(បន្ទាយមានជ័យ)​៖ លោកឧត្តមសេនីយ៍ទោ ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ បកស្រាយជុំវិញបញ្ហាយកកម្លាំងទាហ៊ាន២-៣នាក់ មកយាមដីរបស់ខ្លួន ហើយលោកថា​បញ្ហាដីដោះស្រាយជាមួយភាគីទាំង២តាមច្បាប់។

លោកឧត្តមសេនីយ៍ទោ ពេជ្រ វណ្ណា ចេញមុខបកស្រាយរឿងទាំងអស់នេះថា​ ចំណុចទី១៖ចំពោះបញ្ហាដែលលោក បានចាក់ដីរំលោភចូលដីប្រជាពលរដ្ឋ ប្រមាណ​​២០ម៉ែត្រនោះ គឺមិនមានពាក់ព័ន្ធជាមួយប្រជាពលរដ្ឋ ចំនួន១០៨គ្រួសារនោះឡើយ គឺពាក់ព័ន្ធតែជាមួយ លោក យី សុខហេង ម្នាក់តែប៉ុណ្ណោះ ហើយភាគីទំនាស់​ចាំទៅដោះស្រាយនៅចំពោះមុខច្បាប់​។

ដោយឡែកចំណុចទី២៖ចំពោះបញ្ហាដែលថា បានបញ្ជាកូនទាហានឲ្យទៅចាំដី គឺមិនពិតប្រាកដនោះទេ ដោយសារតែភាគីទំនាស់ម្ខាងទៀត គឺលោក យី សុខហេង បានឲ្យពលរដ្ឋជួយដឹកបង្គោល​ខ្សាច់ ថ្ម និងស៊ីម៉ង់ យកទៅដាក់លើដីទំនាស់ក្នុងបំណងដើម្បីដាំបង្គោលព្រំ​ឃើញយ៉ាងដូច្នេះ លោក​​បានរាយការណ៍ទៅ ប្រធានគណៈបញ្ជាការឯកភាពក្រុងប៉ោយប៉ែត តែដោយបញ្ហាបន្ទាន់ពេក​ លោក​បានប្រើកូនចៅចំនួន២ ទៅ​៣នាក់ ទៅហាមឃាត់ឲ្យផ្អាកសកម្មភាពធ្វើដាំបង្គោលសិន រងចាំការដោះស្រាយតាមនិតិវិធី​រួចរាល់សិន។
​
ជាមួយគ្នានោះ លោក យី សុខហេង បានឲ្យដឹងថា​ ​លោកមានដីនៅត្រង់នោះ ដោយ​ឃើញភាគី​គឺលោក ពេជ្រ វណ្ណា បានលួចចាក់ដីចូលក្នុងកន្ទុយដីខាងក្រោយប្រមាណ២០ម៉ែត្រ ដោយមិនបានជូនដំណឹង ទើបលោក និងពលរដ្ឋដែលមានទីតាំងដីជាប់នឹងព្រំដីដែលមានឯកសារគ្រប់គ្រាន់ទាំងអស់ ​ទៅ​ដាំបង្គោលព្រំដី។

លោកបានបញ្ជាក់ថា ក្រោយពីលោកបានដឹងថា មានម្ចាស់ដីម្ខាងទៀតបានចាក់អាចម៍ដីចូលក្នុងដី​ប្រមាណ​២០ម៉ែត្រ លោកបានទូរស័ព្ទឲ្យបងប្អូននៅជិតដីនោះឃាតអ្នកចាក់ដីភា្លម។ ម្យ៉ាងទៀត លោកឆ្ងល់ថាចុះហេតុអ្វីដីខាងមុខលោកឧត្តមសេនីយ៍ទោ ពេជ្រ វណ្ណា មិនបានចាក់អាចម៍ចូលទេ តែបែជាមកចាក់ចូលដីខាងក្រោយរាងអក្សរ «L» ទៅវិញ ក្រោយមកលោកបានឃើញ​ដូច្នេះ បានឲ្យបងប្អូនអ្នកភូមិទិញបង្គោលថ្ម ដើម្បីបោះបង្គោលព្រុំ ដែលត្រូវបានលោកឧត្តមសេនីយ៍ទោ ពេជ្រ វណ្ណា លួចឈួសឆាយបង្គោលព្រំ និងថែមទាំងចាក់ដីមកចូលដី​នៅផ្នែកខាងក្រោយទៀត ហើយភ្លាម​នោះស្រាប់តែលេចមុខឃើញមានទាហាន​២-៣នាក់ ចូលហាមឃាត់មិនអនុញ្ញាតិឲ្យបោះបង្គោលឡើយ និងបាន​និយាយថា «មិនអាចបោះបានទេ ព្រោះមេខ្ញុំ (លោកឧត្តមសេនីយ៍ទោ ពេជ្រ វណ្ណា) មិនអនុញ្ញាតិឲ្យបោះឡើយ គឺ​រង់ចាំជួបគ្នានៅចំពោះមុខច្បាប់»។

