(ភ្នំពេញ)៖ កម្លាំងនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ សហការជាមួយកម្លាំង នៃស្នងការដ្ឋាននគរបាលរាជធានីភ្នំពេញ ក្រោមការសម្របសម្រួលពីព្រះរាជអាជ្ញារង អមសាលាដំបូងរាជធានីភ្នំពេញ នៅថ្ងៃទី០៨ ខែសីហា ឆ្នាំ២០១៧នេះ ឃាត់ខ្លួនជនជាតិបរទេសសរុប១២នាក់ ដែលបានចូលមកស្នាក់នៅ និងធ្វើការដោយខុសច្បាប់។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី ដែលដឹកនាំប្រតិបត្តិការនេះ បានឲ្យដឹងថា កម្លាំងជំនាញចុះត្រួតពិនិត្យការស្នាក់នៅរបស់ជនបរទេស នៅហាងម៉ាស្សា ស្ថិតក្នុងសង្កាត់បឹងកេងកង២ ខណ្ឌចំការមន ឃាត់ខ្លួនជនបរទេស ០៧នាក់ ស្រី០៦នាក់ ក្នុងនោះជនជាតិ វៀតណាម ចំនួន០៦នាក់ និងជនជាតិថៃម្នាក់។ ប្រធាននាយកដ្ឋានបន្ដថា កម្លាំងនគរបាលជំនាញបាន បន្ដឃាត់ខ្លួនជនជាតិនីហ្សេរីយ៉ា ចំនួន០៥នាក់ នៅរាជធានីភ្នំពេញ និងម្នាក់មកនៅខេត្តកណ្តាល។
បើតាមលោកឧត្តមសេនីយ៍ ជនបរទេសទាំងនេះ បានចូលមកស្នាក់នៅ និងធ្វើការដោយគ្មានលិខិតស្នាម។ ក្រោយឃាត់ខ្លួនជនជាតិបរទេសទាំងអស់នេះ បានបញ្ជូនទៅអគ្គនាយកដ្ឋានអន្ដោប្រវេសន៍ ដើម្បីកសាងសំណុំរឿង ដើម្បីចាត់ការបន្ដ៕
