(ត្បូងឃ្មុំ)៖ ក្រោមការបញ្ជាផ្ទាល់ពីលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច កម្លាំងនគរបាលជំនាញ សហការជាមួយកម្លាំង នៃស្នងការដ្ឋាននគរបាលខេត្តត្បូងឃ្មុំ បានបង្ក្រាបទីស្ដុក និងចែកចាយ ធូបអូសមួយកន្លែង រឹបអូសបានធូបមូសជិត២០តោន នៅភូមិសួងកើត សង្កាត់សួង ក្រុងសួង។
លោកឧត្តមសេនីយ៍ឯក ចាន់ វ៉ាន់ធឿន ប្រាប់អង្គភាព Fresh News នៅល្ងាចថ្ងៃទី០៨ ខែកក្កដា ឆ្នាំ២០១៧នេះថា ប្រតិបត្តិការនេះបានធ្វើឡើងនៅថ្ងៃទី០៧ ខែកក្កដាម្សិលមិញនេះ ដឹកនាំដោយលោកឧត្តមសេនីយ៍ត្រី មាស រ៉ាវុធ អនុប្រធាននាយកដ្ឋាន ក្រោមការសម្របសម្រួលពីលោក ទៀវ ពណ្ណរាយ ព្រះរាជអាជ្ញារងខេត្តត្បូងឃ្មុំ និងយោងតាមពាក្យបណ្ដឹងរបស់ក្រុមហ៊ុន ស៊ិន ឡុង ជិនបៀន។
លោកឧត្តមសេនីយ៍ឯកប្រធាននាយកដ្ឋាន បន្ថែមថា ទីតាំងនេះមានម្ចាស់ឈ្មោះ វួច ហ៊ាង ភេទស្រី អាយុ៤០ឆ្នាំ ហើយក្នុងនោះជំនាញរកឃើញ និងដកហូតនូវ ធូបមូសក្លែងក្លាយសរុបចំនួន១៧,៨៧០គីឡូក្រាម ក្នុងនោះមានធូបមូសវេចខ្ចប់រួចចំនួន១១០កេស ធូបដើមដាក់ក្នុងការ៉ុង មិនទាន់វេចខ្ចប់ ចំនួន៥១៤ការ៉ុង និងសំបកវេចខ្ចប់មួយចំនួនទៀត។
ក្រោយបញ្ចប់ប្រតិបត្តិការ វត្ថុតាងត្រូវបានរក្សាក្នុងទីតាំងខាងលើ ដោយផ្លុំបេទុក ដើម្បីរង់ចាំការសម្រេចពីតុលាការ ហើយបានហៅម្ចាស់ទីតាំងមកបំភ្លឺ នៅស្នងការដ្ឋាននគរបាលខេត្តត្បូងឃ្មុំ ដើម្បីកសាងសំណុំរឿងបញ្ជូនទៅតុលាការតាមនីតិវិធី៕
