(ភ្នំពេញ)៖ ​​នៅថ្ងៃទី៣១ ខែកក្កដា ឆ្នាំ២០១៧នេះ អភិបាលខណ្ឌដង្កោ និងជាជំនួយការសម្តេចតេជោ ហ៊ុន សែន នាយករដ្ឋមន្រ្តី គឺលោក នុត ពុធដារ៉ា បានបន្តដឹកនាំមន្រ្តីក្រោមឱវាទចុះទៅសួរសុខទុក្ខ និងថ្លែងអំណរគុណប្រជាពលរដ្ឋ នៅតាមមូលដ្ឋាន​សង្កាត់ដង្កោ ព្រមទាំងការចុះពិនិត្យមើលផ្លូវបេតុថ្មី និងប្រព័ន្ធលូក្នុងភូមិថ្មី នៅសង្កាត់ដង្កោផងដែរ។

ក្រៅពីការថ្លែងអំណរគុណនោះអភិបាលខណ្ឌ បានសំណេះសំណាលសាកសួរសុខទុក្ខ ស្វែងយល់អំពីតម្រូវការកង្វល់ និងបញ្ហានានា របស់ប្រជាពលរដ្ឋ បន្ថែមទៀត ដើម្បីត្រៀមដោះស្រាយនាពេលខាងមុខកាន់តែប្រសើរឡើង។

នៅចំពោះមុខប្រជាពលរដ្ឋទាំងនោះលោក នុត ពុធដារ៉ា បានផ្តាំផ្ញើការសួរសុខទុក្ខពីសម្តេចតេជោ ហ៊ុន​ សែន នាយករដ្ឋមន្រ្តី និងជា ប្រធានគណបក្ស ប្រជាជនកម្ពុជា និងសម្តេចកិត្តិព្រឹទ្ធបណ្ឌិត ដែលតែងតែគិតគូពីការរស់នៅប្រចាំរបស់បងប្អូន។

ជាមួយគ្នានេះលោកអភិបាលក៏បានថ្លែងប្រាប់ទៅប្រជាពលរដ្ឋ ឲ្យបន្តបោះឆ្នោតជូន គណបក្សប្រជាជនកម្ពុជា ជ្រើសរើសតំណាងរាស្រ្ត អាណត្តិទី៦ នាថ្ងៃទី២៩ ខែកក្កដា ឆ្នាំ២០១៨ខាងមុខនេះ ដើម្បីគាំទ្រសម្តេចតេជោ ហ៊ុន សែន ជានាយករដ្ឋមន្រ្តីសម្រាប់ដឹកនាំ ប្រទេសជាតិ កាន់តែមានការរីកចំរើន និងអភិវឌ្ឍន៍ខ្លាំងឡើងថែមទៀត៕