(ត្បូងឃ្មុំ)៖ សម្ដេចពញាចក្រី ហេង សំរិន ប្រធានរដ្ឋសភា និងលោកជំទាវ នៅព្រឹកថ្ងៃទី០៨ ខែកក្កដា ឆ្នាំ២០១៧នេះ បានប្រគេនទៀនព្រះវស្សា និងទេយ្យទានដល់វត្តចំនួន៥៨វត្ត នៅស្រុកពញាក្រែក និងស្រុកកំចាយមារ។ ពិធីដែលបានប្រារព្ធនៅវត្តសុវណ្ណារាម ហៅវត្តថ្កូវ ក្នុងឃុំកក់ ស្រុកពញាក្រែក ខេត្តត្បូងឃ្មុំ ក៏មានការចូលរួមពី ថ្នាក់ដឹកនាំរដ្ឋសភា ថ្នាក់ដឹកនាំខេត្តត្បូងឃ្មុំ និងព្រៃវែង ពុទ្ធបរិស័ទ្ធជិតឆ្ងាយក្នុងខេត្តទាំង២យ៉ាងច្រើនកុះករ។
សូមបញ្ជាក់ថា វត្តទាំង៥៨ ដែលត្រូវប្រគេនទៀនព្រះវស្សា និងទេយ្យទាននាពេលនេះ គឺ៥១វត្តក្នុងស្រុកពញាក្រែក ខេត្តត្បូងឃ្មុំ និងចំនួន៧វត្តផ្សេងទៀត ក្នុងឃុំជាច ស្រុកកំចាយមារ ខេត្តព្រៃវែង។
ចំពោះសម្ភារដែលសម្តេចប្រធានរដ្ឋសភា និងលោកជំទាវ បានប្រគេនដល់វត្តទាំង៥៨ ក្នុងមួយវត្តៗទទួលបាន ទៀនព្រះវស្សា១គូ, អង្ករ១០០គីឡូក្រាម, ទឹកសុទ្ធ៣កេស, ទឹកក្រូច៣កេស, មីម៉ាម៉ា១កេសធំ, ស្ករស១០គីឡូក្រាម, ទឹកដោះគោ១០កំប៉ុង, តែ៤កញ្ចប់, កាហ្វេ២កញ្ចប់ និងបច្ច័យចំនួន ៥០ម៉ឺនរៀលផងដែរ។
បន្ថែមពីនេះសម្តេច ហេង សំរិន បានប្រគេនបច្ច័យចំនួន១៣លានរៀល និង២,០០០ដុល្លារ ដល់ព្រះសង្ឃវត្តថ្កូវ សម្រាប់កសាងសមិទ្ធផលនានាក្នុងវត្តជាបន្ត។
ជាមួយគ្នានោះសម្តេច និងលោកជំទាវ បានចែកជូនអំណោយវត្ថុអនុស្សាវរីយ៍ដល់តាជីយាយជី លោកតា លោកយាយ ចំនួន១៥០នាក់ ដោយក្នុងម្នាក់ៗទទួលបាន ក្រណាត់ស១ដុំ និងថវិកាចំនួន១ម៉ឺនរៀល៕
