(ភ្នំពេញ)៖ នាយឧត្តមសេនីយ៍ សឹង សំណាង មេបញ្ជាការកងទ័ពអាកាស នៃកងយោធពលខេមរភូមិន្ទ បានប្រកាសថ្កោលទោស ចំពោះការប្រមាថយ៉ាងធ្ងន់ធ្ងររបស់បុគ្គល សួន សេរីរដ្ឋា ប្រធានគណបក្សអំណាចខ្មែរ មកលើកងទ័ព និងបានចាត់ទុកថានេះជាទង្វើក្បត់ជាតិ។
កាលពីថ្ងៃទី១២ ខែសីហា ឆ្នាំ២០១៧ លោក សួន សេរីរដ្ឋា ប្រធានគណបក្សអំណាចខ្មែរ បានបង្ហោះសារមានចេតនាញុះញង់ បំបែកបំបាក់ឯកភាពជាតិ បំផ្លិចបំផ្លាញកងទ័ពជាតិ បន្ទាបបន្ថោកតួនាទីរបស់កងយោធពលខេមរភូមិន្ទ និងបំពានច្បាប់នៃព្រះរាជាណាចក្រកម្ពុជា។
នាយឧត្តមសេនីយ៍ សឹង សំណាង បានបញ្ជាក់ថា បញ្ជាការដ្ឋានកងទ័ពអាកាស សូមថ្កោលទោសចំពោះ លោក សួន សេរីរដ្ឋា ចាត់ទុកការប្រព្រឹត្តរបស់លោក សួន សេរីរដ្ឋា ជាទង្វើក្បត់ជាតិ។ មេបញ្ជាការកងទ័ពអាកាស សូមគាំទ្រចំណាត់ការរបស់រាជរដ្ឋាភិបាលតាមផ្លូវច្បាប់ទៅលើជនក្បត់ជាតិរូបនេះ។
បញ្ជាការដ្ឋានកងទ័ពអាកាស សូមគាំទ្រ និងស្ងើចសរសើរចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានដោះស្រាយបញ្ហាព្រំដែនជាមួយភាគីឡាវដោយសន្តិវិធី ការពារគង់វង្សនូវបូរណភាពទឹកដី អធិបតេយ្យជាតិដោយគ្មានការបង្ហូរឈាម។
បញ្ជាការដ្ឋានកងទ័ពអាកាស សូមប្តេជ្ញាបន្តបំពេញតួនាទីនិងភារកិច្ចរបស់ខ្លួនដោយខ្ជាប់ខ្ជួនស្របតាមច្បាប់ ដើម្បីថែរក្សាសន្តិភាព សន្តិសុខ សណ្តាប់ធ្នាប់ ពង្រឹងការអនុវត្តច្បាប់ បង្ក្រាបនូវរាល់បទល្មើស និងទង្វើក្បត់ជាតិ។ ត្រៀមខ្លួនជាស្រេចក្នុងការអនុវត្តបទបញ្ជារបស់រាជរដ្ឋាភិបាល៕
