(សៀមរាប)៖ កម្លាំងនគរបាលអគ្គនាយកដ្ឋានអន្តោប្រវេសន៍ នៅរសៀលថ្ងៃទី២៤ ខែសីហា ឆ្នាំ២០១៧​នេះ បានបណ្តេញចេញជនជាតិចិនចំនួន១២២នាក់ ពីប្រទេសកម្ពុជា ដែលពាក់ព័ន្ធចាប់ជំរិតទារប្រាក់​តាមប្រព័ន្ធ Internet ដែលត្រូវបានចាប់ខ្លួននៅគោលដៅចំនួន០២ ស្ថិតនៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីដើមខែសីហា កន្លងទៅនេះ។

លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានប្រាប់អង្គភាពព័ត៌មាន Fresh News ​នៅរសៀលនេះថា ជនជាតិចិនទាំង១២២នាក់ បាន​បណ្តេញចេញទៅកាន់ស្រុកកំណើតរបស់ពួកគេវិញ តាមច្រកព្រលានយន្តហោះ អន្តរជាតិសៀមរាប ដោយអនុវត្តតាមប្រកាសក្រសួងមហាផ្ទៃ ចុះថ្ងៃទី១០ ខែសីហា ឆ្នាំ២០១៧ ​និងមានការសហការពីក្រសួងសន្តិសុខសាធារណៈ នៃសាធារណៈរដ្ឋប្រជាមានិតចិន យកយន្តហោះពិសេសចំនួន ០២គ្រឿង មកទទួលយក​។

សូមបញ្ជាក់ថា កាលពីថ្ងៃទី២ ខែសីហា ឆ្នាំ២០១៧កន្លងទៅ កម្លាំងនគរបាលអន្តោប្រវេសន៍ សហការជាមួយកម្លាំងនគរបាលខេត្តបន្ទាយមានជ័យ ក្រោមការបញ្ជាពី នាយឧត្តមសេនីយ៍សតិ្តបណ្ឌិត សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ បានឃាត់ខ្លួនជនសង្ស័យប្រព្រឹត្តបទល្មើស ឆបោក គំរាមគំហែង ជំរិតទារប្រាក់តាមប្រព័ន្ធ បច្ចេកវិទ្យា ទូគមនាគមន៍ (VOIP) ជាជនជាតិចិនជិត២០០នាក់ ព្រមទាំងបានរឹបអូសវត្ថុតាងប្រព្រឹត្តបទល្មើសមួយចំនួនធំ និងបានរកឃើញបញ្ជីឈ្មោះជនរងគ្រោះ នៅប្រទេសចិន ដែលសម្រាប់ពួកវាខលទៅគំរាមជំរិតទារប្រាក់។

ជាមួយគ្នានេះ អគ្គនាយកដ្ឋានអន្តោប្រវេសន៍ សូមអំពាវនាវឲ្យ ប្រជាពលរដ្ឋមានការសហការ រាយការណ៍ជូនសមត្ថកិច្ច អំពីវត្តមានជនបរទេសដែលប្រមូលផ្តំ គ្នាជួលលំនៅដ្ឋានស្នាក់នៅ ប្រព្រឹត្តបទល្មើសឧក្រិដ្ឋ ដែលបណ្តាលឲ្យមានជនរងគ្រោះ និងបាត់បង់ថវិកាជាច្រើនផងដែរ៕​