(បន្ទាយមានជ័យ)៖ សិស្សសាលាបឋមសិក្សា ជ័យឧត្តម និងវិទ្យាល័យ ភ្នំស្រុកជាង៣០០នាក់ ស្ថិតនៅភូមិមាត់ស្រះ ឃុំស្រះទឹក ស្រុកភ្នំស្រុក ខេត្តបន្ទាយមានជ័យ បានទទួលការអប់រំអំពី «សុខភាព និងម្ហូបអាហារ» ពីមន្រ្តីសាខាកាំកុងត្រូលបន្ទាយមានជ័យ នៅថ្ងៃទី១៣ ខែកក្កដា ឆ្នាំ២០១៧នេះ។
នៅក្នុងកម្មវិធីនោះ បានធ្វើឡើងក្រោមការដឹកនាំដោយ ស៊ាន ស៊ីណាត ប្រធានសាខាកាំកុងត្រូល លោក ហុង លៀង អនុប្រធានអនុប្រធានសាខា ទទួលបន្ទុកការិយាល័យប្រមូល ចំណូល និងទីផ្សារ ព្រមទាំងមានចូលរូមផងដែរពីមន្ទីរពាណិជ្ជកម្ម និងនគរបាលប្រឆាំងបទល្មើសសេដ្ឋកិច្ចខេត្តផងដែរ។
នៅក្នុងឱកាសនោះលោក ស៊ាន ស៊ីណាត បានអប់រំណែនាំឲ្យប្អូនៗ មានចំណេះដឹងជាមូលដ្ឋាន ក្នុងការជ្រើសរើសចំណីអាហារ ដែលមានសុវត្ថិភាពតាមរយៈការពិនិត្យមើល ទីតាំងលក់ដូរ ការមើលអនាម័យ ក្នុងនិងជុំវិញទីតាំងលក់ដូរ ការពិនិត្យមើល ស្លាកសញ្ញា និងទ្រង់ទ្រាយ សំបកវេចខ្ចប់ និងការពិនិត្យមើលកាលបរិច្ឆេទ ផុតកំណត់អោយប្រើប្រាស់។
លោក ហុង លៀង បានលើកឡើងផងដែរថា វាជាការសំខាន់ណាស់ដែលអប់រំឲ្យប្អូនៗកុមារ ដែលជាទំពាំងស្នងឫស្សី មានចំណេះដឹងជាមូលដ្ឋានអំពីសុវត្ថិភាពម្ហូបអាហារ ដែលជាអាទិភាពទីមួយ ក្នុងចំណោមអាទិភាពទាំង១២ នៃយុទ្ធសាស្ត្រអភិវឌ្ឍន៍ប្រទេសរបស់រាជរដ្ឋាភិបាល។
លោកបានបន្ថែមថា ថ្នាក់ដឹកនាំប្រទេស មាតាបិតាគ្រប់រូប យុវវ័យខ្លួនឯងផ្ទាល់ សុទ្ធតែមិនចង់ឃើញខ្លួនឯងដេកឈឺនៅ លើគ្រែពេទ្យ ក្នុងថ្ងៃទទួលសញ្ញាប័ត្រ ដោយសារការទទួលយក ម្ហូបអាហារ ដែលពុំមាន សុវត្តិភាពពីមួយថ្ងៃ ទៅមួយថ្ងៃ នោះទេ៕
