(ភ្នំពេញ)៖ លោក គង់ គាំ បានដាក់លិខិតលាលែងពីតំណែងប្រធានគណបក្សសមរង្ស៊ី ជាផ្លូវការ នៅព្រឹកថ្ងៃទី២៥ ខែកក្កដា ឆ្នាំ២០១៧ ដោយសារតែលោកមានវ័យកាន់តែចាស់។ ប៉ុន្តែទោះជាយ៉ាងណា លោក គង់ គាំ អះអាងថា លោកនៅតែរក្សាតំណែងរបស់លោក ជាទីប្រឹក្សាជាន់ខ្ពស់របស់គណបក្សសង្រ្គោះជាតិ ឱ្យនៅដដែល។

ការដាក់លិខិតផ្លូវការរបស់ លោក គង់ គាំ ប្រធានគណបក្សសមរង្ស៊ី បានធ្វើឡើងនៅក្នុងកិច្ចប្រជុំគណៈកម្មាធិការអចិន្រ្តៃយ៍របស់ គណបក្សសមរង្ស៊ី នៅព្រឹកថ្ងៃទី២៥ ខែកក្កដា ឆ្នាំ២០១៧ ដែលកិច្ចប្រជុំនេះ ពិភាក្សាអំពីការផ្លាស់ប្តូរឈ្មោះថ្មី និងបូកសរុបលទ្ធផលការងារប្រចាំខែរបស់គណបក្សសមរង្ស៊ី។

លោក គង់ គាំ បានបញ្ជាក់ប្រាប់ Fresh News ឱ្យដឹងថា កន្លងទៅលោកធ្លាប់បានបង្ហើបពីការលាលែងនេះមែន ដើម្បីសម្រាកមើលថែសុខភាព ប៉ុន្តែមិនទាន់ដាច់ស្រេច់ទាំងស្រុងទេ ហើយពេលនេះទើបលោកបានដាក់លិខិតផ្លូវការ ដើម្បីបញ្ចប់តំណែងនានានៅក្នុងគណបក្សសមរង្ស៊ី។

លោក គង់ គាំ បានថ្លែងយ៉ាងដូច្នេះថា៖ «ដើម្បីឱ្យស្របតាមច្បាប់គណបក្សនយោបាយថ្មីនេះ គណៈកម្មាធិការអចិន្រ្តៃយ៍គណបក្សសមរង្ស៊ី បានប្រជុំគ្នា ដើម្បីប្តូរឈ្មោះថ្មី ហើយធ្វើសមាជនៅពេលខាងមុខ អញ្ចឹងខ្ញុំមិនបានបន្តទៅគណបក្សដែលប្តូរឈ្មោះថ្មីនេះទេ ខ្ញុំសូមបញ្ចប់សមាជិកភាពខ្ញុំ និងតួនាទីខ្ញុំជាប្រធានគណបក្សសមរង្ស៊ី ត្រឹមសម័យប្រជុំគណៈកម្មាធិការអចិន្រ្តៃយ៍នេះ»។

ទោះជាយ៉ាងណា លោក គង់ គាំ បានអះអាងថា លោកមិនទាន់បញ្ចប់ជីវិតនយោបាយរបស់លោក នៅក្នុងប្រទេសកម្ពុជានៅឡើយទេ ដោយសារតែលោកនៅមានតួនាទីជាទីប្រឹក្សាជាន់ខ្ពស់របស់គណបក្សសង្រ្គោះជាតិមួយទៀត។ លោកថា លោកនឹងរក្សាតំណែងនេះ ប៉ុន្តែមិនព្រមធ្វើជាក្បាលម៉ាស៊ីននោះទេ។

លោក គង់ គាំ បញ្ជាក់ទៀតថា៖ «ដោយសារសុខភាពសព្វថ្ងៃនេះ មិនសូវល្អទេ គឺចូលវ័យចាស់មួយហើយ បើសិនជាតួនាទីនោះជាទីប្រឹក្សាអី ខ្ញុំមិនបដិសេធទេ ប៉ុន្តែឱ្យទៅជាក្បាលម៉ាស៊ីនអីនោះ ខ្ញុំប្រហែលជាទៅមិនកើតទេ»។

បើតាម លោក គង់ គាំ នៅថ្ងៃខាងមុខ គណបក្សសមរង្ស៊ី មានតែឈ្មោះថ្មីរបស់ខ្លួនតែប៉ុណ្ណោះ ព្រោះនៅពេលចប់អាណត្តិរបស់សមាជិកព្រឹទ្ធសភានៅឆ្នាំ២០១៨ ខាងមុខនេះ សមាជិកព្រឹទ្ធសភា គណបក្សសមរង្ស៊ី នឹងឈរជាតំណាងរាស្រ្តរបស់គណបក្សសង្រ្គោះជាតិ។ លោកថា គណបក្សសមរង្ស៊ី ដែលនឹងប្តូរឈ្មោះថ្មី នឹងនៅតែរក្សាឈ្មោះទុកជាប្រវត្តិសាស្រ្ត៕