(បាត់ដំបង)៖ សាកសពមនុស្សប្រុសចំនួន២នាក់ ត្រូវបានគេប្រទះឃើញ បង្កឲ្យមានការភ្ញាក់ផ្អើលយ៉ាងខ្លាំង ដែលករណីប្រទះឃើញនេះ គឺនៅវេលាម៉ោង៧ព្រឹកថ្ងៃទី១០ ខែកក្កដា ឆ្នាំ២០១៧នេះ ស្ថិតត្រង់ចំណុចក្បាលអាងសំរោង ក្នុងភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង។
តាមសេចក្តីរាយការណ៍បានឲ្យដឹងថា ជនរងគ្រោះទាំង២នាក់ ត្រូវបានគេស្គាល់ និងដឹងថាម្នាក់ឈ្មោះ ហួត ឈឿង អាយុ ៤៥ឆ្នាំ ជាអ្នកគួកជេរម៉ូតូ និងម្នាក់ទៀតឈ្មោះរិទ្ធ បានជិះម៉ូតូឌុបគ្នាមកពីមើលម៉ូតូគេលក់ នៅកន្លែងកើតហេតុខាងលើ។ ជនរងគ្រោះទាំង២នាក់ មានទីលំនៅក្នុងភូមិជីនាង ឃុំគោកឃ្មុំ ស្រុកថ្មគោល។
ចំពោះមូលហេតុ ត្រូវសមត្ថកិច្ចដាក់ការសង្ស័យជាករណីប្លន់យកម៉ូតូ ព្រោះនៅមុនពេលកើតហេតុ គេបានឮស្នូរសំឡេងគ្រាប់កាំភ្លើងផ្ទុះ ក្រោយមកមានពលរដ្ឋបានដើរទៅក្បែរកន្លែងសំឡេងផ្ទុះនោះ ក៏ប្រទះឃើញសាកសពទាំង២នាក់ និងបានបាត់ម៉ូតូទៀតផង។
ទោះជាយ៉ាងណា គិតមកដល់ត្រឹម១០៖១០នាទីព្រឹកថ្ងៃដដែល សមត្ថកិច្ចជំនាញកំពុងធ្វើកោសល្យវិច័យលើសាកសព ព្រោះឃើញមានស្នាមគ្រាប់កាំភ្លើង នៅលើសាកសព ដោយកំពុងបើកការស្រាវជ្រាវដើម្បីកំណត់ថា ជាករណីអ្វីពិតប្រាកដ។ បើមានព័ត៌មានលំអិត fresh News នឹងធ្វើការផ្សាយជូនជាបន្តទៀត៕
