(ភ្នំពេញ)៖ ជនសង្ស័យ២នាក់ ត្រូវបានកម្លាំងនគរបាលខណ្ឌទួលគោក បង្ក្រាបបានភ្លាមៗ នៅព្រឹកថ្ងៃទី០៣ ខែសីហា ឆ្នាំ២០១៧នេះ ក្រោមធ្វើសកម្មភាពឆក់ កាបូបមិនបានសម្រេច នៅមុខបញ្ជាការដ្ឋានកងរាជអាវុធហត្ថលើផ្ទៃប្រទេស ផ្លូវលេខ២៨៩ ស្ថិតក្នុងក្រុមទី៣១ ភូមិ៨ សង្កាត់បឹងកក់ទី១។
មន្ដ្រីនគរបាលមូលដ្ឋានបានឲ្យដឹងថា ជនសង្ស័យដែលបង្ក្រាបបាន ទី១៖ ឈ្មោះ រ៉េត រដ្ឋា ហៅព្រឹក អាយុ៣១ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវរថភ្លើង សង្កាត់បឹងកក់ទី២ ខណ្ឌទួលគោក ជាអ្នកធ្វើសកម្មភាព ឆក់ និងបើកម៉ូតូ ហើយជននេះជា មុខសញ្ញាចាស់ឆក់ និងគាស់ផ្ទះ ធ្លាប់ជាប់ពន្ធនាគារ រយៈពេល២ឆ្នាំ ពីបទឆក់ និងជនសង្ស័យទី២៖ ឈ្មោះ ស កក្កដា អាយុ២១ឆ្នាំ មុខរបរមិនពិប្រាកដ ស្នាក់នៅភូមិក្បាលដំរី សង្កាត់កាកាប ខណ្ឌពោធិសែនជ័យ។
ដោយឡែកជនរងគ្រោះ២នាក់ ជិះម៉ូតូម៉ាក Honda C125 ពណ៌ខ្មៅ មិនចាំស្លាកលេខ ជិះឌុបគ្នាទិសដៅពីជើងទៅត្បូង តាមបណ្តោយផ្លូវលេខ២៨៩ ក៏ត្រូវជនសង្ស័យធ្វើសកម្មភាពឆក់កាបូបតែមិនសំរេច ហើយជនរងគ្រោះមិនដាក់ពាក្យប្តឹង និងគ្មានរងរបួសស្នាមទេអ្វីឡើយ។
ក្រោយឃាត់ខ្លួនកម្លាំងនគរបាលជំនាញ ដកហូតបាន ម៉ូតូចំនួន០១គ្រឿង ម៉ាកស្មាស ពណ៌ខ្មៅ គ្មានស្លាកលេខ, សោរខ្សៀរលេខ៨ ចំនួន០១ និងឧបករណ៌សម្រាប់ប្រើប្រាស់គ្រឿងញៀនមួយចំនួន។ ជនសង្ស័យទាំង២ ត្រូវបានបញ្ជូនទៅអធិការដ្ឋាននគរបាលខណ្ឌ ដើម្បីកសាងសំណុំរឿងចាត់ការបន្ដ៕
