(ភ្នំពេញ)៖ ស្រុកកៀនស្វាយ ខេត្តកណ្តាល គឺមានចម្ងាយជិតបង្កើយ ត្រឹមតែប្រមាណជាង១០គីឡូម៉ែត្រប៉ុណ្ណោះ ពីគល់ស្ពានព្រះមុនីវង្សក្បាលថ្នល់ ដែលប្រជាពលរដ្ឋ តែងស្គាល់ថា ជាតំបន់ទេសចរណ៍បឹងធម្មជាតិ មានអាកាសធាតុល្អបរិសុទ្ធ សម្រាប់សម្រាកលំហែកាយនាថ្ងៃចុងសប្តាហ៍ ឬសម្រាកពីការងារ។
ក្រៅតែពីជាកន្លែងទេសចរណ៍ ដ៏ល្បីល្បាញហើយនោះ ហេដ្ឋារចនាសម្ព័ន្ធផ្លូវស្ពានដ៏រលើបរលោង ដែលរាជរដ្ឋាភិបាលកម្ពុជាខិតខំកសាង បាននិងកំពុងសម្រួលធ្វើចរាចរណ៍ របស់ប្អូនប្រជាពលរដ្ឋ កាន់តែងាយស្រួល ដោយចំណាយពេលត្រឹមតែប្រហែល២០នាទីប៉ុណ្ណោះ ពីគល់ស្ពានព្រះមុនីវង្ស ដល់ស្រុកកៀនស្វាយ។
ការបញ្ចប់ការស្ថាបនាផ្លូវជាតិលេខ១ ជាហេតុផលសំខាន់មួយ ដែលរុញច្រានឲ្យដីនៅតាមផ្លូវសរសៃឈាមសេដ្ឋកិច្ចនេះ ចាប់ពីខណ្ឌច្បារអំពៅដល់ ស្រុកកៀនស្វាយ រហូតដល់តំបន់អ្នកលឿងឡើងថ្លៃ បូករួមទាំងកំណើននៃតម្រូវការវិនិយោគ ស្ថានភាពភូមិសាស្ត្រ និងការកើនឡើងនូវតំបន់ឧស្សាហកម្ម និងលំនៅឋាន ក៏ជាហេតុផលចម្បងធ្វើឲ្យតម្លៃ ដីនៅតាមបណ្តោយផ្លូវជាតិដ៏សំខាន់នេះ បន្តកើនឡើងបន្ថែមទៀត។
ការអភិវឌ្ឍន៍លើវិស័យអចលនទ្រព្យវិញ គឺឃើញបុរីដ៏ថ្មីសន្លាង និងជាមួយនឹងផ្សារទំនើប កំពុងតែផុសអណ្តែតឡើង នៅតាមបណ្តាលផ្លូវជាតិលេខ១ ក្នុងស្រុកកៀនស្វាយ ខេត្តកណ្តាល ខណៈគម្រោងផ្សេងៗអាចនឹងលេចរូបរាងឡើង នៅក្នុងពេលដ៏ខ្លីខាងមុខ ជាមួយនឹងតំបន់សេដ្ឋកិច្ចពិសេស និងក្រុងរណបផងដែរ។ ជាក់ស្តែអថ្មីៗនេះ ក្រុមហ៊ុនដ៏ធំមួយរបស់ចិន បានធ្វើការទិញដីចំនួន១៥០០ហិកតារួចហើយ នៅតំបន់កៀនស្វាយនេះ ដោយគ្រោងបង្កើតទីក្រុងរណបថ្មីមួយ។ នេះបើតាមការបញ្ជាក់របស់ក្រុមហ៊ុន អចលនទ្រព្យធំមួយនៅកម្ពុជា។
អភិបាលស្រុកកៀនស្វាយលោក អ៊ូ ឈាង បានថ្លែងប្រាប់អង្គភាព Fresh News ដឹងថា ស្រុកកៀនស្វាយ មានឃុំចំនួន៨ ស្មើនឹង៦៧ភូមិ ដែលមានភូមិសាស្ត្រ និងសណ្តាប់ធ្នាប់ល្អ។