លោកបន្ថែមថា លោកត្រូវបាន​​លោក ពេជ្រ វណ្ណា ឲ្យជួបគ្នាដើម្បីពិភាក្សាគ្នានៅក្នុងសាលាក្រុង និងបានអញ្ជើញលោក ង៉ោ ម៉េងជ្រួន អភិបាលក្រុងប៉ោយប៉ែត ជួយសម្របសម្រួលផងដែរ ដោយមានបងប្អូនប្រមាណជិត១០នាក់ ​ដែលពាក់ព័ន្ធនឹងដីមានបញ្ហាខាងលើនោះ បានចូលរួមប្រជុំផងដែរ។

លោកថា បានប្រមូលឯកសារជាច្រើនជូនលោកអភិបាល ក្រុងប៉ោយប៉ែត ដើម្បីពិនិត្យ​ដោះស្រាយ ប៉ុន្តែចំណែកលោក ពេជ្រ វណ្ណា មិនបានបង្ហាញឯកសារអ្វីទាំងអស់ចេញឡើយ ដោយលោកអះអាងថា ប្លង់ដីគាត់ គឺស្ថិតក្នុងដៃមេធាវីជាអ្នករក្សាទុកទៅវិញ ត្រង់កន្លែងនេះគឺលោក ក៏ដូចជាប្រជាពលរដ្ឋមានការងឿងឆ្ងល់ខ្លាំងណាស់ បើលោក ពេជ្រ វណ្ណា មានឯកសារគ្រប់គ្រាន់ ហេតុអ្វីចាំបាច់លាក់លៀមនៅចំពោះមុខអាជ្ញាធរ​​ទៅវិញ។

ជាលទ្ធផល នៃកិច្ចប្រជុំការដោះស្រាយបញ្ហាដីទំនាស់ខាងលើនេះ ​មិនទទួលបានលទ្ធផលអ្វីទាំងអស់ ហើយលោក និងប្រជាពលរដ្ឋ បានស្នើសុំលោកអភិបាលក្រុងប៉ោយបែត ស្នើឲ្យភាគីខាងលោក ពេជ្រ វណ្ណា និងលោក អ៊ូ សុខា តំណាងម្ចាស់ប័ណ្ណទាំង១១ប័ណ្ណ ទៅកន្លែងទីតាំងដីដែលកើតហេតុ ដើម្បីបង្ហាញប្លង់ និងព្រំជាមួយគ្នាដើម្បីបញ្ជាក់បញ្ហា ជាក់ស្តែងពេលនោះឃើញមានតែវត្តមានលោក ពេជ្រ​ វណ្ណា និងក្រុមទាហ៊ានប្រមាណ៥-៦នាក់មក ហើយនិយាយគ្នាថា មិនចាក់ដីចូលក្នុងព្រំដីរបស់លោកទេ រង់​ចាំជួបគ្នានៅតុលាការវិញ។

​ប្រមាណ១ម៉ោង​ក្រោយមក លោក និងពលរដ្ឋបានទទួលដំណឹងថា លោកឧត្តមសេនីយ៍ទោ ពេជ្រ វណ្ណា បានលួចទៅដាក់ពាក្យប្តឹង ទៅលោកអធិការនគបាលក្រុងប៉ោយប៉ែតទៅវិញ ដោយបានចោទលោកលួចទៅធ្វើរបងលើកម្មសិទ្ធិដីរបស់គាត់ទៅវិញ។

លោក ង៉ោ ម៉េងជ្រួន អភិបាលក្រុងប៉ោយប៉ែត បានថ្លែងថា ក្នុងនាម​អាជ្ញាធរបានប្រឹងប្រែងខិតខំដោះស្រាយជូនពួកគាត់ តែបញ្ហានេះហួសដែនសមត្ថកិច្ច​ហើយ គឺបញ្ហាមានតែខាងសាលាដំបូងជាអ្នកដោះស្រាយប៉ុណ្ណោះ រឿងចាញ់ ឈ្នះជារឿងរបស់ភាគីទាំង២​៕