(កណ្ដាល)៖ លោក ណុប រតនៈ ប្រធានគណៈពង្រឹងមូលដ្ឋានឃុំព្រែកស្លែង តំណាងនាយឧត្តមសេនីយ៍ ហ៊ីង ប៊ុនហៀង ប្រធានគណៈអចន្ត្រៃយ៍ គណៈពង្រឹងមូលដ្ឋានស្រុកកណ្តាលស្ទឹង នៅព្រឹកថ្ងៃទី០៨ ខែកញ្ញា ឆ្នាំ២០១៧នេះ អញ្ជើញក្នុងពិធីក្រុងពាលី បញ្ចុះបឋមសីលាសាងសង់អគាររដ្ឋបាលឃុំព្រែកស្លែង។

ក្នុងនោះក៏មានការចូលរួមពី ​លោក អ៊ិត ឋានរ័ត្ន នាយខុទ្ទកាល័យបញ្ជាការដ្ឋានអង្គរក្ស និងជា​អនុប្រធានទី១ គណៈពង្រឹងមូលដ្ឋានឃុំព្រែកស្លែង, លោក បូរ ណារ៉េត អភិបាល​ស្រុក​កណ្តាលស្ទឹង និងសមាជិកសមាជិការច្រើនទៀតផងដែរ។

លោក ណុប រតនៈ បាន​នាំនូវបណ្តាំផ្ញើ​សាកសួរសុខទុក្ខរបស់ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ជូនចំពោះលោកតា លោកយាយ បងប្អូនប្រជាពលរដ្ឋ និង​សំណេះសំណាល ដោយលើកឡើង​ពីតម្លៃនៃសន្តិភាព ដែលមានរាជរដ្ឋាភិបាលដឹកនាំដោយសម្ដេច​តេជោ ហ៊ុន សែន ដែលបានខិតខំស្វែងរកសន្តិភាព រហូតដល់ប្រទេសជាតិមានការរីកចម្រើន លើគ្រប់វិស័យមកដល់បច្ចុប្បន្ន​។

លោកបញ្ជាក់ថា ​សូមឲ្យលោកតា លោកយាយ បងប្អូន ពិសេសយុវជនត្រូវចូលរួមការពារ និងថែរក្សាសន្តិភាព ដែល​ទទួលបានក្នុងពេលនេះ ឲ្យបានគង់វង្សជាដាច់ខាត ហើយមិនអនុញ្ញាតឲ្យបុគ្គល ឬក្រុមណាមកបង្កចលាចល បង្កើត​ឲ្យមានបដិវត្តន៍ពណ៌​​ក្នុងបំណងបំផ្លិចបំផ្លាញសន្តិភាពនេះបានឡើយ៕