(ភ្នំពេញ)៖ ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ នារសៀលថ្ងៃទី៣១ ខែសីហា ឆ្នាំ២០១៧នេះ បានចេញដីកាបង្គាប់ឲ្យឃុំខ្លូនអតីតបុគ្គលិកផ្នែកទីផ្សារ និងគ្រប់គ្រងការផលិតកាត ATM របស់ធនាគារអេស៊ីលីដា បន្ទាប់ពីជននេះត្រូវបានកម្លាំងនគរបាលចាប់ខ្លួន រឿងលួចដកលុយចេញពីម៉ាស៊ីន ATM អស់ជិត១០ម៉ឺនដុល្លារអាមេរិក។
មន្រ្តីសាលាដំបូងរាជធានីភ្នំពេញបានប្រាប់ភ្នាក់ងារ Fresh News ប្រចាំតុលាការថា លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ កាលពីព្រឹកមិញ បានសម្រេចចោទប្រកាន់លើឈ្មោះ លាង សារ៉ា ភេទប្រុស អាយុ៣៧ឆ្នាំ ពីបទលួច ពាក់ព័ន្ធនឹងករណីលួចប្រាក់ចំនួន ១០ម៉ឺនដុល្លារអាមេរិក ពីធនាគារនេះ តាមរយៈកាត ATM។
ជនជាប់ចោទឈ្មោះ លាង សារ៉ា ជាអតីតបុគ្គលិកផ្នែកទីផ្សារ និងគ្រប់គ្រងការផលិតកាត ATM របស់ធនាគារអេស៊ីលីដា មានទីស្នាក់ការកណ្ដាលនៅក្បែរក្រសួងព័ត៌មាន ស្ថិតតាមបណ្ដោយផ្លូវព្រះមុនីវង្ស សង្កាត់ស្រះចក ខណ្ឌដូនពេញ។
ជនសង្ស័យ លាង សារ៉ា ត្រូវបានកម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ឃាត់ខ្លួនតាមដីកាបញ្ជាឱ្យចូលខ្លួនរបស់លោកស្រីព្រះរាជអាជ្ញារង ស៊ឺ វណ្ណនី កាលពីថ្ងៃទី៣០ ខែសីហា ឆ្នាំ២០១៧ នៅក្នុងធនាគារអេស៊ីលីដា។ ក្រោយឃាត់ខ្លួននៅថ្ងៃទី៣១ ខែសីហា កម្លាំងនគរបាលបានបញ្ជូនមកសាលាដំបូងរាជធានី ដើម្បីប្រគល់ខ្លួនជនសង្ស័យឱ្យព្រះរាជអាជ្ញាធ្វើការសាកសួរ និងបន្តនីតិវិធីតាមច្បាប់។
មន្រ្តីនគរបាលបានឲ្យដឹងថា ពាក់ព័ន្ធករណីលួចប្រាក់ច្រើនសន្ធឹកសន្ធាប់ពីអេស៊ីលីដានេះ ផ្តើមឡើងកាលពីអំឡុងឆ្នាំ២០១២ កន្លងទៅ ឈ្មោះ លាង សារ៉ា មានតួនាទីជាមន្ត្រីផ្នែកគ្រប់គ្រងទិន្នន័យ លេខកូដសម្ងាត់កាត ATM របស់ធនាគារអេស៊ីលីដា។ ក្នុងតួនាទីនេះ ជនសង្ស័យបានលួចផលិតកាត ATM មួយផ្ទាល់ខ្លួន ដើម្បីលួចដកប្រាក់ពីទូ ATM របស់ធនាគារអេស៊ីលីដា បន្តិចម្ដងៗរាប់ឆ្នាំមកហើយ។
រហូតមកដល់ពេលនេះ បាត់បង់ប្រាក់ច្រើនពេក ទើបផ្នែកជំនាញបានតាមដានការប្រើប្រាស់លេខកូដ ATM របស់បុគ្គលិកធនាគារផ្ទាល់ ក៏រកឃើញថា ឈ្មោះ លាង សារ៉ា បានប្រើលេខកូដពិសេស ក្នុងការលួចដកប្រាក់ពីធនាគារ ហើយក៏បានដាក់ពាក្យបណ្តឹងទៅសមត្ថកិច្ច ចាត់ការតាមនីតិវិធីតាមច្បាប់តែម្ដង។
សូមបញ្ជាក់ថា បន្ទាប់ពីអតិថិជនរបស់ធនាគារអេស៊ីលីដា នៅព្រឹកថ្ងៃទី៣១ ខែសីហា ឆ្នាំ២០១៧នេះ រអ៊ូរទាំមកកាន់ Fresh News ថា ការដកប្រាក់នៅធនាគារនេះ មានបញ្ហាមិនអាចដកបាននោះ លោក អ៉ិន ចាន់នី ប្រធាននាយកប្រតិបត្តិធនាគារអេស៊ីលីដាបានចេញមកបកស្រាយ តាមរយៈបណ្តាញព័ត៌មាន Fresh News ថា តាមពិតទៅប្រតិបត្តិការបម្រើសេវាដាក់ ឬដកប្រាក់ជូនអតិថិជន នៅធនាគារអេស៊ីលីដា គឺដំណើរការដូចធម្មតា ប៉ុន្តែគ្រាន់តែមានលក្ខណៈយឺតយ៉ាវជាងមុន ដោយសារតែធនាគារបាននិងកំពុង Update System ថ្មី។
លោក អ៉ិន ចាន់នី បានពន្យល់ថា រៀងរាល់ពីរឆ្នាំម្តង ធនាគារអេស៊ីលីដាតែងតែ Update System របស់ធនាគារថ្មី ហើយឆ្នាំនេះ គឺធនាគារចង់ប្រើប្រាស់ System ថ្មីនេះ ឲ្យបានមុនបុណ្យភ្ជុំបិណ្ឌ ទើបធានាគារសម្រេចផ្លាស់ប្តូរមុនថ្ងៃទី៣១ ខែសីហានេះ ប៉ុន្តែដោយសារបញ្ហាបច្ចេកទេស ទើប System ថ្មី មិនអាចរួចរាល់ដូចការកំណត់ ដោយបានអូសបន្លាយរហូតមកដល់ព្រឹកនេះ។
ជាមួយគ្នានេះ ប្រធាននាយកប្រតិបត្តិរូបនេះ ក៏បានថ្លែងនូវការសូមទោសចំពោះដំណើរការយឺតយ៉ាវ ក្នុងការបម្រើសេវាដក ឬដាក់ប្រាក់ជូនអតិថិជន ក្នុងពេលកំពុង Update System ថ្មីនេះ ប៉ុន្តែលោកអះអាងថា យ៉ាងយូរត្រឹមរសៀលថ្ងៃនេះ ឬយប់នេះ ការងារ Update System ថ្មីនឹងត្រូវបញ្ចប់ ហើយអាចបម្រើសេវាជូនអតិថិជនរហ័សដូចពេលមុន៕
