(ភ្នំពេញ)៖ ក្រុមហ៊ុនទូរស័ព្ទ Smart Axiata និងក្រុមហ៊ុនទូរស័ព្ទ Huawei នៅថ្ងៃទី២១ ខែសីហា ឆ្នាំ២០១៧នេះ បានដាក់ឲ្យដំណើរការបច្ចេកវិទ្យា 4.5G ដំបូងគេបង្អស់នៅកម្ពុជា។

ការដាក់ដំណើរការបច្ចេកវិទ្យា 4.5G នេះត្រូវបានធ្វើឡើងនារសៀលថ្ងៃទី២១ ខែសីហា ឆ្នាំ២០១៧ ក្រោមអធិបតីភាពលោក ត្រាំ អ៊ីវតឹក រដ្ឋមន្រ្ដីក្រសួងប្រៃសណីយ៍ និងទូរគមនាគមន៍កម្ពុជា។

លោក ថូ ម៉ាសហ៊ុន បានឲ្យដឹងថា «Smart នៅតែបន្ដធានាឲ្យបានថា អតិថិជនរបស់យើងអាចទទួលបានសេវាកម្មល្អបំផុត ហើយ​យើងបានបោះទុនវិនិយោគចំនួន៧៥លានដុល្លារ នៅក្នុងឆ្នាំ២០១៦ និង៨០លានដុល្លារទៀតនៅក្នុងឆ្នាំនេះ ដើម្បីពង្រីក និងកែលម្អបណ្ដាញ ដើម្បីផ្ដល់ជូនសេវាអ៊ីធឺណិត និងសេវាកម្មបែបឌីជីថលនានាបន្ថែមទៀត»។

លោកបានបន្ដទៀតថា ដោយឈរនៅតំណែងឈានមុខគេនៅក្នុងវិស័យនេះ Smart កំពុងតែសិក្សា​លទ្ធភាព​បច្ចេកវិទ្យា 5G ដែលរួមមានបច្ចេកវិទ្យា Massive MiMo ដើម្បីធានាខ្លួនបានត្រៀមរួចរាល់ សម្រាប់ពេលដែលបទដ្ឋាន និងបច្ចេក​វិទ្យានេះ បានមកដល់។

ក្នុងនោះលោក David Lixiongwei អគ្គនាយក្រុមហ៊ុន Huawei បានថ្លែងឲ្យដឹងដែរថា «ខ្ញុំមានសេចក្ដីរីករាយណាស់ ដែលបានរួម​សហការជាមួយក្រុមហ៊ុន Smart នាំយកបណ្ដាញ 4.5G មកកម្ពុជា ហើយនឹងការខិតទៅរកបច្ចេកវិទ្យាជំនាន់ក្រោយ។ ការវិវត្តន៍​នៃបច្ចេកវិទ្យា 4.5G ពិតជានឹងនាំមកនូវការអភិវឌ្ឍសំខាន់ៗលើ 4G ដែលមាននៅពេលបច្ចុប្បន្ននេះ ក៏ដូចជាដើរតួនាទីជាស្ពាន ឆ្ពោះទៅរកបច្ចេកវិទ្យា 5G នាពេលអនាគត ដែលវានឹងគាំទ្រសេវានានា រួមមានសេវា Mobile Cloud Service ការទស្សនាវីឌីអីក្នុង​កម្រិត 4K Vierual Reality, Internet of Things និងបច្ចេកវិទ្យាអស្ចារ្យជាច្រើនទៀត»៕