(ភ្នំពេញ)៖ លោកឧត្តមសេនីយ៍ឯក ស្វាយ ចាន់ដា អនុប្រធានបណ្ឌិត្យសភានគរបាលកម្ពុជា តំណាង​​នាយឧត្តមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជា បានទទួលស្វាគមន៍ដំណើរទស្សនកិច្ច របស់សិស្ស និស្សិត និងសិក្ខាកាម នៃរាជបណ្ឌិត្យសភានគរបាលភូមិន្ទថៃ ចំនួន៦០រូប ដឹកនាំដោយ លោកវរសេនីយ៍ទោ Suyapiang Bundon ​ប្រធានគណៈប្រតិភូ​មក​បណ្ឌិត្យសភានគរបាលកម្ពុជា នៅថ្ងៃទី១៣ ខែកក្កដា ឆ្នាំ២០១៧។

លោកឧត្តមសេនីយ៍ឯក ស្វាយ ចាន់ដា បានសំដែងការស្វាគមន៍យ៉ាងកក់ក្តៅ ព្រមទាំងលើកបង្ហាញពីតួនាទី ភារកិច្ច របស់បណ្ឌិត្យសភានគរបាលកម្ពុជា ដល់គណៈប្រតិភូខាងលើ ដើម្បីជាពុទ្ធិពេលត្រឡប់ទៅកាន់ប្រទេសថៃវិញ។

លោក​បញ្ជាក់ថា បណ្ឌិត្យសភានគរបាលកម្ពុជា បានប្រែក្លាយពីសាលាភូមិន្ទនគរបាល យោងតាមអនុក្រឹត្យ​លេខ ៨៨ អ.ន.ក្រ.ប.ក ចុះថ្ងៃទី​២៧ ខែ​កក្កដា ឆ្នាំ​២០០៧។ បណ្ឌិត្យសភានគរបាលកម្ពុជា មានតួនាទីជាគ្រឹះស្ថានសិក្សា ដែលមានភារកិច្ចស្រាវជ្រាវវិទ្យាសាស្រ្តនគរបាល និងការបណ្តុះបណ្តាលធនធានមនុស្ស លើវិស័យសន្តិសុខ សណ្តាប់ធ្នាប់សាធារណៈ ចំណេះដឹងទូទៅ និងភាសាបរទេស ដល់មន្រ្តីនគរបាលជាតិ និងមន្រ្តីពន្ធនាគារ​។

ជាមួយគ្នានោះ លោកវរសេនីយ៍ទោ Suyapiang Bundon ក៏បាន​ថ្លែងអំណរគុណដល់ថ្នាក់ដឹកនាំ មន្រ្តី សិស្ស និស្សិត និងសិក្ខាកាមទាំងអស់ របស់បណ្ឌិត្យសភានគរបាលកម្ពុជា ដែលបានសហការយ៉ាងល្អ ចំពោះដំណើរទស្សនកិច្ចសិក្សានេះ។

សូមជម្រាបថា ដំណើរទស្សនកិច្ច របស់សិស្ស និស្សិត និងសិក្ខាកាម នៃរាជបណ្ឌិត្យសភានគរបាលភូមិន្ទថៃ មកកាន់បណ្ឌិត្យសភានគរបាលកម្ពុជា មានគោលបំណងសំខាន់ ដើម្បីរឹតចំណងមិត្តភាពរវាងអង្គភាពបណ្តុះបណ្តាល មន្ត្រីនគរបាលទាំងពីរក្នុងនាមជាសមាជិករបស់ សមាគមបណ្ឌិត្យសភានគរបាលអន្តរជាតិ (INTERPA) ដូចគ្នា៕