(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ជាថ្មីម្ដងទៀត បានព្រមានកម្ទេចគណបក្សប្រឆាំង បើប្រសិនហ៊ានចេញមុខធ្វើបាតុកម្ម តវ៉ានឹងលទ្ធផលបោះឆ្នោតឆ្នាំ២០១៨ ព្រោះសម្ដេចមិនចង់មានរឿងដូចឆ្នាំ២០១៣នោះឡើយ។

ក្នុងពិធីសំណេះសំណាលជាមួយ ប្រតិភូដឹកនាំ​មន្រ្តីកីឡា គ្រូបង្វឹក និងកីឡាករ-កីឡាការិនី មុនចេញទៅប្រកួតកីឡា SEA Games នៅប្រទេសម៉ាឡេស៊ី នាព្រឹកថ្ងៃទី០៣ ខែសីហា ឆ្នាំ២០១៧នេះ សម្ដេចតេជោ ហ៊ុន សែន មានប្រសាសន៍យ៉ាងដូច្នេះថា៖ «ខ្ញុំថាមិនឲ្យសភាពការណ៍​ឆ្នាំ២០១៣វិលវិញទេ សុំទោស ដាក់ហើយ ​កុំធ្វើផ្ដេះផ្ដាស... សូមព្រមានទុកឲ្យហើយ កុំអាងអីធ្វើបាតុកម្ម គេក៏មានសិទ្ធិដែរ រួចហើយបើអ្នកឯងតដៃ អាហ្នឹងរឿងប៉ះដៃវាតគ្នា»។

សម្ដេចតេជោ ហ៊ុន សែន បានគូសបញ្ជាក់ថា គណបក្សប្រឆាំងចង់បានមិនចេះអស់ មិនចេះហើយ សូម្បីតែការបោះឆ្នោតឃុំសង្កាត់ក៏តវ៉ាដែរ ហើយឥលូវនេះ ចង់ឲ្យមានការចុះឈ្មោះបោះឆ្នោតតាម Facebook ទៀត ហើយសម្ដេចបានហៅការចង់បានរបស់គណបក្សប្រឆាំងនេះ គឺជាចេតនាបំផ្លាញការ បោះឆ្នោតនៅកម្ពុជា។

ប្រមុខរាជរដ្ឋាភិបាលកម្ពុជា ថ្លែងយ៉ាងដូច្នេះថា «ខ្ញុំមិនឲ្យមានការតវ៉ាដូចជំនាន់ ឡាំប៉ារហូត សូម្បីតែអាបោះឆ្នោតថ្នាក់ឃុំនេះ តើនៅចង់បានអីទៀត ចង់បានអីទៀត ប៉ុណ្ណឹងហើយចង់បានអីទៀតមិនគ្រប់ទៀត...លូវគេទាមទារឲ្យចុះឈ្មោះតាម Facebook បើដូច្នេះយើងមិនចាំបាច់បោះឆ្នោតទេ តាមពិតបំណងប្រាថ្នាពិតប្រាកដ គឺចង់បំផ្លាញការបោះឆ្នោតនៅកម្ពុជា»។

ជាមួយគ្នានោះសម្ដេចតេជោ​ ហ៊ុន សែន បានលើកឡើងពីការផ្សាយថា រដ្ឋមន្ដ្រី វង សូត ចង់វាយក្បាលនឹងគល់ឬស្សីចំពោះអ្នកក្រុមដែលចង់ធ្វើបាតុកម្ម ​ប៉ុន្ដែសម្ដេចថា ការលើកឡើងនេះគ្រាន់តែជាន័យប្រៀបធៀបតែប៉ុណ្ណោះ ព្រោះថាប្រសិនបើមានការធ្វើបាតុកម្ម ក្រោយការបោះឆ្នោតឆ្នាំ២០១៨ សម្ដេចមិនទុក នោះទេ នឹងកម្ទេចជាដាច់ខាត ដើម្បីរក្សាសណ្ដាប់ធ្នាប់ប្រទេសមួយ។

យ៉ាងណាមិញ សម្ដេចតេជោ ហ៊ុន សែន បានរំលឹកដែរថា ចំពោះគណបក្សណាមួយដែលហ៊ាន ចេញមុខមកធ្វើបាតុកម្មទៀតក្រោយការបោះឆ្នោត នឹងអាចឈាន ទៅដល់ការរំលាយបក្សតែម្ដង ព្រោះថាបច្ចុប្បន្ននេះច្បាប់មានគ្រប់គ្រាន់អស់ហើយ៕