លោកបន្តថា ស្រុកកៀនស្វាយ មានភូមិសាស្ត្រជាប់នឹងរាជធានីភ្នំពេញ ដោយមានព្រំប្រទល់ជាមួយនឹងខណ្ឌច្បារអំពៅ ចម្ងាយប៉ុន្មានតែ១៧គីឡូម៉ែត្រប៉ុណ្ណោះ ពីរាជធានីភ្នំពេញ។ ស្រុកកៀនស្វាយ ស្ថិតនៅស្របតាមបណ្តោយផ្លូវជាតិលេខ១ អមដោយទន្លេមេគង្គក្រោម និងតាមបណ្តោយផ្លូវលេខ១១០ អមដោយទន្លេបាសាក់។
លោកអភិបាលស្រុកបន្តថា ភូមិសាស្ត្រក្នុងស្រុកកៀនស្វាយ មានផ្ទៃដីនៅទូលាយ ដែលជាឱកាសដ៏ល្អសម្រាប់ការអភិវឌ្ឍន៍ របស់វិនិយោគិនមិនថា វិស័យអចលនទ្រព្យ ឬក៏បើកក្រុមហ៊ុន រោងចក្រនោះឡើយ គឺជាទីតាំងដ៏មានសក្តានុពលយ៉ាងខ្លាំង។
ជាមួយគ្នានេះលោក អ៊ូ ឈាង ក៏បានអំពាវនាវឲ្យវិនិយោគិនជាតិ និងអន្តរជាតិ មកវិនិយោគនៅស្រុកកៀនស្វាយ ឲ្យបានកាន់តែរីកចម្រើន ដើម្បីជំរុញលើកស្ទួយជីវភាព របស់ប្រជាពលរដ្ឋឲ្យកាន់តែធូរធាឡើយថែមទៀត ស្របតាមគោលនយោបាយ រាជរដ្ឋាភិបាលកម្ពុជា។
ប្រជាពលរដ្ឋម្នាក់នៅស្រុកកៀនស្វាយ បានបង្ហើបឲ្យដឹងថា នៅរយៈពេលចុងក្រោយនេះ គេឃើញមានជនជាតិចិនជាច្រើន បានចុះមកពិនិត្យ និងស្វែងរកទិញដី ដើម្បីអភិវឌ្ឍន៍ នៅក្នុងភូមិសាស្ត្រស្រុកកៀនស្វាយនេះ។
ប្រជាពលរដ្ឋសង្ឃឹមថា តំបន់កៀនស្វាយ នឹងទាក់ទាញនូវវិនិយោគិនបាន ដោយសារមានភូមិសាស្ត្រ ហេដ្ឋារចនាសម្ព័ន្ធល្អ ដើម្បីជួយជីវភាពពួកគាត់ ឲ្យកាន់តែរីកចម្រើនបន្ថែមទៀត។
អ្នកជំនាញអចលនទ្រព្យរបស់ក្រុមហ៊ុនល្បីឈ្មោះមួយ បានប្រាប់សារព័ត៌មានក្នុងស្រុកមួយថា ចាប់ពីកៀនស្វាយដល់អ្នកលឿង មានតំបន់សេដ្ឋកិច្ចពិសេសចំនួន៣ កំពុងសាងសង់ និងដំណើរការជាតំបន់មានកំពង់ផែ និងជាតំបន់មានកម្លាំងពលកម្មច្រើន ដែលធ្វើឲ្យមានគម្រោងបង្កើត តំបន់ឧស្សាហកម្មច្រើន។ ដីនៅតំបន់នោះ ចាប់ពីស្ពានមុនីវង្ស ដល់បុរី ប៉េង ហួត កៀនស្វាយ តម្លៃដីបានកើនឡើងពី២ ទៅ៣ដង ធៀបនឹងរយៈពេល៥ឆ្នាំមុន។
អ្នកជំនាញដដែលបញ្ជាក់ថា មានអ្នកវិនិយោគក្នុងស្រុក និងបរទេសបានប្រមូលទិញដី នៅតាមបណ្តោយផ្លូវនេះច្រើនណាស់ រាប់តាំងពីអ្នកវិនិយោគមកពីប្រទេសចិន ថៃ និងអ្នកវិនិយោគក្នុងស្រុក ដែលធ្វើឲ្យតម្លៃដីហក់ឡើងខ្ពស់៕
