(ភ្នំពេញ)៖ សាកលវិទ្យាល័យភ្នំពេញអន្តរជាតិ (PPIU) បានប្រកាសជាផ្លូវការ នៅថ្ងៃទី០៧ ខែកញ្ញា ឆ្នាំ២០១៧នេះថា ខ្លួនបានទទួលអាជ្ញាបណ្ណពីក្រសួងអប់រំ យុវជន និងកីឡា ដើម្បីបើកវគ្គបណ្ដុះបណ្ដាលលើជំនាញ «ការគ្រប់គ្រងឡូជីស្ទីក - Logistics Management» កម្រិតបរិញ្ញាបត្រ នៅក្នុងសាកលវិទ្យាល័យ មុនគេបង្អស់នៅកម្ពុជា ដល់សិស្ស-និស្សិត សម្រាប់ការសិក្សាក្នុងឆ្នាំថ្មីនេះតទៅ។
ការប្រកាសឲ្យដឹងបែបនេះ ត្រូវបានធ្វើឡើង ក្នុងសិក្ខាសាលាមួយ នៅរសៀលថ្ងៃទី០៧ ខែកញ្ញា ឆ្នាំ២០១៧នេះ នៅសាកលវិទ្យាល័យភ្នំពេញអន្តរជាតិ ដោយមានការអញ្ជើញចូលរួម ជាអធិបតីភាព ពីសំណាក់លោកស្រី ទេព កូលាប សាកលវិទ្យាធិការ នៃសាកលវិទ្យាល័យភ្នំពេញអន្តជាតិ ជាមួយនឹងអ្នកពាក់ព័ន្ធលើជំនាញ «ការគ្រប់គ្រងឡូជីស្ទីក - Logistics Management» មកពីក្រុមហ៊ុន, ស្ថាប័នផ្សេងៗ និងនិស្សិត ជាច្រើននាក់។
លោកស្រី ទេព កូលាប សាកលវិទ្យាធិការ នៃសាកលវិទ្យាល័យភ្នំពេញអន្តជាតិ បានថ្លែងឲ្យដឹងថា ការបណ្ដុះបណ្ដាលលើជំនាញ «ការគ្រប់គ្រងឡូជីស្ទីក - Logistics Management» ពិតជាមានសារៈសំខាន់ណាស់ ព្រោះវាជាតម្រូវការចាំបាច់ស្ទើរគ្រប់ស្ថាប័ន ទាំងសាធារណៈ និងឯកជន ដែលកំពុងត្រូវការធនធានមនុស្ស មានចំណេះដឹងផ្នែក ឡូជីស្ទីកនាពេលបច្ចុប្បន្ន និងអនាគត។ ជាពិសេសក្រុមហ៊ុនដែលកំពុង ធ្វើធុរកិច្ចលើឡូជីស្ទីក នេះតែម្ដង ដែលតាមស្ថិតិមានប្រមាណ៤៥៥ក្រុមហ៊ុន កំពុងប្រតិបត្តិការនៅក្នុងប្រទេសកម្ពុជា។
លោកស្រីសាកលវិទ្យាធិការ បានបន្តទៀតថា សាកលវិទ្យាល័យភ្នំពេញអន្តជាតិ (PPIU) បានទទួលអាជ្ញាបណ្ណជាផ្លូវការពីក្រសួងអប់រំ យុវជន និងកីឡា តាមរយៈលិខិតលេខ ៣១២ អយកប្រក ចុះថ្ងៃទី១៣ ខែមីនា ឆ្នាំ២០១៧ កម្រិតបរិញ្ញាបត្រ លើជំនាញ «ការគ្រប់គ្រងឡូជីស្ទីក - Logistics Management» ដែលនេះ ជាអាជ្ញាបណ្ណជំនាញគ្រប់គ្រងការដឹកជញ្ជូន មុនគេបង្អស់ក្នុងប្រទេសកម្ពុជា សម្រាប់បណ្ដុះបណ្ដាលដល់និស្សិត ស្របទៅតាមការរីកចម្រើន ឥតឈប់ឈរ នៃសេដ្ឋកិច្ចរបស់ប្រទេសកម្ពុជា ក៏ដូចជាពិភពលោក ទាំងមូល។
