(ភ្នំពេញ)៖ គណៈប្រតិភូផ្សព្វផ្សាយវិស័យទេសចរណ៍​ របស់ប្រទេសចិន បានធ្វើដំណើរមកផ្សព្វផ្សាយ ពីតំបន់ទេសចរណ៍របស់ខ្លួន ក្រោមប្រធានបទ «ប្រទេសចិន លើសពីការស្រមើស្រមៃ (China Beyond your imagination)» នៅក្នុងប្រទេសកម្ពុជា ដោយបានរៀបចំពិធី បង្ហាញពីតំបន់ទេសចរណ៍​ដ៏ល្អឯក តាមបណ្ដាខេត្តនីមួយៗ របស់ប្រទេសចិន នៅក្នុងសណ្ឋាគារ សូហ្វីតែលភ្នំពេញ នារាត្រី​ថ្ងៃទី១២ ខែកក្កដា ឆ្នាំ២០១៧នេះ ដោយមានការ​​អញ្ជើញចូលរួម ជាអធិបតីភាព ពីសំណាក់លោក ថោន ខុន រដ្ឋមន្ត្រីក្រសួងទេសចរណ៍កម្ពុជា,លោក ចាង ស៊ីឡុង (Zhang Xilong) ប្រធានគណៈប្រតិភូ​ទេសចរណ៍ប្រទេសចិន, លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម​នៃ​កម្ពុជា, លោក ទា គង់ ស្ថានតំណាងពាណិជ្ជកម្ម​នៃកម្ពុជា ប្រចាំនៅក្នុងប្រទេស​ចិន, លោកស្រី ឆាយ ស៊ីវលីង ប្រធានសមាគម​ទី​ភ្នាក់ងារ​ទេសចរណ៍កម្ពុជា, លោក ថាន ឈីងសឹង (Tan Qingshen) ភារៈធារីស្ថានទូតសាធារណៈរដ្ឋចិន ប្រចាំនៅកម្ពុជា ព្រមទាំងភ្ញាក់​ងារទេសចរណ៍ ជាតិ និងអន្តរជាតិ​ជាច្រើន​នាក់ទៀត។

លោក ចាង ស៊ីឡុង (Zhang Xilong) ប្រធានគណៈប្រតិភូទេសចរណ៍ប្រទេសចិន បានថ្លែងឲ្យដឹងថា ពិធីផ្សព្វផ្សាយ ពីតំបន់ទេសចរណ៍ ក្រោមប្រធានបទ «ប្រទេសចិន លើសពីការស្រមើស្រមៃ (China Beyond your imagination)» ពិតជាមានសារសំខាន់ណាស់ សម្រាប់ប្រទេសទាំងពីរ និងបង្ហាញពីចំណងទំនាក់ទំនង ជាយុទ្ធសាស្ត្រគ្រប់ជ្រុងជ្រោយ ក្នុងនោះកិច្ចសហ​ប្រតិ​បត្តិការ និងការផ្លាស់ប្ដូរវិស័យទេសចរណ៍​ មានការវិវឌ្ឍកាន់តែប្រសើរ និងរស់រវើក។ នៅក្នុងវេទិការកំពូល​កិច្ចសហប្រតិបត្តិការ​អន្តរជាតិ «ខ្សែក្រវ៉ាត់មួយ វិថីមួយ» ក្នុងឆ្នាំនេះ លោក ស៊ី ជីងពីង ប្រធានាធិបតីចិន និងសម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានយល់ព្រមទៅលើ គោលដៅទាក់ទាញទេសចរណ៍ចិន​ ចំនួន២លាននាក់ នៅក្នុងឆ្នាំ២០២០មកកម្ពុជា ហើយថា នឹងពិចារណា​​បើកជើងហោះហើរត្រង់​ កាន់តែច្រើនទៀត ពីប្រទេសចិន មកប្រាសាទអង្គរវត្តនៃប្រទេសកម្ពុជា។

