(ប៉េកាំង-ចិន)៖ តបតាមការអញ្ជើញរបស់លោក YU Guangzhou រដ្ឋមន្រ្តីនៃរដ្ឋបាលគយសាធារណរដ្ឋប្រជាមានិតចិន និងក្រុមហ៊ុន NUCTECH លោកបណ្ឌិត គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានដឹកនាំគណៈប្រតិភូអគ្គនាយកដ្ឋានគយ និងរដ្ឋាករកម្ពុជា ទៅបំពេញទស្សនកិច្ចនៅប្រទេសចិនរយៈពេល៣ថ្ងៃនៅទីក្រុងប៉េកាំង ប្រទេសចិន។

ក្នុងដំណើរទស្សនកិច្ចនៅទីក្រុងប៉េកាំងនេះ លោកបណ្ឌិត គុណ ញឹម បានជួបប្រជុំទ្វេភាគីជាមួយលោក YU Guangzhou ពិភាក្សាទៅ លើការពង្រឹងកិច្ចសហប្រតិបត្តិការគយរវាងប្រទេសទាំងពីរ។ កិច្ចពិភាក្សាបានឈានដល់ការឯកភាពលើចំណុចសំខាន់ចំនួន ៦រួមមាន៖

១៖ ប្រគល់ភារកិច្ចជូននាយកដ្ឋានកិច្ចការអន្តរជាតិ ដើម្បីបញ្ចប់សេចក្តីព្រាងអនុស្សរណៈយោគយល់គ្នាស្តីពីកិច្ចសហប្រតិបត្តិការ និងជួយគ្នាទៅវិញទៅមកក្នុងកិច្ចការគយ ដើម្បីចុះហត្ថលេខានៅពេលដ៏សមស្របខាងមុខ

២៖ ភាគីកម្ពុជាគាំទ្រ និងត្រៀមខ្លួនជាស្រេចក្នុងការចូលរួមអនុវត្តគំនិតផ្តួចផ្តើមដោយរដ្ឋបាលគយចិនក្នុងការបង្តើតយន្តការសហប្រតិបត្តិការតភ្ជាប់និងកិច្ចសម្រួលពាណិជ្ជកម្មក្រោមគម្រោងឡាងឆាង-មេគង្គ Lancang-Mekong

៣៖ សហការផ្លាស់ប្តូរព័ត៌មានតាមប្រព័ន្ធអេឡិចត្រូនិចនៃវិញ្ញាបនបត្របញ្ជាក់ដើមកំណើតទំនិញ

៤៖ បង្កើតចំណុចទំនាក់ទំនងសម្រាប់ផ្លាស់ប្តូរស្ថិតិពាណិជ្ជកម្ម

៥៖ បង្កើតយន្តការរួមគ្នាលើការទប់ស្កាត់ បង្ក្រាប និងស៊ើបអង្កេតអំពើរត់គេចពន្ធ

៦៖ ភាគីចិននឹងផ្តល់វគ្គបណ្តុះបណ្តាលដល់ភាគីកម្ពុជាអំពីការវិភាគរូបភាពស្កែន និងវគ្គបណ្តុះបណ្តាលបច្ចេកទេសគយផ្សេងៗទៀត

ក្នុងប្រជុំនោះ លោក គុណ ញឹម បានគូសបញ្ជាក់ថា ប្រទេសកម្ពុជា និងប្រទេសចិន មានទំនាក់ទំនងស្អិតរមួតជាប្រវត្តិសាស្រ្តទាំងផ្នែក នយោបាយ សេដ្ឋកិច្ច និងវប្បធម៌។ បច្ចុប្បន្នប្រទេសចិន ជាដៃគូពាណិជ្ជកម្មយ៉ាងសំខាន់សម្រាប់កម្ពុជា ហើយក៏ជាប្រភពវិនិយោគផ្ទាល់ពីបរទេសធំជាងគេនៅកម្ពុជាផងដែរ។ លើសពីនេះទៀត ប្រទេសចិន ជាប្រទេសដែលផ្តល់ជំនួយហិរញ្ញវត្ថុដ៏សំខាន់ក្នុងការកសាងហេដ្ឋារចនាសម័្ពន្ធនានាដើម្បីអភិវឌ្ឍសេដ្ឋកិច្ច សង្គមរបស់ប្រទេសកម្ពុជា។

ថ្នាក់ដឹកនាំនៃរដ្ឋបាលគយទាំងពីរ បានវាយតម្លៃខ្ពស់ និងចាត់ទុកថាកិច្ចប្រជុំទ្វេភាគីនេះមានសារសំខាន់ ដែលបានរៀបចំឡើងដើម្បីឆ្លើយតបទៅនឹងតម្រូវការរបស់រដ្ឋបាលគយនៃប្រទេសទាំងពីរ ក្នុងការពង្រឹងកិច្ចសហប្រតិបត្តិការទាំងក្នុងកម្រិតទ្វេភាគី និងពហុភាគី ជាពិសេសការចូលរួមអនុវត្តគំនិតផ្ដួចផ្ដើម One belt-One road កិច្ចសហប្រតិបតិ្តការឡាងឆាង-មេគង្គ (Langcang-Mekong) និងកិច្ចព្រមព្រៀងពាណិជ្ជកម្មសេរីអាស៊ាន-ចិនជាដើម លោកបណ្ឌិត គុណ ញឹម ក៏បានគណៈប្រតិភូគយកម្ពុជាបំពេញទស្សនកិច្ច ប្រជុំជាមួយថ្នាក់ដឹកនាំក្រុមហ៊ុន NUCTECH ហើយក៏បានទៅទស្សនកិច្ចសិក្សានៅរោងចក្រផលិតម៉ាស៊ីនស្កែន និងឧបករណ៍រុករកផ្សេងៗរបស់ក្រុមហ៊ុន ដើម្បីស្វែងយល់បន្ថែមនូវបច្ចេកវិទ្យាទំនើបចុងក្រោយក៏ដូចជាឧបករណ៍ និងប្រព័ន្ធថ្មីៗ ដែលបានបង្កើតឡើង ដើម្បីគាំទ្រដល់កិច្ចការគយ និងកិច្ចការសន្តិសុខជាដើម ។

លោកអគ្គនាយក បានថ្លែងអំណរគុណដល់រដ្ឋាភិបាលចិន ក៏ដូចជាក្រុមហ៊ុន NUCTECH ដែលបានផ្តល់ម៉ាស៊ីនស្កែនកុងតឺន័រចំនួន៨គ្រឿង ដែលបច្ចុប្បន្នកំពុងដាក់ឲ្យប្រើប្រាស់នៅតាមមាត់ច្រកសំខាន់ៗ ហើយបានក្លាយជាឧបករណ៍យ៉ាងសំខាន់ក្នុងការបង្ការ ទប់ស្កាត់ និងបង្រ្កាបបទល្មើសផ្សេងៗ៕