លោកស្រីបានសង្កត់ធ្ងន់ថា ស្របជាមួយនឹងការវិវឌ្ឍន៍ ឥតឈប់ឈរ នៃសេដ្ឋកិច្ចរបស់ប្រទេសកម្ពុជា វិស័យឡូជីស្ទីក - Logistics ពិតជាមានសារៈសំខាន់ខ្លាំង ដែលតម្រូវឲ្យក្រុមហ៊ុន ឬស្ថាប័ននានា ដែលធ្វើធុរកិច្ចផ្នែកឡូជីស្ទីក ត្រូវការធនធានមនុស្សចាំបាច់ មានជំនាញ ឡូជីស្ទីក-Logistics ដើម្បីបំពេញការងារ ឲ្យមានគុណភាព និងប្រសិទ្ធិភាពខ្ពស់។ ជាមួយគ្នានេះ សាកលវិទ្យាល័យភ្នំពេញអន្តជាតិ (PPIU) បានខិតខំសម្រិតសម្រាំង ប្ដេជ្ញាចិត្ត បង្កើតឲ្យមានការសិក្សាលើជំនាញ ឡូជីស្ទីក-Logistics ឲ្យស្របទៅនឹងតម្រូវការក្នុងស្រុក សហគមអាស៊ាន និងពិភពលោក ដោយមានការចូលរួមពីគ្រប់ភាគី មានដូចជា សមាគមឡូជីស្ទីក, ក្រុមហ៊ុនឡូជីស្ទីក, ក្រសួងអប់រំ និងសាកលវិទ្យាល័យ ជាដៃគូជាច្រើនទៀត។
លោកស្រី ទេព កូលាប បានបន្ថែមទៀតថា លើសពីនេះទៅទៀត សាកលវិទ្យាល័យភ្នំពេញអន្តជាតិ (PPIU) ក៏មានកិច្ចសហការជាមួយសហគមន៍ Logistic Cambodia ( Camfa-Cambodia Freight Forwarders Association) ដែល ជាស្ថាប័នដែលប្រកបអាជីវកម្ម លើ Logistic ដើម្បីទទួលបានលទ្ធភាព និងផ្ដល់ឱកាសជូននិស្សិត សិក្សាជំនាញ Logistic នេះ មានឱកាសទទួលបានការហាត់ការ អនុវត្តន៍ជាក់ស្ដែង នៅពេលកំពុងសិក្សា និងទទួលបានការងារ នៅពេលបញ្ចប់ការសិក្សាជាស្ថាពរ។ សាកលវិទ្យាល័យភ្នំពេញអន្តជាតិ ក៏មានដៃគូអន្តរជាតិ ទាំងគ្រិះស្ថានឧត្តមសិក្សា និងក្រុមហ៊ុនប្រកបអាជីវកម្ម លើមុខរបរ ឡូជីស្ទីក (Logistic) ដើម្បីផ្ដល់ឱកាសឲ្យអ្នកជំនាញ បានផ្លាស់ប្ដូរ និងហាត់ការ និងធ្វើការនៅក្រៅប្រទេស ផងដែរ។
សូមបញ្ជាក់ថា ក្នុងអង្គសិក្ខាសាលា វាគ្មិនកិត្តិយសក៏បានធ្វើបទបង្ហាញពីសារៈសំខាន់ នៃចំណេះដឹងលើជំនាញ «គ្រប់គ្រងឡូជីស្ទីក» និងជំរុញសិស្ស-និស្សិត គួរជ្រើសរើសសិក្សាលើជំនាញនេះឲ្យបានច្រើន ព្រោះបច្ចុប្បន្ន ក៏ដូចជាអនាគត ស្ថាប័នសាធារណៈ និងឯកជន ក្នុងប្រទេស និងក្រៅប្រទេស ត្រូវការចាំបាច់នូវធនធានមនុស្ស ដែលមានជំនាញ ឡូជីស្ទីក ច្បាស់លាស់ ដើម្បីបំពេញការងារ៕
