(តាកែវ)៖ នៅថ្ងៃទី៣០ ខែសីហា ឆ្នាំ២០១៧នេះ គឺជាថ្ងៃទី៣០ នៃយុទ្ធនាការរយៈពេល៣០ថ្ងៃ ដើម្បីរៃអង្គាសថវិកាចូលរួម​សាងសង់ចេតិយជូនលោកបណ្ឌិត កែម ឡី ដែលបង្កើតឡើងដោយ លោក ពេជ្រ ស្រស់ ប្រធានគណបក្សយុវជនកម្ពុជា បានចាប់ផ្តើមបន្តទៀតហើយ​ នៅ​​ផ្សារសំរោងយោង ស្រុកបាទី ខេត្តតាកែវ ក្រោយទទួលបានការអនុញ្ញាត​។

លោក ពេជ្រ ស្រស់ បានថ្លែងឲ្យដឹងថា លោក និងក្រុមការងារ ពិតរីករាយចំពោះសកម្មភាពរៃអង្គាសថវិកានេះ ដើម្បីជួយកសាងចេតិយជូនលោកបណ្ឌិត កែម ឡី ហើយការរៃអង្គាសនេះ ក៏ដោយសារគណៈកម្មការមុន មានព្រះសង្ឃ ប៊ុត ប៊ុនតិញ, លោក ប៉ា ងួនទៀន ជាដើមនោះ មិនអាចជួយរកថវិកាដើម្បីកសាងបាន។ លោករួមនឹងក្រុមការងារ បានសម្រេចបើកយុទ្ធនាការដើររៃអង្គាសថវិកានេះតែម្តង ហើយនេះជារឿងសប្បុរសធម៌ មានរយៈពេល៣០ថ្ងៃ។

លោក ពេជ្រ ស្រស់ បានបញ្ជាក់ប្រាប់អង្គភាព Fresh News ថា យុទ្ធនាការនេះមានការចូលរួមគាំទ្រពី​ បងប្អូន​ប្រជាពលរដ្ឋច្រើនបង្គួរ។ យុទ្ធនាការរៃអង្គាសថវិកានេះ គឺចាប់ពីថ្ងៃទី០១ ខែសីហា ឆ្នាំ ២០១៧ រហូតដល់ថ្ងៃទី៣១ ខែសីហា ឆ្នាំ២០១៧ ដោយចាប់ផ្តើមចេញពីខេត្តត្បូងឃ្មុំ និងបន្តតាមបណ្តាខេត្តនានា ដើម្បីឆ្ពោះមកកាន់រាជធានីភ្នំពេញ។

ប្រធានគណបក្សយុវជនកម្ពុជា ក៏បានអំពាវនាវផងដែរឲ្យប្រជាពលរដ្ឋចូលរួមគាំទ្រ និងចូលរួមជាថវិកា ដើម្បីសាងសង់ចេតិយជូនលោកបណ្ឌិត កែម ឡី ឲ្យបានគ្រប់ៗគ្នា៕​​