(តូក្យូ-ជប៉ុន)៖ សេចក្ដីរាយការណ៍ពីភ្នាក់ងារ Fresh News នៅទីក្រុងតូក្យូ ប្រទេសជប៉ុន បានឲ្យដឹងនៅមុន​នេះបន្ដិច នាល្ងាចថ្ងៃទី០៦ ខែសីហា ឆ្នាំ២០១៧នេះថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បាននិងកំពុងជួបសំណេះសំណាលជាមួយនិស្សិតកម្ពុជា ដែលសិក្សានៅប្រទេសជប៉ុន ជាង១០០នាក់ បន្ទាប់ពីសម្ដេចអញ្ជើញទៅដល់ទីក្រុងតូក្យូ ដោយសុវត្ថិភាព។

សូមជម្រាបថា នៅវេលាម៉ោងប្រមាណ៧៖៥០នាទីព្រឹកថ្ងៃទី០៦ ខែសីហានេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដឹកនាំគណប្រតិភូជាន់ខ្ពស់កម្ពុជា ធ្វើទស្សនកិច្ចផ្លូវការរយៈពេល៤ថ្ងៃនៅប្រទេសជប៉ុន ចាប់ពីថ្ងៃទី០៦ ដល់ថ្ងៃទី០៩ ខែសីហា ឆ្នាំ២០១៧ តបតាមការអញ្ជើញ របស់រដ្ឋាភិបាលជប៉ុន។

នៅកំឡុងស្នាក់នៅប្រទេសជប៉ុន សម្តេចតេជោនាយករដ្ឋមន្ត្រី នឹងចូលគាស់ព្រះអង្គម្ចាស់ រាជទាយាទ ណារ៉ូហ៉ីតូ។ សម្តេចតេជោ នឹងមានកិច្ចប្រជុំកំពូលជាមួយ លោក ស៉ីនហ្សូ អាបេ នាយករដ្ឋមន្ត្រីជប៉ុន និងធ្វើការប្រកាសព័ត៌មានរួមគ្នា ក្រោយនាយករដ្ឋមន្ត្រីទាំង២ អញ្ជើញជាអធិបតី ក្នុងពិធីចុះហត្ថលេខាលើឯកសារចំនួន២ ស្តីពីជំនួយជប៉ុនផ្តល់មកកម្ពុជា ដូចខាងក្រោម៖

១៖ ហិរញ្ញប្បទានឥតសំណង សម្រាប់អនុវត្តគម្រោងធ្វើឲ្យប្រសើរឡើងវិញ ការការពារទឹកជំនន់ក្នុងរាជធានីភ្នំពេញ តំណាក់កាលទី៤ ដែលមានទឹកប្រាក់៣៩៤៨លានយ៉េន ស្មើនឹងប្រមាណ៣៥លានដុល្លារ
២៖ ឥណទានសម្បទាន សម្រាប់គម្រោងអភិវឌ្ឍន៍ចំណតផែកុងតឺន័រថ្មី របស់កំពង់ផែស្វយ័តក្រុងព្រះសីហនុ មានទឹកប្រាក់ ២៣៥០២លានយ៉េន ស្មើនឹង២០៨លានដុល្លារ។

បើតាមក្រសួងការបរទេស ក្នុងដំណើរទស្សនកិច្ចនៅប្រទេសជប៉ុន សម្តេចតេជោ ហ៊ុន សែន ក៏នឹងទទួលការចូលជួបសម្តែងការគួរសម ដោយឡែកពីគ្នា ដោយតំណាងសមាគមមត្តិភាពសភាកម្ពុជា-ជប៉ុន សមាគមមិត្តភាពសភាជប៉ុន-មេគង្គ អង្គការពាណិជ្ជកម្មក្រៅប្រទេសរបស់់ជប៉ុន ព្រមទាំងក្រុមហ៊ុនរបស់ជប៉ុនចំនួន៤ផងដែរ៕