(ភ្នំពេញ)៖ លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានឯកភាពចំពោះសំណើររបស់ គណៈប្រតិភូក្រុមឧស្សាហកម្ម ហ្សេសាង នៃទីក្រុងសៀងហៃ ប្រទេសចិន ដែលចង់ឲ្យមានជំនួបរវាង​សហគ្រិន និងពាណិជ្ជករចិន-កម្ពុជា នៅដំណាច់ខែសីហា ឆ្នាំ២០១៧។

ការឯកភាព និងគាំទ្រនូវសំណើរនេះ ត្រូវបានបង្ហាញឡើងនៅរសៀលថ្ងៃទី២៦ ខែកក្កដា ឆ្នាំ២០១៧នេះ បន្ទាប់ពីលោករដ្ឋមន្ដ្រីបានអនុញ្ញាតិឲ្យ គណៈប្រតិភូក្រុមឧស្សាហកម្ម ហ្សេសាង នៃទីក្រុងសៀងហៃ លោក យូ លីងហ្សុង (Yu Ling Xiong) ប្រធានក្រុមហ៊ុន Shanghai Zheshang Business Industrial Group Co., Ltd ជួបសម្តែងការគួរសម និងពិភាក្សាការងារ នាទីស្ដីការក្រសួង។

ក្រៅពីជំនួបសម្ដែងការគួរសម ភាគីចិនក៏មានបំណង​ស្វែងយល់ពីស្ថានភាពជាក់ស្តែងពាក់ព័ន្ធនឹងការវិនិយោគ និងការធ្វើពាណិជ្ជកម្មរវាងចិន-កម្ពុជា ការបង្កើតសមាគមពាណិជ្ជករចិន-កម្ពុជា ប្រចាំទីក្រុងសៀងហៃ ដើម្បីចែករំលែកព័ត៌មានទៅវិញទៅមក និងសំណើសុំរៀបចំឲ្យមានជំនួបប្រជុំរវាងសហគ្រិន និងពាណិជ្ជករចិន-កម្ពុជា នៅដំណាច់ខែសីហា ឆ្នាំ២០១៧ ដែលនឹងមានការចូលរួមពីបណ្តាក្រុមហ៊ុនវិនិយោគ និងពាណិជ្ជកម្មចិន ប្រមាណជាង ២០០ក្រុមហ៊ុន។

ឆ្លើយតបទៅនឹងសំណើខាងលើ រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្ដិ បានជម្រាបជូនដល់ប្រតិភូពីតួនាទី ភារកិច្ចរបស់ក្រសួងពាណិជ្ជកម្មកម្ពុជា ពីទំនាក់ទំនងពាណិជ្ជកម្មរវាងកម្ពុជា-ចិន ការវិនិយោគរបស់ភាគីចិននៅកម្ពុជា ជាពិសេសនៅតំបន់សេដ្ឋកិច្ចពិសេស ក្រុងព្រះសីហនុ សក្តានុពលរបស់កម្ពុជា និងការលើកទឹកចិត្តនានាក្នុង​​ការវិនិយោគនៅ​កម្ពុជា។

​លោកបានបន្ត​ថា លោកសូមគាំទ្រ ទៅនឹងសំណើបង្កើតសមាគមពាណិជ្ជករចិន-កម្ពុជា ប្រចាំនៅសៀងហៃ និងសូមឲ្យមាននៅកម្ពុជាផងដែរ ដើម្បីចែករំលែកព័ត៌មានពាក់ព័ន្ធនឹងការវិនិយោគ ពាណិជ្ជកម្ម ជូនគ្នាទៅវិញទៅមក។

ចំពោះសំណើសុំរៀបចំជំនួបប្រជុំរវាងសហគ្រិន និងពាណិជ្ជករចិន-កម្ពុជា នៅដំណាច់ខែសីហា ឆ្នាំ២០១៧ខាងមុខនេះ លោករដ្ឋមន្ដ្រី បានឯកភាពជាគោលការណ៍ និងស្នើសុំឲ្យភាគីទាំងពីរជួបពិភាក្សាគ្នាលម្អិតបន្តទៀត ដើម្បីរៀបចំឲ្យបានទាន់ពេលវេលាតាមការស្នើសុំ ក្នុងគោលបំណងដើម្បីចូលរួមអនុវត្តន៍យុទ្ធសាស្ត្រអភិវឌ្ឍន៍ ផ្លូវ១ ខ្សែក្រវ៉ាត់១(One Belt One Road Development Strategy) ដែលជាគំនិតផ្តួចផ្តើមរបស់ប្រធានាធិបតីចិន ស៊ី ជីនភីង៕