(ភ្នំពេញ)៖ ក្រសួងអប់រំ យុវជន និងកីឡា នៅព្រឹកថ្ងៃទី២២ ខែសីហានេះ តាមរយៈ Facebook ផ្លូវការរបស់ខ្លួនដោយអះអាងថា នៅព្រឹកថ្ងៃទី២ នៃការប្រឡងបាក់ឌុប ស្ថានភាពនៅតាមមណ្ឌលប្រឡងនីមួយៗ មានសភាពស្ងប់ស្ងាត់ និងមានរបៀបរៀបរយ ដោយពុំមានការយកសំណៅឯកសារផ្សេងៗចូលក្នុងមណ្ឌលប្រឡងឡើយ។
លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេស ប្រចាំមណ្ឌលរាជធានីភ្នំពេញ សម្រាប់ការប្រឡងសញ្ញាបត្រមធ្យមសិក្សាទុតិយភូមិ បានអញ្ជើញចុះពិនិត្យស្ថានភាពទូទៅនៅតាមមណ្ឌលវិទ្យាល័យច្បារអំពៅរាជធានីភ្នំពេញ។
ក្រសួងអប់រំ បានឲ្យដឹងតៀតថា នាព្រឹកថ្ងៃទី២នេះដែរ សកម្មភាពបើកហិបវិញ្ញាសា នៃការប្រឡង នៅតាមមណ្ឌលប្រឡងទាំង១៧៨ ដោយមានការអញ្ជើញចូលរួម ពីគណៈមេប្រយោគទូទាំងប្រទេស គណៈកម្មការអប្បមាទទូទាំងប្រទេស ប្រធាន-អនុប្រធាននៅតាមមណ្ឌល ដោយមានការចូលរួមសង្កេតការណ៍យ៉ាងយកចិត្តទុកដាក់ ពីមន្ត្រី អ្នកសង្កេតការណ៍ស្ម័គ្រចិត្ត អង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា ។
ចំពោះដំណើរការសំណេរនាព្រឹកនេះមានពីរមុខវិជ្ជាគឺ៖ សម្រាប់ថ្នាក់វិទ្យាសាស្ត្រ ( អក្សរសាស្ត្រខ្មែរ និង រូបវិទ្យា) សម្រាប់ថ្នាក់វិទ្យាសាស្ត្រសង្គម (គណិតវិទ្យា និង សីលធម៌-ពលរដ្ឋវិជ្ជា)៕
