(រតនគិរី)៖ មន្រ្តីរដ្ឋបាលព្រៃឈើក្រុងបានលុង សហការជាមួយកម្លាំងនគរបាលប៉ុស្តិ៍សង្កាត់បឹងកន្សែង នៅថ្ងៃទី២២ ខែសីហា ឆ្នាំ២០១៧ បានចុះរឹបអូសឈើធ្នង់សន្លឹកមានមុខកាត់តូច-ធំ លាយចម្រុះគ្នាជាច្រើនសន្លឹក និងឈើគ្រញូងដុំមួយចំនួន ដែលគរទុកក្នុងស្នាក់ការសមាគមវៀតណាម ស្ថិតក្នុងភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី។

​បើតាមសមត្ថកិច្ចដែលចុះប្រតិបត្តិការ បានប្រាប់ឲ្យដឹងថា ការចុះរឹបអូសឈើធ្នង់សន្លឹក មានតម្លៃរាប់ម៉ឺនដុល្លារ និងឈើគ្រញូងជាច្រើនដុំនេះ ក្រោមបញ្ជាពីលោក ជា ពេជ្រ ព្រះរាជអាជ្ញាអមសាលាដំបូងខេត្តរតនគិរី។

លោក លី សុផាន នាយសង្កាត់រដ្ឋបាលព្រៃឈើ ក្រុងបានលុង បានប្រាប់ឲ្យដឹងថា វត្ថុតាងនាំយកទៅរក្សាទុក នៅខណ្ឌរដ្ឋបាលព្រៃឈើរតនគិរី ចាត់ការតាមច្បាប់ ហើយម្ចាស់ឈើត្រូវបានសមត្ថកិច្ចបង្ហើបឲ្យដឹងថា មានថៅកែ ឈ្មោះ ហាយ ជនជាតិវៀតណាម ដែលល្បីល្បាញខាងជំនួញឈើទៅវៀតណាម ជាយូរមកហើយ។

យ៉ាងណាក៏ដោយ ចំនួនឈើធ្នង់ និងឈើគ្រញូងមិនទាន់ដឹងចំនួនពិតប្រាកដនៅឡើយទេ៕