(ភ្នំពេញ)៖ គ្រឹះស្ថានមីក្រូហិរញ្ញវត្ថុក្រេឌីត ភី អិល ស៊ី នៅព្រឹកថ្ងៃទី០៨ ខែសីហា ឆ្នាំ២០១៧នេះ បានចុះកិច្ចព្រមព្រៀងភាពជាដៃគូលើសេវាទូទាត់វិក្កយបត្រ ជាមួយនឹងក្រុមហ៊ុនទ្រូម៉ាន់នី ដើម្បីផ្ដល់ភាពងាយស្រួលដល់អតិថិជន ដែលខ្ចីប្រាក់ពីក្រេឌីតទាំងអស់ អាចបង់ប្រាក់កម្ចីសងមកក្រេឌីតវិញ តាមរយៈភ្នាក់ងារទ្រូម៉ាន់នី។
ការចុះកិច្ចព្រមព្រៀងភាពជាដៃគូនេះ គឺជាជម្រើសល្អមួយសម្រាប់អតិថិជនក្រេឌីត ក្នុងការបង់សងប្រាក់កម្ចីមកក្រេឌីតវិញ បើទោះជាក្នុងថ្ងៃធ្វើការ ថ្ងៃសម្រាក ឬថ្ងៃចុងសប្ដាហ៍ក្ដី ដោយអតិថិជនគ្រាន់តែយកមកជាមួយ នូវតារាងកាលវិភាគសងប្រាក់ និងអញ្ជើញទៅភ្នាក់ងារទ្រូម៉ាន់នី ណាមួយក្នុងប្រទេសកម្ពុជាជាការស្រេច។
លោក ចាន់ ម៉ាច នាយកប្រតិបត្តិគ្រឹះស្ថានមីក្រូហិរញ្ញវត្ថុ ក្រេឌីត បានថ្លែងឲ្យដឹងថា ការចុះកិច្ចព្រមព្រៀងភាពជាដៃគូរវាងក្រេឌីត និងក្រុមហ៊ុនទ្រូម៉ាន់នីនេះ បានផ្ដល់ភាពងាយស្រួលច្រើនដល់អតិថិជន ពីមុនពេលអតិថិជនទាំងអស់ ត្រូវមកបង់ប្រាក់កម្ចី គឺត្រូវមកបង់ប្រាក់ផ្ទាល់ដល់កន្លែង ប៉ុន្ដែឥឡូវអតិថិជនមិនបាច់ចំណាយពេលវេលាមកផ្ទាល់ទេ គឺគ្រាន់តែបង់តាមរយៈទ្រូម៉ាន់នី
ជាការស្រេច។
លោកបញ្ជាក់ទៀតថា បច្ចុប្បន្នក្រេឌីត មានការិយាល័យស្ទើរតែគ្រប់កន្លែងទូទាំងប្រទេស តែក្រេឌីតនៅតែស្វែងរកនូវជម្រើសសេវាកម្មផ្សេងៗ និងថ្មីៗ សម្រាប់អតិថិជនរបស់ខ្លួន ដោយអតិថិជនអាចជ្រើសរើស ជម្រើសណាមួយដែលស័ក្ដិសមសម្រាប់ពួកគាត់ ងាយស្រួល និងសន្សំសំចៃ តាមរយៈភ្នាក់ងារទ្រូម៉ាន់នី នៅទូទាំងប្រទេស ដែលមានប្រមាណ៥០០០កន្លែង។
ជាមួយគ្នានោះលោក គង់ មាន នាយកគ្រប់គ្រងទូទៅក្រុមហ៊ុនទ្រូម៉ាន់នី បានថ្លែងឲ្យដឹងថា ការសហការនេះពិតជាបានផ្ដល់ប្រយោជន៍ យ៉ាងច្រើនសម្រាប់អតិថិជន ដោយអតិថិជនទាំងអស់ អាចសន្សំសំចៃពេលវេលាក្នុងការធ្វើដំណើរ ទៅកាន់គ្រឹះស្ថានមីក្រូហិរញ្ញវត្ថុ ក្រេឌីត ហើយអតិថិជនអាចបង់សេវាទាន់ ពេលវេលាកំណត់ ដោយមិនអស់ថ្លៃពិន័យ ពីព្រោះទ្រូម៉ាន់នីបានផ្ដល់ភាពងាយស្រួល និងជួយកាត់បន្ថយចំណាយ របស់អតិថិជនបានច្រើន តាមរយៈការផ្ដល់សេវាសមរម្យ និងភ្នាក់ងារច្រើនទីតាំងផង។
លោកបានបញ្ជាក់ទៀតថា « ក្រុមហ៊ុននឹងពង្រីកវិសាលភាពឲ្យធំធេងជាងមុន រួមទាំងបន្ដពង្រឹង និងបន្ថែមសេវាកម្មថ្មីៗឲ្យរឹតតែប្រសើរឡើង ជាក់ស្ដែងនៅពេលឆាប់ៗខាងមុខនេះ នឹងមានសេវាកម្ម E-Wallet ដែលអតិថិជនអាចប្រើសេវាកម្មទ្រូម៉ានីទាំងអស់ បានតាមរយៈគណនីជាមួយនឹងកម្មវិធី Mobile App ដោយពុំចាំបាច់មានកាត និងសេវាកម្ម Payment Solution ដែលអតិថិជនអាចទូទាត់ចំណាយតាមហាងផ្សេងៗ បានតាមរយៈទ្រូម៉ាន់នី»។
សូមបញ្ជាក់ថា រហូតមកដល់ពេលនេះ មានអតិថិជនប្រមាណ១.៥លាននាក់ ដែលតែងតែប្រើប្រាស់សេវាកម្មទ្រូម៉ាន់នី ហើយថ្មីៗនេះក្រុមហ៊ុនបានបង្កើតនូវកម្មវិធីពិសេសគឺ «ឈ្នះលុយរាល់ថ្ងៃ! ម៉ូតូរាល់សប្ដាហ៍! ដោយផ្ដល់សំណាងជូនអតិថិជន ដែលបានផ្ញើលុយតាមភ្នាក់ងារទ្រូម៉ាន់នី៕
