(ភ្នំពេញ)៖ នេះពិតជាដំណឹងមួយ គួរឲ្យសប្បាយរីករាយណាស់ ចំពោះទស្សនិកជន ដែលពូកែតាមដានរឿងកូរ៉េ ដោយក្នុងនោះខ្សែភាពយន្តល្បីៗ​ របស់កូរ៉េចំនួនពីររឿង មានចំណងជើងថា «រថភ្លើងទៅប៊ូសាន» និងរឿង «អាថ៌កំបាំងបំផុត» នឹងត្រូវចាក់បញ្ចាំងឲ្យមហាជនទស្សនាឡើងវិញ ដោយឥតគិតថ្លៃ នៅថ្ងៃទី១០ ខែកញ្ញា ឆ្នាំ២០១៧នេះ នៅរោងភាពយន្តបែបកូរ៉េ Prime Cineplex ផ្សារទំនើប សុវណ្ណា។

ជាការពិតណាស់ ចំពោះខ្សែភាពយន្តចំនួនពីរ ដែលនឹងត្រូវចាក់បញ្ចាំង​ក្នុងពេលឆាប់ៗនេះ គឺសុទ្ធសឹងតែជារឿងល្បីៗ ដែលទទួលបានការគាំទ្រយ៉ាងខ្លាំង ពីសំណាក់ទស្សនិកជន ទូរទាំងពិភពលោក។​ ក្នុងនោះមានដូចជារឿង «រថភ្លើងទៅប៊ូសាន» ដែលជារឿងប្រភេទ ភាពយន្តហ្សូមប៊ី ភ័យរន្ធត់ព្រឺព្រួច និង កម្សត់។ ចំណែកឯខ្សែរភាពយន្តមួយទៀត ជាប្រភេទរឿង បែបកំប្លែង សើចក្អាក់ក្អាយ ​មានចំណងជើងថា «អាថ៌កំបាំងបំផុត»។

សូមបញ្ជាក់ថា រឿង «អាថ៌កំបាំងបំផុត» នឹងត្រូវចាក់ផ្សាយ​នៅវេលា ម៉ោង ២៖០០នាទីរសៀល។ ចំណែកឯរឿង «រថភ្លើងទៅប៊ូសាន» នឹងត្រូវចាក់បញ្ចាំង​នៅវេលាម៉ោង ៥៖០០នាទីល្ងាច។ អ្វីដែលគួរឲ្យពិសេសជានេះ​ទៅទៀតនោះ គឺក្រៅពីការទស្សនាភាពយន្ត ទស្សនិកជន ទាំងអស់ដែលអញ្ចើញចូលរួម ក្នុងកម្មវិធីមហោស្រពភាពយន្តកូរ៉េ ក៏បានយល់ដឹងពីវប្បធម៌កូរ៉េ, ទិញផលិតផលកូរ៉េ​ ដែលមានការបញ្ចុះតម្លៃ, ភ្លក្សម្ហូបបែបកូរ៉េមានរសជាតិឆ្ងាញ់​ ដោយឥតគិតថ្លៃ ​និង លេងហ្គេមកំសាន្តជាច្រើន ដើម្បីឈ្នះរង្វាន់ពីកម្មវិធីផងដែរ៕