(សៀមរាប)៖ លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី នៅថ្ងៃទី១១ ខែកក្កដា ឆ្នាំ២០១៧នេះ ចុះប្រគល់ផ្ទះមនុស្សធម៌ទី២៥ មានទំហំ ៤ម៉ែត្រគុណ៦ម៉ែត្រ ធ្វើពីឈើ ប្រក់ស័ង្កសី ជូនគ្រួសារលោក ជីវ ឈិន អាយុ៤៧ឆ្នាំ និងភរិយាឈ្មោះ ឈិន តាំងឆន អាយុ៥១ឆ្នាំ ជាគ្រួសារទីទ័លក្រខ្លាំង មានជំងឺប្រចាំកាយ និងមានកូនច្រើនក្នុងបន្ទុក រស់នៅភូមិគោកគ្រើល ឃុំលាងដៃ ស្រុកអង្គរធំ។
សូមជម្រាបថា ផ្ទះមនុស្សធម៌នេះ បានការជួយឧបត្ថម្ភពីលោក ឃឹម ប៊ុនសុង អភិបាលខេត្តសៀមរាប និងលោកស្រី តាមរយៈសាខាកាកបាទក្រហមកម្ពុជា ខេត្តសៀមរាប។
ក្នុងឱកាសនោះ លោកស្រីអនុប្រធានគណៈកម្មាធិការសាខា បាននាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែព្រួយបារម្ភ និងយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ លោកស្រី គួយ ណាលីន ក៏បានផ្តាំផ្ញើដល់សមាជិកគ្រួសារ ត្រូវចេះសម្អាត ថែរក្សា ផ្ទះថ្មីនេះដើម្បីបានជាជម្រកដ៏កក់ក្តៅតរៀងទៅ។
អំណោយសម្រាប់សង្កត់ផ្ទះរួមមាន៖ មុង១ ភួយ១ សារុង១ ក្រមា១ កន្ទេល១ អង្ករ៥០គីឡូក្រាម មី១កេស ត្រីខ១យួរ ទឹកត្រី១យួរ ទឹកបរិសុទ្ធ៥យួរ សម្ភារៈផ្ទះបាយ (ឆ្នាំង១ ចាន៥ ស្លាបព្រា៥ ខ្ទះ១ វែកឆា១ វែកបាយ១ ចានជ័រតូច១ ធុងទឹក១គូរ) និងថវិកាមួយចំនួន។ សម្រាប់លោកតា លោកយាយ ដែលចូលរួមម្នាក់ៗទទួលបានថវិកាមួយចំនួនផងដែរ៕
