(ព្រះសីហនុ)៖ ករណីគ្រោះថ្នាក់ចរាចរណ៍រវាងរថយន្ដបាឡែន បុកម៉ូតូមួយគ្រឿង ដោយក្នុងនោះ មានជនរងគ្រោះម្នាក់ជិះក្នុងរថយន្ដ ដែលគេស្គាល់ថា ជាតារាចំរៀង ណយ វ៉ាន់ណេត រងរបួសធ្ងន់ ក្នុងចំណោមអ្នករួមដំណើរ៥នាក់ រីឯភាគីម៉ូតូម្នាក់ស្លាប់ និងរបួសធ្ងន់ម្នាក់ផងដែរ។
ហេតុការណ៍នេះបានកើតឡើង នៅវេលាម៉ោង០៧៖៣០នាទីយប់ ថ្ងៃទី០៩ ខែកញ្ញា ឆ្នាំ២០១៧ នៅលើផ្លូវជាតិលេខ៤ ចន្លោះគីឡូម៉ែត្រលេខ១៥១-១៥២ ភូមិសឹ្ទងឆាយខាងជើង ឃុំសឹ្ទងឆាយ ស្រុកកំពង់សិលា ខេត្តព្រះសីហនុ ដែលរថយន្តបាឡែន មានទិសដៅពីភ្នំពេញ ទៅខេត្តព្រះសីហនុ ម៉ូតូម៉ាកMSX មានទិសដៅបញ្ច្រាស់គ្នា។
របាយការណ៍របស់សមត្ថកិច្ចមូលដ្ឋាន បានឲ្យដឹងថា រថយន្ត Camry បាឡែន ពណ៌ទឹកប្រាក់ ពាក់ស្លាកលេខ2AD-0120 (អ្នកបើកបររត់គេចបាត់ មិនស្គាល់អត្តសញ្ញាណ) អ្នករួមដំណើរក្នុងរថយន្តមាន០៥នាក់ ក្នុងនោះ របួសធ្ងន់ម្នាក់ គឺតារាចំរៀង លោក ណយ វ៉ាន់ណេត អាយុ៥៩ឆ្នាំ ស្នាក់នៅភូមិឫស្សីស្រស់ សង្កាត់និរោធ ខណ្ឌច្បារអំពៅ។ ដោយឡែក ម៉ូតូម៉ាក MSX បើកបរដោយ ឈ្មោះ ផុន ប៊ុនលាភ ភេទប្រុស អាយុ២២ឆ្នាំ របួសធ្ងន់បាក់ជើងទាំងពីរ និងអ្នករួមដំណើរ ឈ្មោះ ណោ ស្រីនាង អាយុ២០ឆ្នាំ ស្លាប់នៅកន្លែងកើតហេតុ អ្នកទាំងពីររស់នៅភូមិថី្ម ឃុំកំពង់សិលា ស្រុកកំពង់សិលា និងមានមុខរបរធ្វើការនៅរោងចក្រតំបន់សេដ្ឋកិច្ចពិសេសឃុំបិតត្រាំង ខេត្តព្រះសីហនុ។
ក្រោយកើតហេតុភ្លាមៗ កម្លាំងអាវុធហត្ថស្នាក់ការសន្តិសុខ៤០២ សហការជាមួយកម្លាំងអធិការដ្ឋាននគរបាលស្រុកកំពង់សិលា ជួយសង្គ្រោះលើកអ្នករងរបួស ដាក់រថយន្តសង្គ្រោះ យកទៅមនី្ទរពេទ្យបង្អែកស្រុកស្រែអំបិល ចំណែកសាកសពបានប្រគល់ទៅឲ្យក្រុមគ្រួសារសព យកទៅធ្វើបុណ្យតាមប្រពៃណី រីឯវត្ថុតាងទាំង២ ត្រូវបានស្ទួចយកទៅរក្សាទុក នៅអធិការដ្ឋាននគរបាលស្រុកកំពង់សិលា ដើម្បីចាត់ការនិតិវិធីបន្ត៕
