(ភ្នំពេញ)៖ លោក ជួង ជូងី មេធាវីការពារក្តីឱ្យ លោក គឹម សុខ អ្នកវិភាគបញ្ហាសង្គម នៅព្រឹក ថ្ងៃទី១៣ ខែកក្កដា ឆ្នាំ២០១៧នេះ បានយកពាក្យស្នើសុំឱ្យកូនក្តីរបស់លោក នៅក្រៅឃុំជាបណ្តោះអាសន្ន ទៅដាក់នៅសាលាដំបូងរាជធានីភ្នំពេញ។
ក្នុងលិខិតស្នើសុំនៅក្រៅឃុំនេះ លោកជួង ជូងី បានសរសេរថា មកដល់ពេលនេះ ការស៊ើបអង្កេត ត្រូវបានបំពេញចប់សព្វគ្រប់អស់ហើយ ហើយសំណុំរឿងត្រូវបានបញ្ជូនទៅជំនុំជម្រះ និងបានកំណត់កាលបរិច្ឆេទសវនាការរួចហើយដែរ ដូចនេះ មិនមានភាពចាំបាច់ ត្រូវរក្សាលោក គឹម សុខ ដើម្បីបន្តការស៊ើបអង្កេតទៀតនោះដែរ។
លោក គឹម សុខ ត្រូវបានតុលាការបញ្ជូនទៅឃុំខ្លួន ក្នុងពន្ធនាគារព្រៃស កាលពីរសៀលថ្ងៃទី១៧ ខែកុម្ភៈ ឆ្នាំ២០១៧ ក្រោយពេលសាកសួរ តាមបណ្តឹងមេធាវីតំណាងដោយអាណត្តិរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចំពោះការចោទ គណបក្សប្រជាជនកម្ពុជាថា ជាអ្នកសម្លាប់លោកបណ្ឌិតកែម ឡី។ លោកត្រូវបានតំណាងអយ្យការ ចោទប្រកាន់ចំនួនពីរបទល្មើស គឺ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោដូចគ្នា គឺ ពាក់ព័ន្ធការដែលលោកបានចោទប្រកាន់ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ។
យ៉ាងណាក៏ដោយ បើតាម លោក ជួង ជូងី, សវនាការកាត់ទោស លោក គឹម សុខ នឹងធ្វើឡើងនៅសាលាដំបូងរាជធានីភ្នំពេញ នៅថ្ងៃទី២៧ ខែកក្កដា ឆ្នាំ២០១៧ ខាងមុខនេះ៕
