(ភ្នំពេញ)៖ ទីប្រឹក្សាក្រសួងព័ត៌មាន លោក សាម៉ន បណ្ឌិត្យ បានសម្ដែងការមិនពេញចិត្ត និងធ្វើការរិះគន់​ចំពោះស្ទីលតុបតែងខ្លួន ស្លៀកសម្លៀកបំពាក់ របស់តារាសម្ដែង និងជាពិធីករ លោក ប៉ែន ចំរ៉ុង ក្នុងកម្មវិធី «ស៊ីអារម្មណ៍» ដែលបានផ្សាយ ក្នុងស្ថានីយទូរទស្សន៍ PNN នាយប់ថ្ងៃ ០៨ ខែកក្កដា ឆ្នាំ២០១៧ ម្សិលមិញនេះ​ថា ពុំមែនមានលក្ខណៈ ឬបែបបទ​ជារបស់ខ្មែរ ពោលគឺមើលឃើញថា ចម្លងពីវប្បធម៌នៃប្រទេសថៃ ច្រើនជាង។

លោក សាម៉ន បណ្ឌិត្យ ​យល់ឃើញ​មិនខុស​​ពីមហាជនប៉ុន្មានដែរ ដោយលោក បានចោទជាសំណួរថា «តើរចនាបទរបស់កម្មវិធី ​និងការតែងខ្លួន​របស់តារាខ្មែរ គឺត្រូវតាម​លក្ខណៈ​​​របស់ខ្មែរដែរឬទេ ហើយតើមានការត្រួត​​ពិនិត្យកម្រិតណា ពីរចនាបទនោះ?»។ ទស្សនិកជនព្រមទាំង លោក សាម៉ន បណ្ឌិត្យ ដែលជាទីប្រឹក្សា​ក្រសួងព័ត៌មាន និង ជាអ្នកជំនាញក្នុង​​ការ​ផលិតកម្មវិធីសិល្បៈ វប្បធម៌ និងអប់រំ យល់ឃើញថា សម្លៀកបំពាក់ដែលប្រើ​ប្រាស់ក្នុងរឿង «ហ្លួងព្រះស្ដេចកន» ហាក់មានរចនាបទ​ មិ​នចំជារចនាបទរបស់ខ្មែរ នោះទេ។

កម្មវិធី «ស៊ីអារម្មណ៍» ដែលមាន​លោក ប៉ែន ចំរ៉ុង ធ្វើជាពិធីករ ហើយកម្មវិធីនេះ គឺផ្ដោតសំខាន់ លើការសម្ភាសន៍ជុំវិញរឿង «ហ្លួងព្រះស្ដេចកន» ដែលជាខ្សែភាពយន្តខ្មែរដ៏ល្បី។ ប៉ុន្ដែផ្ទុយទៅវិញ សម្លៀកបំពាក់របស់ពិធីករ និង​រចនាបទតុបតែង​របស់កម្មវិធី មើលទៅ​ហាក់បីដូចជាមិនមែនទម្រង់វប្បធម៌ខ្មែរ ទាល់តែសោះ។ ​នេះបានធ្វើឲ្យមហាជន ដែលបានទស្សនាកម្មវិធីនេះហើយ ផ្ទុះការប្រតិកម្មយ៉ាងខ្លាំង ជាពិសេសលើ​លោក ប៉ែន ចំរ៉ុង តែម្ដង ដែលជាមុខសញ្ញារកការរិះគន់ខ្លាំងជាង​គេ ​ព្រោះលោកបានស្លៀកសម្លៀក​បំពាក់មួយឈុត ដោយមានចងក្បាលនឹងក្រណាត់ពណ៌ផងនោះ ដែលការតុបតែខ្លួនបែបនេះ ត្រូវទស្សនិកជនយល់ឃើញថា ​ចម្លងពីជាតិសាសន៍ដទៃ។

ជុំវិញការរិះគន់ខាងលើនេះ លោក ម៉ៅ អាយុទ្ធ ដែលជាអ្នកដឹកនាំរឿង «ហ្លួងព្រះស្ដេចកន» បានចេញមុ​ខមកស្រាយ ដោយលោកបានប្រកាន់ជំហរថា​ សម្លៀកបំពាក់ដែលបាន​ តុបតែងនោះ គឺឆ្លងកាត់ការស្រាវជ្រាវយ៉ាងម៉ត់ចត់។ ជាសម្លៀកបំពាក់ដែលខ្មែរ បានប្រើនៅក្នុងសម័យស្ដេចកន ប៉ុន្តែមកពី សម័យក្រោយៗ ខ្មែរមិនសូវនិយម
ហើយថៃ គេប្រើជាប់​លាប់ជាង ទើបធ្វើឲ្យមានការយល់ច្រឡំ។

​សូមបញ្ជាក់ថា ទោះបីជាយ៉ាងណាក៏ដោយ មហាជន​ហាក់នៅតែគិតថា នេះជារបៀបរបរបែបថៃ ដែលតែងខ្លួនដូចលោក ប៉ែន ចំរ៉ុង ក្នុងកម្មវិធី «ស៊ីអារម្មណ៍» នៅយប់ថ្ងៃទី ០៨ ខែសីហា ឆ្នាំ២០១៧ ក្នុងស្ថានីយទូរទស្សន៍ PNN។​ លើសពីនេះ ក៏មានមហាជន បាននិយាយទៅ លោក ប៉ែន ចំរ៉ុង ថា ខ្លួនជាតារា គប្បីតែជួយលើកស្ទួយវប្បធម៌​ខ្មែរ មិនគួរណាស្លៀកសម្លៀកបំពាក់ តាមការកំណត់របស់អ្នកដឹកនាំ កម្មវិធី ដែលគេសង្ស័យថា មានជនជាតិថៃ ជាអ្នកដឹកនាំ​នោះទេ៕