លោក ចាង ស៊ីឡុង បន្តទៀតថា នៅក្នុងវេទិការកំពូលកិច្ចសហប្រតិបត្តិការ ទេសចរណ៍ធុរកិច្ចចិន និងកម្ពុជា​២០១៧ ទ្វេភាគីទាំងពីរ បានលើកឡើង​ពីការសម្តែងដ៏ល្អ នៃការពង្រឹងកិច្ចសហប្រតិបត្តិការ​ ជាយន្តការទេ្វភាគី។ ភាគីចិននឹងចូលរួមកាន់​តែសកម្ម ក្នុងការរៀបចំការតាំងពិព័រណ៌ទេសចរណ៍ និងកិច្ចប្រជុំទេសចរណ៍​អន្តរជាតិផ្សេងៗ នៅកម្ពុជា ព្រមទាំងនៅពេល​សមស្របណាមួយ ជំរុញការរៀបចំវេទិការកំពូលកិច្ចសហប្រតិបត្តិការ ទេសចរណ៍ចិន និងកម្ពុជា។

លោកសង្កត់ធ្ងន់ថា រាប់រយឆ្នាំកន្លងមក ចិន និងកម្ពុជា គឺជាប្រទេសដ៏សំខាន់ ដែលនៅតាមបណ្តោយផ្លូវសូត្រ តាមសមុទ្រាប្រទេសទាំងពីរមានសំឡេង និងការឆ្លើយតបដូចគ្នា ការទាមទារនូវបរិយាកាសដូចគ្នា ហើយនៅការប្រាស្រ័យទាក់ទងគ្នា​ នៅក្រោមមេឃ និងសមុទ្រជាបន្ទាប់បន្ទាប់ មានដំណើរទស្សនៈកិច្ចទៅវិញទៅមក។ នៅឆ្នាំ២០១៣ រដ្ឋាភិបាលប្រទេសចិន បានផ្តួច​ផ្តើមយុទ្ធសាស្រ្ត «ខ្សែក្រវ៉ាត់មួយ វិថីមួយ» ការផ្តួចផ្តើមនេះ បានធ្វើឲ្យផ្លូវសូត្រតាមសមុទ្របុរាណនេះ បញ្ចេញកម្លាំង និងភាពក្លៀវក្លា​សារជាថ្មី ហើ
យ កិច្ចសហប្រតិបត្តិការទេសចរណ៍ រវាងប្រទេសចិន និងកម្ពុជានឹងបញ្ចេញពន្លឺ​កាន់តែត្រចះត្រចង់។

លោកថ្លែងថា «ក្នុងដំណើរការទស្សនកិច្ច មកកាន់រាជធានីភ្នំពេញលើកនេះ ​ខ្ញុំបានអញ្ជើញតំណាងមន្ទីរទេសចរណ៍​ចំនួនជាង១០ ដែលមក​ពីខេត្ត និងក្រុង​នៃប្រទេសចិន ហើយនេះ គឺជាដំណើរទស្សនកិច្ចលើកដំបូង របស់យើងខ្ញុំមកកាន់ប្រទេសកម្ពុជា ខណៈដែលកម្ពុជាជាប្រទេសទី៦ ក្នុងតំបន់អាស៊ាន ដែលបានធ្វើការផ្សព្វផ្សាយ ហើយសង្ឃឹមថា អាចយកក្តាប់ឱកាស «ខ្សែក្រវ៉ាត់មួយ វិថីមួយ» ដើម្បីអនាគតកិច្ចព្រមព្រៀង របស់ថ្នាក់ដឹកនាំនៃប្រទេសទាំងពីរ ជំរុញសហប្រតិបត្តិការ​ ទេសចរណ៍ចិន និងកម្ពុជាឲ្យក្លាយជាគំរូ កិច្ចសហប្រតិបត្តិការទេសចរណ៍ចិន និងអាស៊ាន!»។

