(សៀមរាប)៖ សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានចេញសេចក្តីប្រកាសជាផ្លូវការ តែងតាំង​អធិការនគរបាលក្រុងសៀមរាប ជាស្នងការនគរបាលខេត្ត ហើយស្នងការបច្ចុប្បន្ន ត្រូវផ្ទេរទៅជាអនុប្រធាននាយកដ្ឋាន​នគរបាលទេសចរណ៍ ក្រសួងមហាផ្ទៃវិញ។ នេះបើយោងតាមសេចក្តីប្រកាសជាផ្លូវការ របស់សម្តេចក្រឡាហោម ស ខេង ដែលអង្គភាព​ព័ត៌មាន Fresh News ទើបទទួលបាននៅថ្ងៃទី៨ ខែកក្កដា ឆ្នាំ២០១៧នេះ។

តាមសេចក្តីប្រកាសនេះ លោកឧត្តមសេនីយ៍ត្រី ហ៊ូ វ៉ាន់នី ស្នងការបច្ចុប្បន្ន ត្រូវបានផ្ទេរភារកិច្ចទៅជាអនុប្រធាននាយកដ្ឋាន​នគរបាលទេស​ចរណ៍ ក្រសួងមហាផ្ទៃ ហើយលោក ទិត្យ ណារ៉ុង អធិការនគរបាលក្រុងសៀមរាបវិញ ត្រូវតែងតាំងជាស្នងការនគរបាលខេត្តជំនួសវិញ។

បើមិនមានការប្រែប្រួលទេ ពិធីផ្លាស់ប្តូរជាផ្លូវការនឹងត្រូវធ្វើឡើងនៅថ្ងៃទី១០ ខែកក្កដា ឆ្នាំ២០១៧នេះ ក្រោមវត្តមាននាយឧត្តមសេនីយ៍ នេត​ សាវឿន អគ្គស្នងការនគរបាលជាតិ និងលោក ឃឹម ប៊ុនសុង អភិបាលខេត្តសៀមរាប។ឮ

សូមបញ្ជាក់ថា លោកឧត្តមសេនីយ៍ត្រី ហ៊ូ វ៉ាន់នី ត្រូវបានតែងតាំង ជាស្នងការនគរបាលខេត្តសៀមរាប ត្រឹមរយៈជាង២ខែប៉ុណ្ណោះ ប៉ុន្តែនៅ​ពេលនេះ ក៏ត្រូវបានថ្នាក់លើធ្វើការ ផ្លាស់ប្តូរតែម្តង ខណៈស្នាដៃក្នុងរយៈពេលកាន់តំណែងនេះ គេសង្កេតឃើញលោក​ស្នងការបានបញ្ជា និងដឹកនាំកម្លាំងចុះបង្ក្រាបបទល្មើសបានយ៉ាងច្រើនផងដែរ ជូនប្រជាពលរដ្ឋ តាមមូលដ្ឋាន។

យ៉ាងណាក៏ដោយ សម្រាប់លោក ទិត្យ ណារ៉ុង បច្ចុប្បន្នមានអាយុ៥៧ឆ្នាំ ដែលគ្រោងឡើងជាស្នងការនគរបាលខេត្តថ្មីនេះ ត្រួវបានគេដឹងថា បានចូលបម្រើការងារតាំងពីឆ្នាំ១៩៧៩មកម្ល៉េះ៕