(កណ្ដាល)៖ ដោយមានការចង្អុលបង្ហាញពី នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ប្រធានកិត្តិយសក្រុមយុវជនខ៤ នៅព្រឹកថ្ងៃទី២៧ ខែសីហា ឆ្នាំ២០១៧នេះ លោក ណុប រ័ត្ននិមល ទីប្រឹក្សាក្រុមយុវជន ខ៤ និងលោកស្រី អោម រចនី អនុប្រធានប្រតិបត្តិ ព្រមទាំងសមាជិក សមាជិកា បាននាំយកសម្ភារៈ និងថវិកាដែលជាអំណោយរបស់សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់ជូនប្រជាពលរដ្ឋខ្វះខាត ចំនួន១៤គ្រួសារ ស្ថិតក្នុងឃុំដើមប្ញស ស្រុកកណ្តាលស្ទឹង។
ក្នុងឱកាសនោះ លោក ណុប រ័ត្ននិមល ក៏បានពាំនាំនូវការសាកសួរសុខទុក្ខពីសំណាក់ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង និងភរិយា ផ្ញើជូនដល់ប្រជាពលរដ្ឋផងដែរ។
ក្រៅពីនេះ ក្រុមយុវជន ខ៤ បានរៀបរាប់ពីការអភិវឌ្ឍរីកចម្រើនយ៉ាងឆាប់រហ័សរបស់ប្រទេសជាតិ ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ដ្រី ដែលរក្សាបាននូវស្ថេរភាព និងសន្តិសុខសង្គម បានយ៉ាងល្អប្រសើរ ជាពិសេសសម្តេច តែងយកចិត្តទុកដាក់អំពីសុខទុក្ខ និងមិនឲ្យប្រជាពលរដ្ឋណាម្នាក់ អត់ឃ្លាននោះឡើយ៕
