(ឧត្តរមានជ័យ)៖ ​នាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចម្រុះ អមដំណើរដោយ លោក ស ថាវី អភិបាល​ខេត្ត នៅថ្ងៃទី០១ ខែកញ្ញា ឆ្នាំ២០១៧នេះ អញ្ជើញ​ក្នុងពិធីបិទវគ្គហ្វឹកហ្វឺនវរសេនាតូចរៀបរយ របស់កងពលតូចថ្មើរជើងលេខ៤១ នៅទីបញ្ជាការវរសេនាតូច៤១២ នៅភូមិសាស្ត្រ ឃុំ​បាក់អន្លូង ស្រុកត្រពាំងប្រាសាទ។

​នាយឧត្តមសេនីយ៍ គន់ គីម បានផ្តាំផ្ញើឲ្យកម្មសិក្សាការីទាំងអស់ បន្ទាប់ពីបញ្ចប់វគ្គសិក្សាពេលទៅបំពេញបេសកកម្ម ត្រូវប្រែក្លាយចំណេះដឹង ឲ្យទៅជាសកម្មភាពគំរូ ក្នុងការបំពេញការងារ គោរពវិន័យ និងប្តេជ្ញាការពារបូរណភាពទឹកដី សុខសន្តិភាព របស់ប្រទេសជាតិ និងប្រឆាំងរាល់ការ​ ប៉ុនប៉ងផ្តួលរំលំរាជរដ្ឋាភិបាលស្របច្បាប់ ដែលមានសម្តេចតេជោ ហ៊ុន សែន​ ជាប្រមុខដឹកនាំ។

​ជាមួយគ្នានោះ នាយឧត្តមសេនីយ៍ ក៏បានអំពាវនាវឲ្យយោធិនគ្រប់រូបព្រមទាំងគ្រួសារ ត្រូវទៅពិនិត្យបញ្ជីឈ្មោះបោះឆ្នោត និងនាំកូនចៅ ដែលគ្រប់អាយុទៅចុះឈ្មោះបោះឆ្នោត ឲ្យបានគ្រប់ៗគ្នា៕