​ដោយឡែកលោក ថោង ខុន រដ្ឋមន្រ្តីក្រសួងទេសចរណ៍កម្ពុជា បានថ្លែងក្នុងពិធីនោះថា ​«រយៈពេល៥ខែ ដើមឆ្នាំ២០១៧ កម្ពុជាទទួលបានទេសចរអន្តរជាតិជិត ២.៣លាននាក់ កើនឡើង ១២.៥ភាគរយ ក្នុងនោះទេសចរចិនមានចំនួន ៤៤ម៉ឺននាក់ កើនឡើង ៣៥.៦ភាគរយ។ នៅឆ្នាំ២០១៧នេះ កម្ពុជានឹងអាចទទួល​បានទេសចរចិនប្រមាណ ១លាននាក់ ហើយនៅឆ្នាំ២០២០ នឹងកើនឡើងយ៉ាងតិច ២លាននាក់ ក្នុងចំណោមទេសចរអន្តរជាតិសរុបប្រមាណ ៧លាននាក់»។

លោកបានបន្តថា ដើម្បីត្រៀមទទួលស្វាគមន៍​ទេសចរអន្តរជាតិ ៧លាននាក់ នៅឆ្នាំ២០២០ ជាយុទ្ធសាស្រ្តកម្ពុជាបានប្ដេជ្ញាចិត្ត ក្នុងការបន្តអភិវឌ្ឍន៍ទេសចរណ៍របស់ខ្លួន ជាគោលដៅទេសចរណ៍ស្អាត និងបៃតង ប្រកបដោយភាពទាក់ទាញ និងផ្ដល់ភាពកក់ក្ដៅ​ដល់ភ្ញៀវទេសចរ ដោយឈរលើលក្ខណៈ​ពិសេស​​នៃអច្ឆរិយភាព នៃប្រាសាទអង្គរវត្ត ប្រាសាទព្រះវិហារ ពិសេសប្រាសាទសំបូរព្រៃគុក ដែលថ្មីៗនេះទើបត្រូវបានចុះក្នុងបញ្ជី​ បេតិកភណ្ឌពិភពលោក របស់អង្គការយូណេស្កូ ផងដែរ។

លោកក៏បានជម្រាប​ទៅអង្គពិធីផងដែរ ពីការព្យាករណ៍របស់អង្គការ UNWTO ដែលបានបញ្ជាក់ថា នៅឆ្នាំ២០២០ ទេសចរចិននឹងដើរចេញ​ ទៅទេសចរណ៍ក្រៅ​ប្រទេសប្រមាណ ២០០លាននាក់ ហើយនឹងចំណាយប្រមាណ ៤២០ប៊ីលានដុល្លារ ដែលធ្វើឲ្យបណ្ដាប្រទេស​នានា​ លើពិភពលោក ត្រៀមខ្លួនក្នុងការទាក់ទាញ និងទទួលស្វាគមន៍ទេសចរណ៍ មហាអំណាចអាស៊ីមួយនេះ​។

សូមបញ្ជាក់ថា កម្មវិធីដើម្បីរៀបចំផ្សព្វផ្សាយ​ ពីវិស័យទេសចរណ៍ចិន មានគោលបំណងចង់បង្ហាញភាពផ្សេងគ្នា នៃផលិតផលទេសចរណ៍ចម្រុះ ធនធានទេសចរណ៍​ដ៏សំបូរបែប​ របស់ប្រទេសចិន និងភាពរួសរាយ រាក់ទាក់របស់ប្រជាជន និងភាពចាស់ទុំ​ នៃប្រព័ន្ធការទទួលស្វាគមន៍ និងបដិសណ្ឋារកិច្ច​របស់ប្រទេសចិន។ ក្នុងគោល​បំណងចំបង គឺចង់ទាក់ទាញ​ភ្លៀវទេសចរពីកម្ពុជា មកដំណើរកំសាន្តនៅប្រទេសចិន ដែលមានតំបន់ទេសរចណ៍ជាច្រើន ដែលភ្លៀវទេសចរមួយចំនួន មិនទាន់បានជ្រាប និងដំណើរកំសាន្តទៅតំបន់ទាំងនោះ។

តំបន់ទេសចរណ៍សំខាន់ៗទាំងអស់នោះ រួមមាន ​ខេត្ត HUNAN, តំបន់ TIBET,ខេត្ត TIANJIN, ខេត្ត GUIZHOU,ខេត្ត HUBEI, ខេត្ត SHANDONG, ខេត្ត QINGHAI,ខេត្ត SHAANXI, ខេត្ត GUANGDONG និង ខេត្ត GUANGXI ​ជាដើម៕