(ព្រះសីហនុ)៖ ឃាតកម្មដ៏ព្រៃផ្សៃ រំលោភបូកសម្លាប់នារីខារ៉ាអូខេ រួចយកសាកសពបោះចោលក្នុងព្រៃ កាលពីដើមខែមីនាកន្លងទៅនេះ ពេលនេះកម្លាំងនគរបាលខេត្តព្រះសីហនុ ក្រោមការបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបើកប្រតិបត្តិការតាមបង្ក្រាបក្រុមជនដៃដល់បានហើយ ក្នុងនោះមេក្លោងគឺជាប្តីឥតខាន់ស្លា របស់នារីរងគ្រោះតែម្តង ដោយនាំប្រពន្ធ យកទៅឲ្យបក្ខពួក៤នាក់ទៀតចាប់រំលោភសម្លាប់ រួចយកសពទៅបោះចោលនៅក្នុងព្រៃ។
លោកឧត្តមសេនីយ៍ត្រី កុល ផាលី ស្នងការរងទទួលផែនព្រហ្មទណ្ឌ បានប្រាប់អង្គភាព Fresh News នៅរសៀលថ្ងៃទី០៧ ខែកក្កដា ឆ្នាំ២០១៧នេះ ក្រុមជនសង្ស័យត្រូវកម្លាំងនគរបាលបង្រ្កាបបាននៅថ្ងៃទី០៦ ខែកក្កដា ម្សិលមិញនេះ នៅក្នុងរង្គសាលឌីស្កូថេក អិលវី។
លោកឧត្តមសេនីយ៍ត្រីស្នងការរង បានរៀបរាប់លម្អិតថា ដើមឡើងកម្លាំងជំនាញបានដាក់ការសង្ស័យទៅលើបុរសម្នាក់ ឈ្មោះ ទៀន ខ្លុញ ដែលធ្លាប់ជាប្តីរបស់ជនរងគ្រោះ ពីព្រោះជនរងគ្រោះ ធ្លាប់ត្អូញត្អែប្រាប់គេឯងថា ប្តីរបស់នាងបានគំរាមសម្លាប់នាង។ ក្រោយពីកំណត់មុខសញ្ញាបាន និងស្នើសុំដីកាកោះហៅឲ្យចូលខ្លួនពីស្ថាប័ន ព្រះរាជអាជ្ញាមុខសញ្ញាបានគេចខ្លួនមួយរយៈពេល មិនឃើញមានវត្តមាននៅក្នុងមូលដ្ឋានឡើយ។
លុះដល់យប់រំលងអធ្រាត្រឈានចូលថ្ងៃទី០៦ ខែកក្កដា ឆ្នាំ២០១៧ កម្លាំងជំនាញបានឃើញឈ្មោះ ទៀន ខ្លុញ ក្នុងរង្គសាលឌីស្កូថេកអិលវី សមត្ថកិច្ចបានឃាត់ខ្លួនជននោះមកសាកសួរ និងឈានទៅចាប់បានបក្ខពួកជាបន្តបន្ទាប់ សរុបទាំងអស់ចំនួន៤នាក់។ ជនសង្ស័យដែលឃាត់ខ្លួនទី១៖ឈ្មោះ ទៀន ខ្លុញ ឬទៀន ប៊ុនឡូ អាយុ៣០ឆ្នាំ អតីតកាលត្រូវជាប្តីអត់ខាន់ស្លារបស់ជនរងគ្រោះ, ទី២៖ឈ្មោះ សៅ បូរ៉ា អាយុ៣២ឆ្នាំ, ទី៣៖ឈ្មោះ ផុន សុភ័ណ្ឌ អាយុ៣០ឆ្នាំ និងទី៤៖ឈ្មោះ ស៊ុន ណារិទ្ធិ អាយុ៣០ឆ្នាំ។
បើតាមលោកស្នងការរងរូបនេះ នៅចំពោះមុខសមត្ថកិច្ចជនសង្ស័យទាំង៤បាន សារភាពថា កាលពីថ្ងៃកើតហេតុនោះ ពួកវាមានគ្នា៥នាក់ បាននាំគ្នាទៅផឹកស៊ីច្រៀងខារ៉ាអូខេនៅហាងឈ្មោះ ស្រីខួច ក្រោយពេទ្យខេត្ត តាំងពីម៉ោង៨យប់ រហូតដល់ម៉ោង៣ជិតភ្លឺឈាន ចូលថ្ងៃទី១០ ខែមីនា ទើបឈប់ ហើយបាននាំនារីរងគ្រោះ ដឹកតាមម៉ូតូទៅអូរត្រេះចាស់ ពេលនោះបានចូលទៅកាន់រោងមួយ ដែលគ្មានមនុស្សនៅ ហើយនាំគ្នាចាប់រំលោភម្នាក់ម្តងៗ រហូតដល់នាងស្រែកយំខ្លាំងៗ ហៅគេជួយ ពេលនោះពួកគេបានយកកន្សែងពោះគោរឹតក និងយកកាំបិតចាក់បន្ថែមទៀតរហូតដល់ស្លាប់ ហើយបានយកសពដឹកទៅទម្លាក់ចោល កណ្តាលផ្លូវទៅអាឡាំងដឹឡុង ក្រុម៤ ភូមិ៦។
ចម្លើយសារភាពរបស់ក្រុមឧក្រិដ្ឋជន យប់នោះបុរសឈ្មោះ ទៀង ខ្លុញ អតីតជាប្តីជនរងគ្រោះ នៅអង្គុយមើលឲ្យមិត្តភក្តិទាំង៤នាក់ រំលោភជនរងគ្រោះ នៅនឹងមុខតែម្តងខ្លួនគេមិនបានរំលោភទេ។ បច្ចុប្បន្នជនសង្ស័យត្រូវបានកម្លាំងនគរបាល បញ្ជូនទៅការិយាល័យជំនាញ ដើម្បីកសាងសំណុំរឿងផ្ដន្ទាទោសតាមច្បាប់។
សូមជម្រាបថា អំពើមនុស្សឃាតនេះកើតឡើងក្នុងអំឡុងជិតភ្លឺថ្ងៃទី១០ ខែមីនាឆ្នាំ២០១៧ រហូតដល់ថ្ងៃទី១៣ ខែមីនា ទើបប្រជាពលរដ្ឋប្រទះឃើញសាកសពជនរងគ្រោះ ដែលពួកឃាតកបានទុកចោលនៅក្នុងព្រៃក្បែរស្លាកបារីអាឡាំងដឺឡុង ផ្លូវទៅអូរត្រេះចាស់ ក្នុងក្រុមទី២០ ភូមិ៦ សង្កាត់លេខ៤ ក្រុងព្រះសីហនុ។
ជនរងគ្រោះឈ្មោះប្រាក់ សុធី (ហៅស្តើង) អាយុ២៤ឆ្នាំ មានលំនៅដ្ឋាននៅភូមិអូរចំណារ ឃុំអូរឧកញ៉ាហេង ស្រុកព្រៃនប់ បានមកធ្វើការក្នុងហាងខារ៉ាអូខេមួយនៅក្រោយមន្ទីរពេទ្យបង្អែក សង្កាត់លេខ៤ ក្រុងព្រះសីហនុ ខេត្តព្រះសីហនុ៕
