេះ បានបង្ហាញក្ដីបារម្ភ និងបង្ហាញពីការលំបាកជាច្រើន នៅក្នុងការថតរឿងបុរាណមួយនេះ ឲ្យបានល្អ និងមានគុណភាពខ្ពស់ អាចទទួលយកបាន។
ជាការពិត ការថតរឿងបុរាណ ជាពិសេសរឿងដែលត្រូវបានគេសិក្សាចងចាំ ល្បីពេញប្រទេសទៅហើយនោះ បើកាលណាមានផលិតករ និងផលិតកម្មណា យកមកកែច្នៃចេញជារឿងភាគ មានការសម្ដែងឲ្យចេញជារូបរាងពិតៗ គឺហាក់បីដូចជាមានលក្ខណៈពិបាកបន្តិច ព្រោះនៅក្នុងរឿងតម្រូវឲ្យអ្នកដឹកនាំសម្ដែង ធ្វើយ៉ាងណាស្វះស្វែងទិដ្ឋភាព តួអង្គ និងរកឧបករណ៍ ឲ្យបានគ្រប់ជ្រុងជ្រោយទាំងអស់ ជៀសវាងខ្វះខាតនូវចំណុចណាមួយ ហើយពេលចេញមកមានការរិះគន់ ពីអ្នកទស្សនា។
លោក ទិត្យ ធារិទ្ធ អ្នកដឹកនាំសម្ដែងរឿង «ធនញ្ជ័យ» បានបង្ហាញក្ដីបារម្ភថា ទោះបីជាលោកធ្លាប់មានបទពិសោធន៍ ដឹកនាំសម្ដែងរឿងអស់រយៈពេលជិត២០ឆ្នាំមកហើយក្ដី ក៏ប៉ុន្តែ ពេលលោកមកដឹកនាំសម្ដែងក្នុងរឿង «ធនញ្ជ័យ» លោកមានការបារម្ភខ្លាំង ព្រោះតែរឿងនេះ ជាប្រភេទរឿងបុរាណ មានលក្ខណៈប្រទាក់ក្រឡាគ្នាខ្លាំង ជាពិសេសការជ្រើសរើសតួសម្ដែង ទីតាំងថត ឧបករណ៍ថត សម្ភារៈផ្សេង ក្នុងនោះមានដូចជា សេះ ដំរី ទូកឬសំពៅ និងផ្នែកមួយចំនួនទៀតនៅក្នុងរឿង គឺពិបាករក យកមកបំពេញឲ្យបានគ្រប់គ្រាន់ណាស់ ខណៈបច្ចុប្បន្នសត្វពាហនៈទាំងនោះ មានចំនួនតិចតួចបំផុត។
អ្នកដឹកនាំសម្ដែងរូបនេះ បានបង្ហាញក្ដីបារម្ភទៀតថា ម្យ៉ាងទៀតទុនផលិតនៅក្នុងរឿង «ធនញ្ជ័យ» ក៏នៅមានកម្រិត និងមានបរិមាណតិចនៅឡើយ ដែលមិនអាចបំពេញតាមតម្រូវការ ទាំងស្រុងបាននោះទេ។ ដូច្នេះអ្វីៗត្រូវតែខិតខំប្រឹងប្រែងទាំងអស់គ្នា គ្រប់ផ្នែកទាំងអស់ ទាំងតួសម្ដែង បច្ចេកទេស និងការដឹកនាំរបស់ក្រុមហ៊ុនទាំងមូល ធ្វើយ៉ាងណាឲ្យផ្ទៃរឿងទាំងមូល គេចផុតពីការរិះគន់។
លោក ទិត្យ ធារិទ្ធ និយាយថា «សម្រាប់រឿង ធនញ្ជ័យ គឺជារឿងទី១ហើយ ដែលខ្ញុំមានការបារម្ភខ្លាំង រហូតពេលខ្លះដេកមិនលក់ទៀតផង ព្រោះរឿងនេះ ជារឿងបុរាណមានការសិក្សា ដឹងឮគ្រប់ៗគ្នា ហើយយកមកថតចេញជារឿងភាគ។ វាគឺការលំបាកមួយសម្រាប់ខ្ញុំ ដើម្បីឲ្យផលិតបានជោគជ័យ ពេលខ្លះបារម្ភពេក ចង់ទៅជាឈឺហើយខ្ញុំ។ ការលំបាកទី១នោះ គឺថវិកា ក្នុងការផលិត គឺនៅទាបមែនទែន វាមិនស្មើនឹងទំហំនៃសាច់រឿង, ទី២ ការស្វែងរកសត្វពាហនៈដើម្បីថត ដូចជា សេះ ដំរី ជាដើម, ទី៣ ការស្វែងរកទីតាំងថត និងទី៤ ការជ្រើសរើសតួសម្ដែង និងបច្ចេកទេសថតជាដើម»។
យ៉ាងណាមិញលោក ទិត្យ ធារិទ្ធ បានសម្ដែងក្ដីរំពឹងថា ទោះស្ថិតក្នុងកាលៈទេសៈ លំបាកលំបិនបែបនេះក្ដី ក៏លោកត្រូវតែខំប្រឹងប្រែងឲ្យអស់ពីលទ្ធភាព ព្រោះដោយសារតែក្រុមហ៊ុន បានទទួលកិច្ចសហការជាមួយនឹងស្ថានីយទូរទស្សន៍ ប៉ុស្ដិ៍លេខ៥ ដោយខាងស្ថានីយទូរទស្សន៍ចង់បានរឿងនេះ ដើម្បីដាក់បញ្ចាំង ដូច្នេះលោក និងក្រុមការងារត្រូវតែតស៊ូធ្វើយ៉ាងណា ឲ្យចប់តាមគោលដៅ និងគម្រោង។
សូមបញ្ជាក់ថា រឿង «ធនញ្ជ័យ» មានការចូលរួមសម្ដែងជាតួឯក ដោយ នាយព្រែក និងតួឯកស្រីដោយកញ្ញា ពៅ លីដា ព្រមទាំងតារាសម្ដែងល្បីៗជាច្រើនទៀត ខណៈរឿងនេះ មានចំនួន៣០ ទៅ៤០ភាគ និងប្រើរយៈពេលថត ពី៥ទៅ៦ខែ ទើបបញ្ចប់៕
