(កំពង់ចាម)៖ លោកឧត្តមសេនីយ៍ត្រី សោ សាវឿន មេបញ្ជាកងរាជអាវុធហត្ថខេត្តកំពង់ចាម បានប្រាប់អង្គភាព Fresh News ឲ្យដឹងនៅថ្ងៃទី០៣ ខែកក្កដា ឆ្នាំ២០១៧នេះថា រយៈពេលមួយសប្ដាហ៍កន្លងទៅនេះ កម្លាំងអាវុធហត្ថបង្ក្រាបករណីគ្រឿងញៀន២កន្លែង ឃាត់បានជនសង្ស័យ៤នាក់ និងថ្នាំញៀន៦៤កញ្ចប់។
លោកឧត្តមសេនីយ៍មេបញ្ជាការ បានបញ្ជាក់ថា ករណី១បង្ក្រាបនៅចំណុចភូមិពាមជីកង ឃុំពាមជីកង ស្រុកកងមាស ឃាត់ខ្លួនជនសង្ស័យបាន៣នាក់ ទី១៖ឈ្មោះ ផាត គីមឈែ អាយុ១៧ឆ្នាំ, ទី២៖ឈ្មោះ ម៉ុង បូរី អាយុ១៧ឆ្នាំ និងទី៣៖ឈ្មោះ ថុល លីហេង អាយុ២៣ឆ្នាំ ហើយដកហូតបានម្សៅក្រាមពណ៌សថ្លា ចំនួន៤០កញ្ចប់ ទូរសព្ទ័ដៃចំនួន០៦គ្រឿង និងសម្ភារៈមួយចំនួនទៀត។
ដោយឡែកករណីទី២ បង្រ្កាបនៅចំណុចភូមិអង្គរដំណាក់ល្អិត ឃុំរការគយ ស្រុកកងមាស ដោយកម្លាំងជំនាញមន្ទីរយុត្តិធម៌អាវុធហត្ថខេត្ត សហការជាមួយកម្លាំងមូលដ្ឋានអាវុធហត្ថស្រុកកងមាស ដោយឃាត់បានជនសង្ស័យម្នាក់ និងដកហូតបានម្សៅក្រាមពណ៌ស ចំនួន២៤កញ្ចប់ និងសម្ភារៈពាក់ព័ន្ធមួយចំនួនទៀត។
បច្ចុប្បន្នជនសង្ស័យទាំង៤នាក់ ត្រូវបានកម្លាំងជំនាញអាវុធហត្ថខេត្ត កសាងសំណុំរឿងដើម្បីចាត់ការបន្ដតាមច្បាប់៕
