នគរបាលបញ្ជូនអង្គរក្សលោក សួន សេរីរដ្ឋា មកតុលាការ សាកសួរករណីរក្សាទុកអាវុធខុសច្បាប់ និងមានសារធាតុញៀន
15-08-2017 10:27
(ភ្នំពេញ)៖ បុរសម្នាក់ជាអង្គរក្សលោក សួន សេរីរដ្ឋា ប្រធានគណបក្សអំណាចខ្មែរ ត្រូវបាននគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ បញ្ជូនមកដល់អយ្យការអមសាលាដំបូងរាជធានីភ្នំពេញ នៅព្រឹកថ្ងៃទី១៥ ខែសីហា នេះ ដើម្បីសាកសួរករណីរក្សាទុកអាវុធខុសច្បាប់(កាំភ្លើងជ័រ) និង ធ្វើតេស្តទឹកនោមមានសារធាតុញៀន។
មន្ត្រីតុលាការ ថ្លែងថា បច្ចុប្បន្នជនសង្ស័យកំពុងស្ថិតក្រោមការសាកសួររបស់លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ។
នគរបាល បញ្ជាក់ថា ជនសង្ស័យឈ្មោះ ម៉ុម សួង អាយុ៤៤ឆ្នាំ ជាអង្គរក្សលោកសួន សេរីរដ្ឋា និង មានអនិកជនខ្មែររស់នៅសហរដ្ឋអាមេរិក ត្រូវបាននគរបាលឃាត់ខ្លួនកាលពីល្ងាចថ្ងៃទី១២ ខែសីហា នៅក្នុងផ្ទះលោកសួន សេរីរដ្ឋា។
ជាមួយនេះដែរ នៅព្រឹកថ្ងៃទី១៥ ខែសីហា ឆ្នាំ២០១៧នេះ កម្លាំងនគរបាលប្រឆាំងភេរវកម្ម និងឧក្រិដ្ឋកម្មឆ្លងដែន សហការជាមួយកម្លាំងនគរបាលការិយាល័យ ព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ និងកម្លាំងនគរបាលខណ្ឌទួលគោក កំពុងចុះឆែកឆេរទីស្នាក់ការគណបក្សអំណាចខ្មែរ ស្ថិតនៅក្នុង សង្កាត់ទឹកល្អក់ទី២ ខណ្ឌទួលគោក។ ការចុះឆែកឆេរនេះដឹកនាំលោក សៀង សុខ ព្រះរាជអាជ្ញាអាជ្ញារងអមសាលាដំបូងរាជធានីភ្នំពេញ។ នេះបើតាម ឧត្តមសេនីយ៍ឯក អ៊ី សុខឃី ប្រធានាយកដ្ឋាន ប្រឆាំងភេរវកម្ម និងឧក្រិដ្ឋកម្មឆ្លងដែន បានប្រាប់បណ្តាញព័ត៌មាន Fresh News នៅព្រឹកថ្ងៃនេះ។
ការចុះឆែកឆេរនេះ បានធ្វើឡើងបន្ទាប់ពីអតីតមេបក្សអំណាចខ្មែរលោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទីអាទិត្យ ទី១៣ ខែសីហា កន្លងទៅនេះ និងតុលាការសម្រេចឃុំខ្លួនបណ្តោះអាសន្នកាលពីម្សិលមិញ ក្រោយបានសរសេរអត្ថបទវាយប្រហារ និងប្រមាថយ៉ាងធ្ងន់ធ្ងរចំពោះសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងមេទ័ពកម្ពុជា ពាក់ព័ន្ធនឹងការការពារបូរណភាពទឹកដី និងវិធីដោះស្រាយវិវាទជាមួយប្រទេសឡាវ៕
