(ភ្នំពេញ)៖ លោក នុត ពុធដារ៉ា ជំនួយការសម្តេចតេជោ ហ៊ុន សែន នាយករដ្ឋមន្ត្រី និងជាអភិបាលខណ្ឌដង្កោ នៅព្រឹកថ្ងៃទី០៨ ខែសីហា ឆ្នាំ២០១៧ បានចុះពិនិត្យមើលផ្លូវបេតុងថ្មី០១ខ្សែ ដែលទើបស្ថាបនារួច ស្ថិតក្នុងភូមិម័ល សង្កាត់ដង្កោ ដោយប្រើប្រាស់ថវិការបស់រដ្ឋបាលខណ្ឌឆ្នាំ២០១៧។
លោកអភិបាល ក៏បានបន្ដសំណេះសំណាលសាកសួរសុខទុក្ខ បងប្អូនប្រជាពលរដ្ឋ និងស្វែងយល់ពីតម្រូវការ បញ្ហា កង្វល់នានារបស់ពួកគាត់ ដើម្បីធ្វើការដោះស្រាយ ជូនបានទាន់ពេលវេលា។
ជាមួយគ្នានោះ បងប្អូនប្រជាពលរដ្ឋបានធ្វើការអបអរសាទរ និងថ្លែងអំណរគុណ ចំពោះអាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់ ដល់តម្រូវការរបស់ពួកគាត់ ចំពោះការធ្វើសៀវភៅស្នាក់នៅ អត្តសញ្ញាណប័ណ្ណ និងការផ្តល់សេវាសាធារណៈនានា ហើយចំពោះផ្លូវបេតុងថ្មី០១ខ្សែនេះ បានជួយសម្រួលដល់ការធ្វើដំណើររបស់ពួកគាត់ ធំទំលាយ មានផាសុខភាព និងកាត់បន្ថយការកកស្ទះចរាចរណ៍ផងដែរ។
សូមជម្រាបថា ផ្លូវបេតុង១ខ្សែនេះ មានប្រវែង៣៨០ម៉ែត្រទទឹង៨ម៉ែត្រ ដែលជាផ្លូវបញ្ចៀសចរាចរណ៍តភ្ជាប់ពីផ្លូវបឹងតាម៉ាត ទៅកាន់ផ្លូវ៣៧១ ដែលកន្លងមកមានភាពតូចចង្អៀត ខួចខាតពិបាកធ្វើដំណើរ និងមានភាពកកស្ទះចរាចរណ៍៕
