(កំពង់ស្ពឺ)៖ ប្រជាពលរដ្ឋជាងជិត៣ពាន់នាក់ ស្ថិតនៅស្រុកភ្នំស្រួច ខេត្តកំពង់ស្ពឺ បានសម្ដែងនូវក្តីរំភើបរីករាយ និងថ្លែងអំណរគុណចំពោះលោក ហ៊ុន ម៉ានី អ្នកតំណាងរាស្ត្រ ដែលបានចាត់ឲ្យក្រុមការងារ គ្រូពេទ្យស្ម័គ្រចិត្តរបស់លោក ចុះជួយពិនិត្យ ព្យាបាលជំងឺ និងចែកជូនថ្នាំពេទ្យដល់ប្រជាពលរដ្ឋ ដោយឥតគិតថ្លៃ។

ការថ្លែងអំណរគុណនេះ ធ្វើឡើងនាថ្ងៃទី០៣ ខែកញ្ញា ឆ្នាំ២០១៧ នាឱកាស​ដែលក្រុមការងារគ្រូពេទ្យស្ម័គ្រចិត្ត របស់លោក ហ៊ុន ម៉ានី ប្រមាណ២១៥នាក់ ដឹកនាំដោយលោក លេង ផាលី ប្រធានក្រុមការងារ​គ្រូពេទ្យស្ម័គ្រចិត្ត លោក ហ៊ុន ម៉ានី ដោយបាននាំអំណោយថ្នាំពេទ្យ ចុះទៅពិនិត្យ ព្យាបាលជំងឺជូនប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ ដោយឥតគិតថ្លៃ​ចំនួន៣ពាន់នាក់ ព្រមទាំងមានចែកនំបុ័ង និងទឹកសុទ្ធ ជូនដល់ពួកគាត់ថែមទៀតផង។ ក្នុងនោះ​បានពិនិត្យព្យាលបាលជំងឺកុមារ៤៣២នាក់, ជំងឺស្រ្តី២៧៩នាក់, ជំងឺផ្លូវចិត្ត២១២នាក់, ជំងឺឫសដូងបាត២៧៦នាក់, ជំងឺសន្លាក់ឆ្អឹង៩៧នាក់, ជំងឺរលាកសួត២២៥នាក់, ជំងឺត្រចៀក ច្រមុះ បំពង់ក១៧២នាក់, ជំងឺភ្នែក៧៩នាក់, ជំងឺសើរស្បែក២០៧នាក់, ជំងឺទឹកនោមផ្អែម១៧៩នាក់, ជំងឺមាត់ធ្មេញ២០៣នាក់, អេកូសាស្ត្រ២៥៧នាក់ និងជំងឺទូទៅ៦៨នាក់ និងព្យាបាលរបួស និងវះកាត់តូច២៥នាក់។

លោក មឿន ម៉ាត់ ប្រជាពលរដ្ឋរស់នៅក្នុងស្រុកភ្នំស្រួច បានថ្លែងឲ្យដឹងថា «ខ្ញុំពិតជាមានសេចក្ដីត្រេកអរយ៉ាងខ្លាំង និងសូមថ្លែង​អំណរ​គុណ ឯកឧត្តមហ៊ុន ម៉ានី​ ដែលបានដឹកនាំក្រុមគ្រូពេទ្យស្ម័គ្រចិត្ត មកចុះជួយព្យាបាលជំងឺជូនអ្នកស្រុកភ្នំស្រួច ហើយខ្ញុំសូមជូនពរឲ្យ​ឯកឧត្តម និងក្រុមការងារគ្រូពេទ្យស្ម័គ្រចិត្តទាំងអស់ ជួបប្រទះតែសេចក្ដីសុខ គ្រប់ប្រការ»។

សម្រាប់ប្រជាពលរដ្ឋវ័យចំណាស់ម្នាក់ទៀត អ្នកស្រី ផាន់ ស្រីម៉ៅ ក៏បានថ្លែងអំណរគុណយ៉ាងជ្រាលជ្រៅ និងសូមថ្លែងអំណរគុណដល់លោក ហ៊ុន ម៉ានី និងក្រុមគ្រូពេទ្យទាំងអស់ សូមជួបប្រទះតែសេចក្ដីសុខគ្រប់ប្រការ និងរកស៊ីទទួលទានមានបាន និងជៀសឆ្ងាញ​ពីជំងឺតំកាត់ទាំងឡាយ។

អ្នកស្រីក៏បានស្នើសូមឲ្យក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះមកជួយព្យាបាលប្រជាពលរដ្ឋឲ្យបានញឹកញាប់បំផុត។

សូមបញ្ជាក់ថារយៈពេល៥៧ខែ ឈានចូលឆ្នាំទី០៥ (២០១២-២០១៧) ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី ចំនួន២០០៧នាក់ ចុះពិនិត្យនិងព្យាល​បាលជូនប្រជាពលរដ្ឋដោយឥតគិតថ្លៃចំនួន៨០លើក ក្នុងនោះព្យាលបាលជូន​ប្រជាពលរដ្ឋបានចំនួន១២២,៩០៩នាក់។

ការចុះពិនិត្យ និងព្យាបាលជំងឺជូនប្រជាពលរដ្ឋនេះ គឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូន ប្រជាពលរដ្ឋ ក្នុងនាមជាឈាមជ័រ ខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយចំណែក។ បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរក ភាពជោគជ័យសុភមង្គល ជូនគ្រួសារ និងសង្គមជាតិ។

ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី បានចុះពិនិត្យ និងព្យាបាលជូនប្រជាពលរដ្ឋមូលដ្ឋាន ក្នុងតំបន់ដាច់ស្រយាលតាមខ្នងផ្ទះ ដោយផ្ទាល់នេះ ដោយសារប្រទេសជាតិ មានសុខសន្តិភាពពេញលេញ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្វើឲ្យប្រជាពលរដ្ឋមានភាពសុខសាន្ត។ មានតែសម្តេចតេជោទេ ដែលមានទេពកោសល្យពីកំណើត ដឹកនាំប្រទេសជាតិឲ្យមានការរើកចំរើន ឥតឈប់ឈរមានការផ្សះផ្សាជាតិបង្រួបបង្រួមជាតិ មានស្ថិរភាព និងសន្តិភាពពិតប្រាកដ។ ដូច្នេះនេះប្រជាពលរដ្ឋទាំងអស់ ត្រូវតែរួមគ្នាថែរក្សាសុខសន្តិភាព និងស្ថិរភាពតាមគោលនយោបាយ ឈ្នះឈ្នះរបស់សម្តេចតេជោ ហ៊ុន សែន ឲ្យបានគង់វង្ស។

ការពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃដែលទទួលបានជោគជ័យ យ៉ាងត្រចះត្រចង់បែបនេះ គឺដោយសារមានការ ចង្អ៊ុលបង្ហាញពី លោក ហ៊ុន​ ម៉ានី តំណាងរាស្ត្រនៃកម្ពុជា៕