(ភ្នំពេញ)៖ នៅព្រឹកថ្ងៃទី១១ ខែកក្កដា ឆ្នាំ២០១៧នេះ លោក ឃួង ស្រេង អភិបាលរាជធានីភ្នំពេញ បានដឹកនាំកិច្ចប្រជុំជាថ្មីម្តងទៀត ដើម្បីរកគន្លឹះដោះស្រាយបញ្ហាលិចលង់ នៅក្នុងរាជធានីភ្នំពេញ ក្រោយពេលដែលតំបន់មួយចំនួននៅតែទទួលរងការលិចលង់ ដោយហូរទម្លាក់មកពីបណ្តាខេត្តមួយចំនួន នៅជាប់រាជធានីភ្នំពេញ។
កិច្ចប្រជុំនេះមានការចូលរួមពី អាជ្ញាធរខណ្ឌ មន្ទីរជំនាញ និងមន្រ្តីពាក់ព័ន្ធមួយចំនួនទៀត ហើយគោលបំណងនៃកិច្ចប្រជុំនេះ ដើម្បីពិភាក្សា តើត្រូវធ្វើយ៉ាងណា ដើម្បីដោះស្រាយឲ្យបាន នូវការលិចលង់នៅតំបន់នេះ ទៅតាមការស្នើសុំរបស់ប្រជាពលរដ្ឋ។
លោក ឃួង ស្រេង បានបញ្ជាក់នៅក្នុងកិច្ចប្រជុំយ៉ាងដូច្នេះថា «បញ្ហារំដោះការលិចលង់ដោយជំនន់ទឹកភ្លៀង ជាកង្វល់មួយដ៏ធំរបស់រដ្ឋបាលរាជធានីភ្នំពេញ ហើយពាក់ព័ន្ធនឹងបញ្ហានេះ យើងក៏បានស្ថាបនាប្រព័ន្ធលូខ្នាតធំជាច្រើន ខ្សែនៅក្នុងរាជធានីភ្នំពេញផងដែរ ប៉ុន្តែបញ្ហាប្រឈម នៃការលិចលង់ នៅកើតមានដដែលជាដដែល។ ដូច្នេះហើយទើបរដ្ឋបាលរាជធានីភ្នំពេញ បើកកិច្ចប្រជុំជាមួយជំនាញពាក់ព័ន្ធដោះស្រាយបញ្ហានេះឲ្យបានល្អប្រសើរ»។
សូមបញ្ជាក់ថា នៅព្រឹកថ្ងៃទី០១ ខែកក្កដា ឆ្នាំ២០១៧កន្លងទៅនេះ ក្រោយប្រកាសជាផ្លូវការជាអភិបាលរាជធានីភ្នំពេញថ្មី លោក ឃួង ស្រេង បានដឹកនាំមន្ត្រីជំនាញ និងអាជ្ញាធរដែនដីចុះពិនិត្យមើលសកម្មភាពកាយប្រឡាយស្ទឹងមានជ័យ ដើម្បីរំដោះទឹកចេញពីតំបន់លិចលង់ដោយជំនន់ទឹកភ្លៀង។
មន្ត្រីរដ្ឋបាលរាជធានីភ្នំពេញបានឲ្យដឹងថា ប្រឡាយស្ទឹងមានជ័យ មានប្រវែង១,៩០០ម៉ែត្រ និងមានសារៈសំខាន់ណាស់ ក្នុងការដោះស្រាយជំនន់ទឹកភ្លៀងចេញពីតំបន់ព្រលានយន្តហោះ ផ្លូវ២០០៤ ផ្លូវ២០០២ និងតំបន់ស្ទឹងមានជ័យ ដោយទំលាក់ទឹកទៅស្ថានីយ៍បឹងទំពុន៕
