(កំពត)៖ លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា ប្រជាពលរដ្ឋ នឹងកាន់តែទទួលបាន សេវាគាំពាសង្គមពីរាជរដ្ឋាភិបាលច្រើនជាងមុន បើបន្តគាំទ្រការដឹកនាំរបស់គណបក្សប្រជាជនកម្ពុជាក្រោមការដឹកនាំរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។

រាជរដ្ឋាភិបាលកម្ពុជា កាលពីពេលថ្មីៗនេះ បានដាក់ចេញគោលនយោបាយគាំពារសង្គម សំដៅដល់ការគាំទ្រ និងជួយដល់មុខសញ្ញាក្រីក្រទាំងអស់ ដែលជាការទទួលខុសត្រូវរបស់រាជរដ្ឋាភិបាល និងដាក់ចេញ គោលនយោបាយនេះ ពីឆ្នាំ២០១៦ រហូតដល់២០២៥។

លោក វង សូត បានលើកឡើងបែបនេះ នៅពេលដែលលោកដឹកនាំក្រុមការងារ ចុះជួបសំណេះសំណាល និងចែកអំណោយជូនប្រជាពលរដ្ឋ ជួបការលំបាក និងប្រជាពលរដ្ឋរងគ្រោះដោយគ្រោះថ្នាក់ធម្មជាតិ ក្នុងខេត្តកំពត នៅថ្ងៃទី០១ ខែកញ្ញា ឆ្នាំ២០១៧នេះ។

រដ្ឋមន្រ្តីក្រសួងសង្គមកិច្ច បានបន្ថែមថា គោលនយោបាយគាំពារសង្គមរបស់រាជរដ្ឋាភិបាល មានការផ្តល់ជូនសេវាកម្មជាច្រើនសម្រាប់ប្រជាពលរដ្ឋ ក្នុងនោះមានការជួយប្រជាពលរដ្ឋក្រីក្រ ត្រូវមានប័ណ្ណក្រីក្រ ប័ណ្ណសុខភាពទៅមន្ទីរពេទ្យ មិនគិតថ្លៃ។ លោកថ្លែងថា «មានប័ណ្ណនេះទៅពេទ្យអត់យកលុយ ហ្នឹងហើយជាគោលនយោបាយគាំពារសង្គម របស់រាជរដ្ឋាភិបាល ដើម្បីជួយបងប្អូន នេះជាផ្នែកមួយជួយសម្រូលជីវភាពរបស់ប្រជាពលរដ្ឋក្រីក្រ ហើយនៅមានជាច្រើនទៀត ដែលរាជរដ្ឋាភិបាលជួយប្រជាពលរដ្ឋរងគ្រោះ និងងាយរងគ្រោះ។ ក្រៅពីនឹង មានករណីគ្រោះធម្មជាតិ ខ្យល់ព្យុះ ខ្យល់កន្រ្តាក់ ក៏មានការជួយពីរាជរដ្ឋាភិបាលដូចគ្នា»។

លោករដ្ឋមន្រ្តី ក៏បានបញ្ជាក់ថា គោលនយោបាយរបស់រាជរដ្ឋាភិបាល បានផ្តោតលើការផ្តល់សេវាកម្មជូនប្រជាពលរដ្ឋ ជាពិសេស គឺសេវា សម្រាប់បងប្អូនរងគ្រោះ និងងាយរងគ្រោះ ហើយនេះ ក៏មិនមែនជាការងាររបស់ក្រសួងសង្គមកិច្ចតែ១នោះទេ នៅមានស្ថាប័នពាក់ព័ន្ធជាច្រើនទៀត ដែលជួយផ្តល់សេវាជូនប្រជពលរដ្ឋរងគ្រោះ និងងាយរងគ្រោះ។សេនាធិការរបស់ក្រសួងសង្គមកិច្ច កាន់តែមានតួនាទីសំខាន់ឡើងៗ។ ក្របខណ្ឌគោលនយោបាយ ដែលបានផ្តល់លទ្ធភាពឲ្យកាន់តែច្រើន សម្រាប់ជួយទ្រទ្រង់ដល់មុខសញ្ញា ជួបការលំបាកខ្លាំងជាងគេ នៅតាមមូលដ្ឋាននីមួយៗ។

សូមបញ្ជាក់ថា ក្នុងឱកាសជួបសំណេះសំណាល និងចែកអំណោយជូនប្រជាពលរដ្ឋ ជួបការលំបាក និងប្រជាពលរដ្ឋរងគ្រោះដោយគ្រោះថ្នាក់ធម្មជាតិ ក្នុងខេត្តកំពតនេះ លោករដ្ឋមន្រ្តី វង សូត បានអំពាវនាវឲ្យប្រជាពលរដ្ឋ ដែលមិនទាន់បានចុះឈ្មោះបោះឆ្នោត នាពេលកន្លងមក ឱ្យទៅចុះឈ្មោះបោះឆ្នោតឲ្យបានគ្រប់ៗគ្នា និងបោះឆ្នោតឲ្យគណបក្សណាដែលល្អ និងគោរពទៅតាមឆន្ទៈផ្ទាល់ខ្លួន៕