(ភ្នំពេញ)៖ លោក ឈាង វុន អ្នកតំណាងរាស្រ្តគណបក្សប្រជាជនកម្ពុជា មណ្ឌលបាត់ដំបង និងជាអ្នកនាំពាក្យរដ្ឋសភា បានបដិសេធថា ការចាប់ខ្លួនលោក កឹម សុខា ប្រធានគណបក្សសង្គ្រោះជាតិ ពាក់ព័ន្ធនឹងអំពើឃុបឃិតជាមួយបរទេសក្បត់ជាតិខ្លួនឯង ដែលធ្វើឡើងដោយស្ថាប័នតុលាការ គឺមិនពាក់ព័ន្ធនឹងគណបក្សប្រជាជនកម្ពុជាឡើយ ហើយក៏រិតតែមិនមែនគណបក្សប្រជាជន ខ្លាចចាញ់ការបោះឆ្នោត ឆ្នាំ២០១៨ នោះដែរ ពោលសកម្មភាពទាំងនេះ ជាបទល្មើសជាក់ស្ដែងដែលត្រូវផ្តន្ទាទោសតាមច្បាប់។

លោក ឈាង វុន ថ្លែងបែបនេះក្រោយបញ្ចប់កិច្ចប្រជុំ គណៈកម្មាធិការអចិន្រ្តៃយ៍នៃរដ្ឋសភា ដើម្បីពិនិត្យលើករណីលោក កឹម សុខា ដែលត្រូវសមត្ថកិច្ចចាប់ខ្លួន ពាក់ព័ន្ធនឹងបទល្មើសក្បត់ជាតិ នាព្រឹកថ្ងៃទី០៧ ខែកញ្ញា ឆ្នាំ២០១៧។

ឆ្លើយតបនឹងសំណួររបស់ក្រុមអ្នកសារព័ត៌មាន លោកអ្នកនាំពាក្យថ្លែងយ៉ាងដូច្នេះថា «នគរបាល តុលាការគេធ្វើហ្នឹង ថាតើគេខ្លាចចាញ់ឆ្នោតទេ? មិនមែនទេ គេអត់ខ្លាចទេ។ ពួកក្រៅប្រទេសជួយប៉ុណ្ណឹងហើយ ដោយយើងមិនបានដឹងមុនផង គណបក្សប្រជាជននៅតែឈ្នះជាង៥០សន្លឹក (បោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៤) ចុះឥលូវទម្រាំតែយើងដឹង រឿងអីយើងខ្លាច អ្នកឈ្នះមិនដែលខ្លាចអ្នកចាញ់ទេ មានតែអ្នកចាញ់ទេដែលខ្លាចអ្នកឈ្នះ»។

លោក ឈាង វុន បានបន្តថា គណបក្សប្រជាជនកម្ពុជា ជាគណបក្សតែមួយគត់ ដែលបានជ្រោមជ្រែងកសាងប្រទេសកម្ពុជា តាំងពីឆ្នាំ១៩៧៩ រហូតមានការអភិវឌ្ឍដូចបច្ចុប្បន្ន ជាគណបក្សដែលរួមសុខរួមទុក្ខជាមួយប្រជាជនកម្ពុជា ហើយប្រជាជនមិនដែលបោះបង់ចោលគណបក្សប្រជាជនកម្ពុជានោះទេ ដូច្នេះគណបក្សប្រជាជនកម្ពុជា មិនខ្លាចចាញ់ឆ្នោតគណបក្សប្រឆាំងបន្តិចណាឡើយ។

សូមបញ្ជាក់ថា លោក កឹម សុខា ត្រូវបានកម្លាំងសមត្ថកិច្ចចាប់ខ្លួននៅវេលាម៉ោង ១២៖៣៥នាទី រំលងអាធ្រាត្រ ឈានចូលថ្ងៃទី០៣ ខែកញ្ញា ឆ្នាំ២០១៧ នៅគេហដ្ឋានរបស់លោក ស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ក្រោយពីបែកធ្លាយវីដេអូមួយបង្ហាញថា លោកបានអនុវត្តតាមការបញ្ជារបស់សហរដ្ឋអាមេរិក ដើម្បីដណ្តើមអំណាចពីរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។

តំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី៥ ខែកញ្ញា ឆ្នាំ២០១៧ បានសម្រេចចោទប្រកាន់លោក កឹម សុខា ពីបទសន្ទិដ្ឋិភាពជាមួយបរទេស ដែលជាបទល្មើសមួយ ក្នុងអំពើក្បត់ជាតិ មានចែងក្នុងមាត្រា៤៤៣ នៃក្រមព្រហ្មទណ្ឌ ដែលបទល្មើសនេះប្រឈមនឹងការដាក់ពន្ធនាគារពី ១៥ឆ្នាំ ទៅ៣០ឆ្នាំ ហើយចៅក្រមស៊ើបសួរក៏បានសម្រេចឃុំខ្លួនលោក កឹម សុខា ជាបណ្តោះអាសន្ននៅពន្ធនាគារត្រពាំងផ្លុង ស្ថិតនៅខេត្តត្បូងឃ្មុំផងដែរ៕