(ភ្នំពេញ)៖ សហព័ន្ធស្រូវអង្ករកម្ពុជា បញ្ជាក់ឲ្យដឹងនៅថ្ងៃទី២២ ខែសីហានេះថា ការប្រមូលទិន្នផលស្រូវសែនក្រអូប ក្នុងរដូវបង្កបង្កើនផល ឆ្នាំ២០១៧-២០១៨ បានសម្រេចយ៉ាងហោចណាស់ចន្លោះពី៤០% ទៅ ៥០% ជាមួយតម្លៃសមរម្យ អាចទទួលយកបានទាំងកសិករផលិត និងម្ចាស់រោងម៉ាស៊ីន។
យោងតម្លៃស្រូវដែលក្រុមលេខាធិការដ្ឋានសហព័ន្ធស្រូវអង្ករ បានស្រង់នៅពីថ្ងៃទី ២១ ខែសីហាឆ្នាំ២០១៧ ស្រូវសែនក្រអូបស្ថិតនៅ ចន្លោះពី៩០៥រៀលដល់៩៤០រៀលក្នុងមួយគីឡូក្រាម ក្នុងចំណោមខេត្តដែលមានដំាដុះស្រូវសែនក្រអូបច្រើន ដូចជាខេត្តបន្ទាយមានជ័យ បាត់ដំបង ពោធិសាត់ និង ខេត្តសៀមរាម។
សហព័ន្ធបានឲ្យដឹងទៀតថា អ្នករោងម៉ាស៊ីន និងតំណាងសហគមន៍កសិករ បានផ្តល់ហេតុផលផ្សេងៗគ្នាមួយចំនួន ដែលធ្វើឲ្យតម្លៃស្រូវ សែនក្រអូបរក្សាលំនឹង ព្រមទាំង អាចទទួលយកបានទាំងកសិករ និងអ្នករោងម៉ាស៊ីនដែលជាតួអង្គរដ៏សំខាន់ ក្នុងការប្រមូលទិញស្រូវ សម្រាប់សម្ងួត កិន កែច្នៃ និង នាំចេញ ក្នុងរដូវកាលនេះ។
លោក ឡាយ ឈុនហួ សមាជិកក្រុមប្រឹក្សាភិបាលរបស់សហព័ន្ធ និង ជានាយកគ្រប់គ្រងក្រុមហ៊ុនស៊ីធីរ៉ាយស៍ បានឲ្យដឹងថា រហូតមកដល់ពេលនេះ ទិន្នផលស្រូវសែនក្រអូបចន្លោះពី ៤០% ទៅ៥០% ត្រូវបានប្រមូលពីផ្ទៃដីដាំដុះរួចរាល់ហើយ រីឯស្រូវនៅសល់នឹងត្រូវគេ ប្រមូលផល អស់ក្នុងរយៈពេល៤សប្តាហ៍ទៀត។
លោកបានបញ្ជាក់ទៀតថា តម្លៃស្រូវនៅប្រទេសថៃនិងវៀតណាមបានកើនឡើងក្នុងរយៈពេលថ្មីៗនេះ ហើយវាបានធ្វើឲ្យអង្ករកម្ពុជានៅតែ មានលទ្ធភាពដើម្បីប្រកួតប្រជែង។
លោក ហេង ផេង អនុប្រធានសហព័ន្ធស្រូវអង្ករកម្ពុជា និង ជានាយកគ្រប់គ្រងទូទៅក្រុមហ៊ុនថ្មគោលរ៉ាយស៍ បានបញ្ជាក់ផងដែរថា មូលហេតុសំខាន់មួយដែលនាំឲ្យតម្លៃស្រូវមានស្ថេរភាពក្នុងឆ្នាំនេះ គឺការប្រមូលផលរបស់ប្រជាកសិករមិនសម្រុកខ្លាំងក្នុងពេលតែមួយដូច រដូវកាលប្រមូផលក្នុងឆ្នាំមុន។
លោក ហេង ផេង ក៏បានឯកភាពលើហេតុផលរួមផ្សំខ្លះទៀត ដែលធ្វើឲ្យតម្លៃស្រូវមានលំនឹងល្អសម្រាប់ឆ្នាំនេះ ដូចជា អាកាសអំណោយផល រដ្ឋាភិបាលចេញមុខអន្តរាគមទម្លាក់ទុនទាន់ពេលវេលាសម្រាប់ទិញស្រូវ តម្រូវការទីផ្សារខាងក្រៅមានភាពវិជ្ជមានសម្រាប់នាំចេញ និង ទីផ្សារវៀតណាមក៏បានរួមចំណែកស្រូបយកស្រូវពីកម្ពុជាក្នុងអំឡុងពេលនេះ។
លោក សាម ម្លិះ អ្នកសម្របសម្រួលប្រចាំតំបន់០៥ របស់សហព័ន្ធស្រូវ អង្ករកម្ពុជា ដែលមានខេត្ត កំពង់ឆ្នាំង ពោធិសាត់ បាត់ដំបង បន្ទាយមានជ័យ និង ប៉ៃលិន បានបញ្ជាក់ថា ដោយយោងតាមផ្ទៃដីដាំដុះ ពីមន្ទីរកសិកម្មនៃខេត្តនិមួយៗ តំបន់០៥អាចមានទិន្នផល ស្រូវសែនក្រអូបសរុបប្រមាណជិត ២៣ម៉ឺនតោន ដោយខេត្តបាត់ដំបងមានបរិមាណច្រើនលើសគេ គឺប្រមាណ១៤០០០០ម៉ឺនតោន គ្រប់ដណ្តប់លើផ្ទៃដី៣៥០០០ហិកតា ដោយ១ហិកតាផ្តល់ទិន្នផល៤តោនស្រូវ៕
