(ភ្នំពេញ)៖ លោក ដន ប្រ៊ូវស្ទ័រ ប្រធានអង្គការ​ AIM ប្រចាំនៅកម្ពុជា បានបញ្ជាក់ថា ក្មេងស្រីរងគ្រោះពីការជួញដូរទាំង៣ ដែល CNN បានសម្ភាសន៍នោះ គឺមិនមែនជាជនជាតិខ្មែរទេ ប៉ុន្តែពួកគេគឺជាជនជាតិវៀតណាម ហើយ CNN ក៏បានសម្ភាសន៍ជាភាសាវៀតណាម នាពេលកន្លងមក។ ប្រធានអង្គការនេះបានសម្តែង ការសោកស្តាយដែលទូរទស្សន៍ CNN ចុះផ្សាយខុសពីការពិតថា ក្មេងស្រីដែលរងគ្រោះដោយការជួញដូរផ្លូវភេទទាំងនោះជាជនជាតិខ្មែរ។

ការបញ្ជាក់និងសម្តែងការសោកស្តាយរបស់ ប្រធានអង្គការ​ AIM ប្រចាំនៅកម្ពុជា បានធ្វើឡើងតាមរយៈសន្និសីទសារព័ត៌មានមួយ នារសៀលថ្ងៃទី២១ ខែសីហា ឆ្នាំ២០១៧នេះ នៅសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។

សូមបញ្ជាក់ថា នាថ្មីៗនេះ ទូរទស្សន៍ CNN របស់សហរដ្ឋអាមេរិក និងទូរទស្សន៍ ABC បានផ្សព្វផ្សាយនូវចំណងជើងដ៏គួរឱ្យភ្ញាក់ផ្អើលមួយថា «ក្មេងស្រីកម្ពុជា ត្រូវបានម្តាយលក់ឱ្យបម្រើផ្លូវភេទ»។ ការផ្សព្វផ្សាយនេះ បានរងប្រតិកម្មយ៉ាងខ្លាំងពីរាជរដ្ឋាភិបាលកម្ពុជា ដោយចាត់ទុកថា ជាការប្រមាថមើលងាយដល់ ស្រ្តីខ្មែរ និងក្មេងស្រីខ្មែរ។

ទោះជាយ៉ាងណា បន្ទាប់ពីមានការផ្សព្វផ្សាយបែបនេះ រាជរដ្ឋាភិបាល បានរកឃើញថា អង្គការអន្តរជាតិ AIM គឺជាអ្នកនៅពីក្រោយខ្នង នៃការផ្សព្វផ្សាយនេះ ដោយបានផ្តល់ព័ត៌មានបំភ្លៃ ដល់ CNN។ សម្តេចតេជោ ហ៊ុន សែន កាលពីព្រឹកថ្ងៃទី១ ខែសីហា ឆ្នាំ២០១៧ ក៏បានប្រកាសឱ្យបិទអង្គការ AIM នេះហើយបណ្តេញចេញពីកម្ពុជា ជុំវិញការប្រព្រឹត្តទង្វើដែលមិនអាចអត់ឱនឱ្យបានឡើយ៕