(ភ្នំពេញ)៖ នាយឧត្ដមសេនីយ៍ ថោង លីម អគ្គស្នងការរងនគរបាលជាតិ នៅព្រឹកថ្ងៃទី១៤ ខែកក្កដា ឆ្នាំ២០១៧នេះ បានបើកកិច្ចប្រជុំត្រួតពិនិត្យការងារ ប្រចាំត្រីមាសជាមួយ បណ្ដាតំណាងស្ថានទូតទាំងអស់ប្រចាំនៅកម្ពុជា ដើម្បីត្រួតពិនិត្យលទ្ធផលការងារ ការពារសន្តិសុខ និងសុវត្ថិភាពជូនភ្ញៀវទេសចរ បរទេស ស្ថានទូត មន្ត្រីការទូត និងអ្នកវិនិយោគិន។

តំណាងស្ថានទូតបរទេសប្រចាំនៅកម្ពុជា បានលើកសរសើរ និងថ្លែងអំណរគុណ ចំពោះកិច្ចខិតខំប្រឹងប្រែង និងយកចិត្តទុកដាក់ពី សំណាក់អគ្គស្នងការនគរបាលជាតិ ចំពោះសុវត្ថិភាពជនបរទេសទាំងអស់ ដែលកំពុងមានវត្តនៅកម្ពុជា។

ក្នុងកិច្ចប្រជុំនោះនាយឧត្តមសេនីយ៍ ថោង លីម បានឆ្លើយតបទៅនឹងសំណូមពរនានា ដែលតំណាងស្ថានទូតបានលើកឡើង នឹងបន្តខិតខំប្រឹងប្រែងពង្រឹង សមត្ថភាពមន្ត្រីឆ្លើយតបទៅ និងសភាពការណ៍ដែលបានកើតឡើងប្រកបដោយប្រសិទ្ធភាព ធានាបាននូវសុខសុវត្ថិភាព និងបរិយាកាសល្អដល់គ្រប់វត្តមានជនបរទេស ក្នុងកម្ពុជាទាំងបច្ចុប្បន្ន និងពេលអនាគត។

នាយឧត្តមសេនីយ៍ ថោង លីម បានបន្តទៀតថា កិច្ចប្រជុំនេះមានសារសំខាន់ ចំពោះការអនុវត្តន៍តួនាទីភារកិច្ចរបស់ក្រុមការងារ ព័ត៌មានទាន់ហេតុការណ៍ Hotline ជាមួយជនបរទេសប្រចាំនៅកម្ពុជា យើងបានដកបទពិសោធន៍ថ្មីៗ ពីបណ្តាស្ថានទូតតាមរយៈការចូលរួមយោបល់របស់ពួកគេ។

នាយឧត្តមសេនីយ៍ បានបញ្ជាក់ថា ការពង្រឹងការអនុវត្តន៍ភារកិច្ច និងការកែសម្រួលរាល់ចំណុចខ្វះខាតកន្លងមក គឺជាទិសដៅរបស់ក្រុមការងារ ដើម្បីបន្តធ្វើឲ្យប្រសើរឡើង នូវភារកិច្ចការពារសន្តិសុខសុវត្ថិភាព ជូនគ្រប់បណ្តាអង្គទូត ជនបរទេសជាអ្នកវិនិយោគ និងភ្ញៀវទេសចរជាដើម៕