(បន្ទាយមានជ័យ)៖ នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន សមាជិកអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជា និងប្រធានក្រុមការងារថ្នាក់ កណ្តាល ចុះជួយខេត្តបន្ទាមានជ័យ នៅព្រឹកថ្ងៃទី៣០ ខែសីហា ឆ្នាំ២០១៧នេះ បានអញ្ជើញជាអធិបតីភាព ក្នុងពិធីពិធីសំណេះសំណាលជាមួយសាខាបក្សភូមិ គណកម្មាធិការបក្សឃុំ មកពីឃុំស្រះជីកប៉ោយចារ មានសមាជិកសកម្មចំនួន៤១២នាក់ ស្ថិតនៅស្រុកភ្នំស្រុក ខេត្តបន្ទាយមានជ័យ។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានថ្លែងថា សព្វថ្ងៃនេះសន្តិភាព សុវត្ថិភាព សណ្តាប់ធ្នាប់សង្គម សេរីភាព ប្រជាធិបតេយ្យ មានពេញបរិបូរណ៍លើផ្ទៃប្រទេសជាមួយនិងការរីកចម្រើនសំបូរសប្បាយលើគ្រប់វិស័យ។
ក្នុងឱកាសនោះដែរ នាយឧត្តមសេនីយ៍ កែ គឹមយ៉ាន បានថ្លែងបញ្ជាក់ថា «មានសន្តិភាពទើបមានសុវត្ថិភាព មានសន្តិភាពទើបមានការអភិវឌ្ឈ មានទាំងសន្តិភាព និងការអភិវឌ្ឈទើបមានប្រជាធិបតេយ្យ» ហើយសន្តិភាព និងការអភិវឌ្ឍនេះគឺបានកើតចេញពីការដឹកនាំល្អប្រកបដោយគតិបណ្ឌិត ឈ្លាសវៃ ដើរលើផ្លូវត្រូវរបស់ថ្នាក់ដឹកនាំ គណបក្សប្រជាជនកម្ពុជា ពិសេសសម្តេចតេជោ ហ៊ុន សែន នាយករដ្ឋុមន្រ្តី នៃកម្ពុជា និងជាប្រធានគណបក្សប្រជាជនកម្ពុជា និងការចូលរួមពីប្រជាពលរដ្ឋយើងទាំងអស់គ្នា ហើយសន្តិភាពនេះ គឺយើងយកញើសឈាមទៅប្តូរដូចនេះយើងទាំងអស់ត្រូវតែបន្តចូលរួមរក្សាសន្តិភាព ឱ្យនៅគង់វង្សដើម្បីបន្តដំណើររួមគ្នាធ្វើការងារ អភិវឌ្ឍន៍របស់យើងទៅមុខដើម្បីអនាគតយើង កូនចៅយើងទាំងអស់គ្នា កាន់តែមានភាពធូរធាររីកចម្រើនទៅមុខ។
ជាមួយគ្នានេះ នាយឧត្តមសេនីយ៍ កែ គឹមយ៉ាន បានពាំនាំនូវការសួរសុខទុក្ខ និងការថ្លែងអំណរគុណពីសំណាក់សម្តេច ដែលជាថ្នាក់ដឹកនាំនៃគណបក្សប្រជាជនទាំងអស់ដល់មន្រ្តីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្ស និស្សិត ប្រជាពលរដ្ឋទាំងអស់នៅខេត្តបន្ទាយមានជ័យ ដែលបានបោះឆ្នោតជូនគណបក្សប្រជាជនកាលពីថ្ងៃទី៤ ខែមិថុនា ឆ្នាំ២០១៧ និងបានសំណូមពរឱ្យអ្នកបោះឆ្នោតទាំងអស់បន្តគាំទ្របោះឆ្នោតជូនគណបក្សប្រជាជននៅឆ្នាំ២០១៨ខាងមុខ។
ជាមួយវប្បធម៌ចែករំលែក និងការគិតគូរពីសុខទុក្ខប្រជាពលរដ្ឋអ្នកភ្នំស្រុក នាយឧត្តមសេនីយ៍ កែ គឹមយ៉ាន បាននាំយកនូវអំណោយជាទ្រនាប់ដៃ មាន៖
១.សមាជិកសមាជិកា ចំនួន៤១២នាក់ ម្នាក់ទទួលបានសារ៉ុង ១ ។
២.ឧបត្ថ ម្ភសាខាបក្សភូមិទាំង៧៦សាខា ក្នុង១សាខាទទួលបានថវិកា២០០.០០០រៀល។ ៣.ផ្ដល់សង្ក័សីសំរាប់ជួសជុលនិងធ្វើផ្ទះជូនប្រជាពលរដ្ឋតាមឃុំដែលនៅមានផ្ទះប្រក់ស្បូវ ។
៤.ជួយភ្ជាប់ចរន្តអគ្គិសនីនៅភូមិរោគ-មុខឈ្នាងនិងត្រពាំងភាសក្នុងភូមិព្រះអណ្ដូង។
៥.ដោះស្រាយគ្រួសកក្រហមចាក់ថ្នល់លំខាងកើតវត្តកណ្ដាល ៨០០ម៉ែត្រចំនួន២០ឡាន។
៦.ជូនថវិកាគណបក្សឃុំទាំង៦ ក្នុង១ឃុំ១លានរៀល៕
