(កំពង់ចាម)៖ ដើម្បីលើកកម្ពស់សុវត្ថិភាពម្ហូបអាហារ មន្រ្តីសាខាកាំកុងត្រូលខេត្តកំពង់ចាម ដឹកនាំដោយលោក ជួន សុជាតិ ប្រធានសាខា នៅថ្ងៃទី៨ ខែសីហា ឆ្នាំ២០១៧នេះ សហការជាមួយមន្រ្តីមន្ទីរពាណិជ្ជកម្ម និងគណៈកម្មការផ្សារ បានចុះត្រួតពិនិត្យទំនិញ បន្ថែ ផ្លែឈើ ដែលដាក់លក់នៅក្នុងផ្សារធំថ្មី ទីរួមខេត្តកំពង់ចាម។
លោក ជួន សុជាតិ បានឲ្យដឹងថា ការចុះត្រួតពិនិត្យទៅលើផលិតផលវេចខ្ចប់ ជាគ្រឿងឧបភោគ បរិភោគ ដែលបាននិងកំពុងដាក់តាំងលក់ នៅតាមផ្សារធំថ្មីដូចជា រួមទាំងផលិត ផលចំណីអាហារ រួមមាន បង្គារ មឹក គុយទាវ សណ្តែកបណ្តុះ និងផលិតផលគ្រឿងសមុទ្រជាដើម ដែលកំពុងចរាចរ ដាក់លក់នៅ លើទីផ្សារ ដោយរកឃើញផ្កាគូឆាយចំនួន ៥គីឡូក្រាម មានកាកសំណល់ថ្នាំកសិកម្ម និងបង្គាចំនួន៥គីឡូក្រាម ដែលមានសារធាតុគីមី។ នៅថ្ងៃដដែលនេះមន្រ្តីកាំកុងត្រូល ក៏បាននាំយករថយន្តចល័តពិសោធន៍ ទៅធ្វើតេស្តលើមុខទំនិញចំនួន៤៣មុខផងដែរ។
ប្រធានសាខា ក៏បានធ្វើការណែនាំដល់អ្នកលក់ និងអ្នកទិញត្រូវដឹងពីអត្តសញ្ញាណ ប្រភពអាស័យដ្ឋានរបស់អ្នកដែល យកមកលក់ឲ្យខ្លួន ឬរក្សាទុកនូវវិក្កយបត្រទូទាត់ ឲ្យបានត្រឹមត្រូវជាព័ត៌មាន ដើម្បីបង្កលក្ខណៈងាយ ស្រួលដល់សមត្ថកិច្ចកាំកុងត្រូល ក្នុងការចុះស្រាវជ្រាវ និងតាមដានបន្ត នឹងមានវិធានការ ទៅតាមផ្លូវច្បាប់ ចំពោះអ្នកលក់ ឬអ្នកចែកចាយផលិតផលទាំងនោះ។
បន្ថែមពីនេះ លោកប្រធានសាខា ក៏បានអំពាវនាវ ដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណា ដែលមានគុណភាព មិនប៉ះពាល់ដល់ សុខមាលភាពអ្នកប្រើប្រាស់៕
