(ភ្នំពេញ)៖ ក្នុងដំណើរទស្សនកិច្ចផ្លូវការរយៈពេល២ថ្ងៃ នៅប្រទេសមីយ៉ាន់ម៉ា របស់លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានជួបសំណេះសំណាល និងពិភាក្សាការងារជាមួយ លោកស្រី អោង សានស៊ូជី ទីប្រឹក្សារដ្ឋ និងជារដ្ឋមន្រ្តីការបរទសមីយ៉ាន់ម៉ា ដោយក្នុងជំនួបនេះ លោកទេសរដ្ឋមន្ត្រី បានអញ្ជើញលោកស្រី អោង សានស៊ូជី មកបំពេញទស្សនកិច្ចនៅកម្ពុជា ក្នុងពេលវេលាសមស្របណាមួយ ហើយចំពោះការអញ្ជើញនេះ លោកស្រី អោង សានស៊ូជី ក៏បានទទួលការអញ្ជើញនេះ ដោយរីករាយ។
ក្នុងជំនួបរវាងរដ្ឋមន្រ្តីការបរទេសទាំងពីរ ភាគីទាំងពីរបានពិភាក្សា និងឯកភាព ដូចខាងក្រោម៖
* រៀបចំចុះអនុស្សារណៈយោគយល់គ្នាស្តីពី ការពិគ្រោះយោបល់នយោបាយ រវាងក្រសួងការបរទេសនៃប្រទេសទាំងពីរ ដើម្បីពង្រឹងទំនាក់ទំនង និងកិច្ចសន្ទនារវាងប្រទេសទាំងពីរ ក្នុងការសម្របសម្រួលបញ្ហាទ្វេភាគី តំបន់ និងពិភពលោក។
* រៀបចំកិច្ចប្រជុំគណៈកម្មការ ចម្រុះទ្វេភាគីលើកទី២ នៅប្រទេសមីយ៉ាន់ម៉ា ដើម្បីជំរុញកិច្ចសហប្រតិបត្តិការលើវិស័យ ដែលជាប្រយោជន៍រួមរបស់កម្ពុជា និងមីយ៉ាន់ម៉ា។
* ជំរុញទំហំពាណិជ្ជកម្ម រវាងប្រទេសទាំងពីរ តាមរយៈការលើកទឹកចិត្តការវិនិយោគ សហគ្រាស ធុនតូច និងមធ្យម និងការផ្លាស់ប្តូរផលិតផលកសិកម្មជាដើម៕
