(ភ្នំពេញ)៖ ប្រជាពលរដ្ឋ រស់នៅ និងប្រកបរបរអាជីវកម្មតាមដងផ្លូវ ក្នុងរាជធានីភ្នំពេញបានសាទរ ចំពោះការចូលរួមសម្អាតផ្លូវនានា របស់ក្រុមហ៊ុន ខ្មែរ ប៊ែវើរីជីស។
ជាផ្នែកមួយក្នុងការថែរក្សាបរិស្ថាន នៅក្នុងរាជធានីភ្នំពេញ ក្រុមហ៊ុន ខ្មែរ ប៊ែវើរីជីស បានសហការជាមួយសាលារាជធានីភ្នំពេញ បញ្ជូនរថយន្តសម្អាតផ្លូវចំនួនពីរគ្រឿងទៅជួយសម្អាតវិថីនានានៅក្នុងរាជធានី ប្រវែងសរុប ១២១គីឡូម៉ែត្រ រហូតដល់ចុងខែកញ្ញា ឆ្នាំ២០១៧ ក្រោមយុទ្ធនាការ «ទីក្រុងស្អាត សុខភាពល្អ»។
វណ្ណៈ ស្រីវិន ជាអ្នកលក់ទឹកអំពៅ នៅខាងមុខផ្សារធំថ្មី បាននិយាយទាំងញញឹមថា ការសម្អាតនេះនឹងជួយឲ្យការប្រកបរបររបស់គាត់ប្រសើរជាងមុន «កាលពីមុន មិនទាន់បានលាងផ្លូវអញ្ចឹង ពេលឡាន ម៉ូតូ ជិះកាត់ដីវាហុយតោងលើអំពៅ និងឥវ៉ាន់ផ្សេងៗទៀត ហើយអ្នកទិញគាត់មិនចង់បានរបស់ដែលបានដីតោងអញ្ចឹង»។
រុំ សារ៉េន ជាជាងកាត់ដេរនៅតាមបណ្តោយផ្លូវវេងស្រេង ក៏គាំទ្រក្នុងសកម្មភាពសម្អាតផ្លូវនេះដែរ «ផ្លូវនេះពីមុន ហ៊ុយខ្លាំងណាស់ រហូតដល់ដីតោងខោអាវខ្ញុំដេរទៀត។ ពេលមកសម្អាតផ្លួវចឹង វាលែងមានដីហ៊ុយ ព្រោះឡានហ្នឹងបាញ់ទឹក ហើយបូមដីយកទៅអញ្ចឹង ហើយត្រជាក់ទៀត»។
មិនខុសពីគ្នានេះដែរ ផុន ប៉ូឡែន ជាអាជីវករម្នាក់ទៀតនៅលើផ្លូវវែងស្រេង បានសម្តែងអារម្មណ៍រីករាយថា «ខ្ញុំអរណាស់ បានខាងក្រុមហ៊ុនមកលាងសម្អាតបែបនេះ។ ពីព្រោះខ្ញុំបើទ្វាររកស៊ីដូច្នេះកាលណាផ្លូវស្អាត ខ្ញុំមានចំណូលច្រើន»។
គិតមកទល់ពេលនេះ រថយន្តសម្អាតផ្លូវរបស់ក្រុមហ៊ុន ខ្មែរ ប៊ែវើរីជីស បានសម្អាតផ្លូវសំខាន់ៗដូចជា ផ្លូវជាតិលេខ១ មហាវិថីសហព័ន្ធរុស្សី មហាវិថីព្រះនរោត្តម មហាវិថីព្រះសុធារស មហាវិថីព្រះមុនីវង្ស មហាវិថីព្រះសីហនុ និងផ្លូវវេងស្រេង។
យុទ្ធនាការ «ទីក្រុងស្អាត សុខភាពល្អ» របស់ក្រុមហ៊ុន ខ្មែរ ប៊ែវើរីជីស បានចាប់ផ្តើម នៅដើមឆ្នាំ២០១៧ដោយជួយសម្អាតផ្លូវក្នុងគ្រប់ខេត្តក្រុង ហើយរាជធានីភ្នំពេញ គឺជាគោលដៅទី១០ របស់យុទ្ធនាការនេះ៕
